महाभारतम्-12-शांतिपर्व-002

महाभारतम्
द्वादशपर्व
महाभारतम्-12-शांतिपर्व-002
वेदव्यासः

ब्रह्मास्त्रलाभाय द्रोणमुपगतेन कर्णेन तेन त्रैवर्णिकान्यत्वकथनेन प्रत्याख्याने परशुराममेत्य स्वस्य ब्राह्मण्यकथनपूर्वकमस्त्रार्थं तदन्तेवासित्वपरिग्रहः।। 1।। तत्र प्रमादेन विप्रगोवत्सघातिनः कर्णस्य विप्राच्छापप्राप्तिः।। 2।।

वैशंपायन उवाच।	12-2-1x
स एवमुक्तस्तु तदा नारदो वदतांवरः। कथयामास तत्सर्वं यथा शप्तः स सूतजः।।	12-2-1a 12-2-1b
नारद उवाच।	12-2-2x
एवमेतन्महाबाहो यथा वदसि भारत। न कर्णार्जुनयोः किंचिदविषह्यं भवेद्रणे।।	12-2-2a 12-2-2b
गुह्यमेतत्तु देवानां कथयिष्यामि ते नृप। तन्निबोध महाबाहो यथावृत्तमिदं पुरा।।	12-2-3a 12-2-3b
क्षत्रं स्वर्गं कथं गच्छेच्छस्त्रपूतमिति प्रभो। संघर्षजननस्तस्मात्कन्यागर्भो विसर्जितः।।	12-2-4a 12-2-4b
स बालस्तेजसा युक्तः सूतपुत्रत्वमागतः। चकाराङ्गिरसां श्रेष्ठे धनुर्वेदं गुरौ तव।।	12-2-5a 12-2-5b
स बलं भीमसेनस्य फल्गुनस्यास्त्रलाघवम्। बुद्धिं च तव राजेन्द्र यमयोर्विनयं तथा।।	12-2-6a 12-2-6b
सख्यं च वासुदेवेन बाल्ये गाण्डीवधन्वनः। राजानामनुरागं च चिन्तयानो व्यदह्यत।।	12-2-7a 12-2-7b
स सख्यमगमद्बाल्ये राज्ञा दुर्योधनेन च। युष्माभिर्नित्यसंघृष्टो दैवाच्चापि स्वभावतः।।	12-2-8a 12-2-8b
विद्याधिकमथालक्ष्य धनुर्वेदे धनञ्जयम्। द्रोणं रहस्युपागम्य कर्णो वचनमब्रवीत्।।	12-2-9a 12-2-9b
ब्रह्मास्त्रं वेत्तुमिच्छामि सरहस्यनिवर्तनम्। अर्जुनेन समो युद्धे भवेयमिति मे मतिः।।	12-2-10a 12-2-10b
समः पुत्रेषु च स्नेहः शिष्येषु च तव ध्रुवम्। त्वत्प्रसादान्न मा ब्रूयुरकृतास्त्रं विचक्षणाः।।	12-2-11a 12-2-11b
द्रोणस्तथोक्तः कर्णेन सापेक्षः फल्गुनं प्रति। दौरात्म्यं चैव कर्णस्य विदित्वा तमुवाच ह।।	12-2-12a 12-2-12b
ब्रह्मास्त्रं ब्राह्मणो विद्याद्यथावच्चरितव्रतः। क्षत्रियो वा तपस्वी यो नान्यो विद्यात्कथंचन।।	12-2-13a 12-2-13b
इत्युक्तोऽङ्गिरसां श्रेष्ठमामन्त्र्य प्रतिपूज्य च। जगाम सहसा राजन्महेन्द्रं पर्वतं प्रति।।	12-2-14a 12-2-14b
स तु राममुपागम्य शिरसाऽभिप्रणम्य च। ब्राह्मणो भार्गवोऽस्मीति गौरवेणाभ्यवन्दत।।	12-2-15a 12-2-15b
रामस्तं प्रतिजग्राह पृष्ट्वा गोत्रादि सर्वशः। उष्यतां स्वागतं चेति प्रीतिमांश्चाभवद्भृशम्।।	12-2-16a 12-2-16b
तत्र कर्णस्य वसतो महेन्द्रे स्वर्गसंमिते। गन्धर्वै राक्षसैर्यक्षैर्देवैश्चासीत्समागमः।।	12-2-17a 12-2-17b
स तत्रेष्वस्त्रमकरोद्भृगुश्रेष्ठाद्यथाविधि। प्रियश्चाभवदत्यर्थं देवदानवरक्षसाम्।।	12-2-18a 12-2-18b
स कदाचित्समुद्रान्ते विचरन्नाश्रमान्तिके। एकः खङ्गधनुष्पाणिः परिचक्राम सूतजः।।	12-2-19a 12-2-19b
सोऽग्निहोत्रप्रसक्तस्य कस्यचिद्ब्रह्मवादिनः। जघानाज्ञानतः पार्थ होमधेनुं यदृच्छया।।	12-2-20a 12-2-20b
तदज्ञानकृतं मत्वा ब्राह्मणाय न्यवेदयत्। कर्णः प्रसादयंश्चैनमिदमित्यब्रवीद्वचः।।	12-2-21a 12-2-21b
अबुद्धिपूर्वं भगवन्धेनुरेषा हता तव। मया तत्र प्रसादं मे कुरुष्वेति पुनः पुनः।।	12-2-22a 12-2-22b
तं स विप्रोऽब्रवीत्क्रुद्धो वाचा निर्भर्त्सयन्निव। दुराचार वधार्हस्त्वं फलं प्राप्स्यसि दुर्मते।।	12-2-23a 12-2-23b
येन विस्पर्धसे नित्यं यदर्थं घटसेऽनिशम्। युध्यतस्तेन ते पाप भूमिश्चक्रं ग्रसिष्यति।।	12-2-24a 12-2-24b
ततश्चक्रे महीग्रस्ते मूर्धानं ते विचेष्टतः। पातयिष्यति विक्रम्य शत्रुर्गच्छ नराधम।।	12-2-25a 12-2-25b
यथेयं गौर्हता मूढ प्रमत्तस्य त्वया मम। प्रमत्तस्यैव मे वाचा शिरस्ते पातयिष्यति।।	12-2-26a 12-2-26b
शप्तः प्रसादयामास कर्णस्तं द्विजसत्तमम्। गोभिर्धनैश्च रत्नैश्च स चैनं पुनरब्रवीत्।।	12-2-27a 12-2-27b
नेदमव्याहृतं कुर्याद्ब्रह्मलोकेऽपि केवलम्। गच्छ वा तिष्ठ वा यद्वा कार्यं यत्तत्समाचर।।	12-2-28a 12-2-28b
इत्युक्तो ब्राह्मणेनाथ कर्णो दैन्यादधोमुखः। राममभ्यागमद्भीतस्तदेव मनसा स्मरन्।।	12-2-29a 12-2-29b
।। इति श्रीमन्महाभारते शान्तिपर्वणि राजधर्मपर्वणि द्वितीयोऽध्यायः।। 2।।

12-2-4 संघर्षजननो वैराग्न्युद्दीपकः। संचिन्त्य जनितस्तस्मादिति ट.ड. पाठः। कन्यागर्भो विनिर्मित इति झ. पाठः। तत्र कन्यागर्भो देवैः क्षत्रस्य स्वर्गमनाय निर्मित इत्यर्थः।। 12-2-5 चकाराऽधीतवान्। अङ्गिरसां श्रेष्ठे द्रोणे।। 12-2-8 दैवाद्देवानां संकल्पात्।। 12-2-10 रहस्यं तत्प्रसादनविधिर्निवर्तनमुपसंहारस्ताभ्यां सहितं सरहस्यनिवर्तनम्।। 12-2-15 गुरुरेव पितेत्यभिसंधिः 12-2-19 समुद्रान्ते दक्षिणसमुद्रसमीपे।। 12-2-20 होमधेनुं कर्णपर्वोक्तदिशा वत्सवध एवात्र धेनुवधो ज्ञेयः।। 12-2-26 प्रमत्तेन त्वया मम। प्रमत्तस्य तथाऽरातिरिति झ. पाठ।। 12-2-28 नेदं मद्वचनं कुर्याद्ब्रह्मलोकेऽपि चान्यथा इति ट. पाठः।।

शांतिपर्व-001

पुटाग्रे अल्लिखितम्।

शांतिपर्व-003