महाभारतम्-12-शांतिपर्व-324

महाभारतम्
द्वादशपर्व
महाभारतम्-12-शांतिपर्व-324
वेदव्यासः

भीष्मण युधिष्ठिरंप्रति दारापत्यादिषु स्नेहत्यागपूर्वकं धर्माचरणचोदकजनकपञ्चशिखसंवादानुवादः।। 1।।

युधिष्ठिर उवाच।	12-324-1x
ऐश्वर्यं वा महत्प्राप्य धनं वा भरतर्षभ। दीर्घमायुरवाप्याथ कथं मृत्युमतिक्रमेत्।।	12-324-1a 12-324-1b
तपसा वा सुमहता कर्मणा वा श्रुतेन वा। रसायनप्रयोगैर्वा कैर्नाप्नोति जरान्तकौ।।	12-324-2a 12-324-2b
भीष्म उवाच।	12-324-3x
अत्राप्युदाहरन्तीममितिहासं पुरातनम्। भिक्षोः पञ्चशिखस्येह संवादं जनकस्य च।।	12-324-3a 12-324-3b
वैदेहो जनको राजा महर्षि वेदवित्तमम्। यर्यपृच्छत्पञ्चशिखं छिन्नधर्मार्थसंशयम्।।	12-324-4a 12-324-4b
केन वृत्तेन भगवन्नतिक्रामेज्जरान्तकौ। तपसा वाऽथवा बुद्ध्या कर्मणा वा श्रुतेन वा।।	12-324-5a 12-324-5b
एवमुक्तः स वैदेहं प्रत्युवाचापरेक्षवित्। निवृत्तिर्नैतयोरस्ति नातिवृत्तिः कथंचन।।	12-324-6a 12-324-6b
न ह्यहानि निवर्तन्ते न मासा न पुनः क्षपाः। सोयं प्रपद्यतेऽध्वानं चिराय ध्रुवमध्रुवः।।	12-324-7a 12-324-7b
सर्वभूतसमुच्छेदः स्रोतसेवोह्यते सदा। ऊह्यमानं निमज्जन्तमप्लवे कालसागरे।।	12-324-8a 12-324-8b
जरामृत्युमहाग्राहे न कश्चिदतिवर्तते। नैवास्य कश्चिद्भवति नासौ भवति कस्यचित्।।	12-324-9a 12-324-9b
पथि संगतमेवेदं दारैरन्यैश्च बन्धुभिः। नायमत्यन्तसंवासो लब्धपूर्वो हि केनचित्।।	12-324-10a 12-324-10b
क्षिप्यन्ते तेनतेनैव निष्टनन्तः पुनः पुनः। कालेन जाता याता हि वायुनेवाभ्रसंचयाः।।	12-324-11a 12-324-11b
जरामृत्यू हि भूतानां खादितारौ वृकाविव। बलिनां दुर्बलानां च ह्रस्वानां महतामपि।।	12-324-12a 12-324-12b
एवंभूतेषु भूतेषु नित्यभूताध्रवेषु च। कथं हि हृष्येज्जातेषु मृतेषु च न संज्वरेत्।।	12-324-13a 12-324-13b
कुतोऽहमागतः कोऽस्मि क्व गमिष्यामि कस्य वा। कस्मिन्स्थितः क्व भविता कस्मात्किमनुशोचसि।।	12-324-14a 12-324-14b
द्रष्टा स्वर्गस्य न ह्यस्ति तथैव नरकस्य च। आगमास्त्वनतिक्रम्य दद्याच्चैव यजेत च।।	12-324-15a 12-324-15b
।। इति श्रीमन्महाभारते शान्तिपर्वणि मोक्षधर्मपर्वणि चतुविंशत्यधिकत्रिशततमोऽध्यायः।। 324।।

12-324-14 कुतस्त्वमागतः क्वासि त्वं गमिष्यसि कस्यवेति ड. पाठः।।

शांतिपर्व-323

पुटाग्रे अल्लिखितम्।

शांतिपर्व-325