महाभारतम्-12-शांतिपर्व-030

महाभारतम्
द्वादशपर्व
महाभारतम्-12-शांतिपर्व-030
वेदव्यासः

नारदेन युधिष्ठिरंप्रति सुवर्णष्ठीविचरितवर्णनम्।। 1।।

वैशंपायन उवाच।	12-30-1x
ततो राजा पाण्डुसुतो नारदं प्रत्यभाषत। भगवञ्छ्रोतुमिच्छामि सुवर्णष्ठीविसंभवम्।।	12-30-1a 12-30-1b
एवमुक्तस्तु स मुनिर्धर्मराजेन नारदः। आचचक्षे यथावृत्तं सुवर्णष्ठीविनं प्रति।।	12-30-2a 12-30-2b
नारद उवाच।	12-30-3x
एवमेतन्महाबाहो यथाऽयं केशवोऽब्रवीत्। कार्यस्यास्य तु यच्छेषं तत्ते वक्ष्यामि पृच्छतः।।	12-30-3a 12-30-3b
अहं च पर्वतश्चैव स्वस्रीयो मे महाप्नुनिः। वस्तुकामावभिगतौ सृञ्जयं जयतां वरम्।।	12-30-4a 12-30-4b
तत्रावां पूजितौ तेन विधिदृष्टेन कर्मणा। सर्वकामैः सुविहितौ निवसावोऽस्य वेश्मनि।।	12-30-5a 12-30-5b
व्यतिक्रान्तासु वर्षासु समये गमनस्य च। पर्वतो मामुवाचेदं काले वचनमर्थवत्।।	12-30-6a 12-30-6b
आवामस्य नरेन्द्रस्य गृहे परमपूजितौ। उषितौ समये ब्रह्मंस्तद्विचिन्तय सांप्रतम्।।	12-30-7a 12-30-7b
ततोऽहमब्रुवं राजन्पर्वतं सुभदर्शनम्। सर्वमेतत्त्वयि विभो भागिनेयोपपद्यते।।	12-30-8a 12-30-8b
वरेण च्छन्द्यतां राजा लभतां यद्यदिच्छति। आवयोस्तपसा सिद्धिं प्राप्नोतु यदि मन्यसे।।	12-30-9a 12-30-9b
तत आहूय राजानं सृञ्जयं जयतां वरम्। पर्वतोऽनुमतो वाक्यमुवाच कुरुपुङ्गव।।	12-30-10a 12-30-10b
प्रीतौ स्वो नृप सत्कारैर्भवदार्जवसंभृतैः। आवाभ्यामभ्यनुज्ञातो वरं नृवर चिन्तय।।	12-30-11a 12-30-11b
देवानामविहिंसायां न भवेन्मानुषे क्षमम्। तद्गृहाण महाराज पूजार्हो नौ मतो भवान्।।	12-30-12a 12-30-12b
सृञ्जय उवाच।	12-30-13x
प्रीतौ भवन्तौ यदि मे कृतमेतावता मम। एष एव परो लाभो निर्वृत्तो मे महाफलः।।	12-30-13a 12-30-13b
तमेवंवादिनं भूयः पर्वतः प्रत्यभाषत। शृणु राजन्सुसंकल्पं यत्ते हृदि चिरं स्थितम्।।	12-30-14a 12-30-14b
अभीप्ससि सुतं वीरं वीर्यवन्तं दृढव्रतम्। आयुष्मतं महाभागं देवराजसमद्युतिम्।।	12-30-15a 12-30-15b
भविष्यत्येष ते कामो न त्वायुष्मान्भविष्यति। देवराजाभिभूत्यर्थं संकल्पो ह्ये ते हृदि।।	12-30-16a 12-30-16b
सुवर्णष्ठीवनाच्चैव स्वर्णष्ठीवी भविष्यति। रक्ष्यश्च देवराजात्स देवराजसमद्युतिः।।	12-30-17a 12-30-17b
तच्छ्रुत्वा सृञ्जयो वाक्यं पर्वतस्य महात्मनः। प्रसादयामास तदा नैतदेवं भवेदिति।।	12-30-18a 12-30-18b
आयुष्मान्मे भवेत्पुत्रो भवतोस्तपस मुन। न च तं पर्वतः किंचिदुवाचेन्द्रव्यपेक्षया।।	12-30-19a 12-30-19b
तमहं नृपतिं दीनमब्रवं पुनरेव च। स्मर्तव्योऽस्मि महाराज दर्शयिष्यामि ते सुतम्।।	12-30-20a 12-30-20b
अहं ते दयितं पुत्रं प्रेतराजवशं गतम्। पुनर्दास्यामि तद्रूपं मा शुचः पृथिवीपते।।	12-30-21a 12-30-21b
एवमुक्त्वा तु नृपतिं प्रयातौ स्वो यथेप्सितम्। सृञ्जयश्च यथाकामं प्रविवेश स्वमन्दिरम्।।	12-30-22a 12-30-22b
सृञ्जयस्याथ राजर्षेः कस्मिंश्चित्कालपर्यये। जज्ञे पुत्रो महावीर्यस्तेजसा प्रज्वलन्निव।।	12-30-23a 12-30-23b
ववृधे स यथाकालं सरसीव महोत्पलम्। बभूव काञ्चनष्ठीवी यथार्थं नाम तस्य तत्।।	12-30-24a 12-30-24b
तदद्भुततमं लोके पप्रथे कुरुसत्तम। बुबुधे तच्च देवेन्द्रो वरदानं मनीषिणोः।।	12-30-25a 12-30-25b
ततः स्वाभिभवाद्भीतो बृहस्पतिमते स्थितः। कुमारस्यान्तरप्रेक्षी नित्यमेवाभ्यवर्तत।।	12-30-26a 12-30-26b
चोदयामास तद्वज्रं दिव्यास्रं मूर्तिमत्स्थ्रितम्। व्याघ्रो भूत्वा जहीमं त्वं राजपुत्रमिति प्रभो।।	12-30-27a 12-30-27b
प्रवृद्धः किल वीर्येण मामेषोऽभिभविष्यति। सृञ्जयस्य सुतो वज्र यथैनं पर्वतोऽब्रवीत्।।	12-30-28a 12-30-28b
एवमुक्तस्तु शक्रेण वज्रः परपुरंजयः। कुमारमन्तरप्रेक्षी नित्यमेवान्वपद्यत।।	12-30-29a 12-30-29b
सृञ्जयोऽपि सुतं प्राप्य देवराजसमद्युतिम्। हृष्टः सान्तः पुरो राजा वननित्यो बभूव ह।।	12-30-30a 12-30-30b
ततो भागीरथीतीरे कदाचिन्निर्जने वने। धात्रीद्वितीयो बालः स क्रीडार्थं पर्यधावत।।	12-30-31a 12-30-31b
पञ्चवर्षकदेशीयो बालो नागेन्द्रविक्रमः। सहसोत्पतितं व्याघ्रमाससाद महाबलम्।।	12-30-32a 12-30-32b
स बालस्तेन निष्पिष्टो वेपमानो नृपात्मजः। व्यसुः पपात मेदिन्यां ततो धात्री विचुक्रुशे।।	12-30-33a 12-30-33b
हत्वा तु राजपुत्रं स तत्रैवान्तरधीयत। शार्दूलो देवराजस्य माययान्तर्हितस्तदा।।	12-30-34a 12-30-34b
धात्र्यास्तु निनदं श्रुत्वा रुदत्याः परमार्तवत्। अभ्यधावत तं देशं स्वयमेव महीपतिः।।	12-30-35a 12-30-35b
स ददर्श शयानं तं गतासुं पीतशोणितम्। कुमारं विगतानन्दं निशाकरमिव च्युतम्।।	12-30-36a 12-30-36b
स तमुत्सङ्गमारोप्य परिपीडितवक्षसम्। पुत्रं रुधिरसंसिक्तं पर्यदेवयदातुरः।।	12-30-37a 12-30-37b
ततस्ता मातरस्तस्य रुदत्यः शोककर्शिताः। अभ्यधावन्त तं देशं यत्र राजा स सृञ्जयः।।	12-30-38a 12-30-38b
ततः स राजा सस्मार मामेव गतमानसः। तदाऽहं चिन्तनं ज्ञात्वा गतवांस्तस्य दर्शनम्।।	12-30-39a 12-30-39b
मयैतानि च वाक्यानि श्रावितः शोकलालसः। यानि ते यदुवीरेण कथितानि महीपते।।	12-30-40a 12-30-40b
संजीवितश्चापि पुनर्वासवानुमते तदा। भवितव्यं तथा तच्च न तच्छक्यमतोऽन्यथा।।	12-30-41a 12-30-41b
तत ऊर्ध्वं कुमारस्तु स्वर्णष्ठीवी महायशाः। चित्तं प्रसादयामास पितृर्मातुश्च वीर्यवान्।।	12-30-42a 12-30-42b
कारयामास राज्यं च पितरि स्वर्गते नृप। वर्षाणां शतमेकं च सहस्रं भीमविक्रमः।।	12-30-43a 12-30-43b
तत ईजे महायज्ञैर्बहुभिर्भूरिदक्षिणैः। तर्पयामास देवांश्च पितॄंश्चैव महाद्युतिः।।	12-30-44a 12-30-44b
उत्पाद्य च बहून्पुत्रान्कुलसतानकारिणः। कालेन महता राजन्कालधर्ममुपेयिवान्।।	12-30-45a 12-30-45b
स त्वं राजेन्द्र संजातं शोकमेकं निवर्तय। यथा त्वं केशवः प्राह व्यामश्च सुमहातपाः।।	12-30-46a 12-30-46b
पितृपैतामहं राज्यमास्थाय धुरमुद्वह। इष्ट्वा पुण्यैर्महायज्ञैरिष्टं लोकमवाप्स्यसि।।	12-30-47a 12-30-47b
।। इति श्रीमन्महाभारते शान्तिपर्वणि राजधर्मपर्वणि त्रिंशोऽध्यायः।। 30।।*

द्रोणपर्वणि स्वर्णष्ठीविचरितमन्यादृशमत्र पर्वणित्वन्यादृशम्।

12-30-7 सांप्रतं कल्याणम्।। 12-30-12 न भवेन्मानुषक्षयमिति झ. पाठः। तत्र येन देवपीडा मनुष्यक्षयश्च न भवति तत्तादृशं वरं गृहाणेति भावः।। 12-30-16 देवराजविभूत्यर्थमिति ड. पाठः।।

शांतिपर्व-029

पुटाग्रे अल्लिखितम्।

शांतिपर्व-031