महाभारतम्-12-शांतिपर्व-255

महाभारतम्
द्वादशपर्व
महाभारतम्-12-शांतिपर्व-255
वेदव्यासः

भीष्मेण युधिष्ठिरंप्रति ज्ञानादिप्रशंसापरव्यासवाक्यानुवादः।। 1।।

व्यास उवाच।	12-255-1x
सृजते त्रिगुणान्सत्वं क्षेत्रज्ञस्त्वधितिष्ठति। गुणान्विक्रियते सर्वानुदासीनवदीश्वरः।।	12-255-1a 12-255-1b
स्वभावयुक्तं तत्सत्वं यदिमान्सृजते गुणान्। ऊर्णनाभिर्यथा सूत्रं सृजते तन्तुवद्गुणान्।।	12-255-2a 12-255-2b
प्रध्वस्ता न निवर्तन्ते प्रवृत्तिर्नोपलभ्यते। एवमेके व्यवस्यन्ति निवृत्तिरिति चापरे।।	12-255-3a 12-255-3b
उभयं संप्रधार्यैतदध्यवस्येद्यथामति। अनेनैव विधानेन भवेद्गर्भशयो महान्।।	12-255-4a 12-255-4b
अनादिनिधनं नित्यं तं बुद्ध्वा विचरेन्नरः। अक्रुध्यन्नप्रहृष्यंश्च नित्यं विगतमत्सरः।।	12-255-5a 12-255-5b
इत्येवं हृदयग्रन्थिं बुद्धिचिन्तामयं दृढम्। अतीत्य सुखमासीत अशोचंश्छिन्नसंशयः।।	12-255-6a 12-255-6b
ताम्येयुः प्रच्युताः पृथ्व्यां यथा पूर्णां नदीं नराः। अवगाढा ह्यविद्वांसो विद्धि लोकमिमं तथा।।	12-255-7a 12-255-7b
न तु ताम्यति वै विद्वान्स्थले चरति तत्त्ववित्। एवं यो विन्दतेऽऽत्मानं केवलं ज्ञानमात्मनः।।	12-255-8a 12-255-8b
एवं बुद्ध्वा नरः सर्वं भूतानामागतिं गतिम्। समवेक्ष्य च वैषम्यं लभते शममुत्तमम्।।	12-255-9a 12-255-9b
एतद्वै जन्मसामर्थ्यं ब्राह्मणस्य विशेषतः। आत्मज्ञानं शमश्चैव पर्याप्तं तत्परायणम्।।	12-255-10a 12-255-10b
एतद्बुद्ध्वा भवेद्बुद्धः किमन्यद्बुद्धलक्षणम्। विज्ञायैतद्विमुच्यन्ते कृतकृत्या मनीषिणः।।	12-255-11a 12-255-11b
न भवति विदुषां महद्भयं यदविदुषां सुमहद्भयं परत्र। न हि गतिरधिकाऽस्ति कस्यचि द्भवति हि या विदुषः सनातनी।।	12-255-12a 12-255-12b 12-255-12c 12-255-12d
लोकमातुरमसूयते जन स्तत्तदेव च निरीक्ष्य शोचते। तत्र पश्य कुशलानशोचतो ये विदुस्तदुभयं कृताकृतम्।।	12-255-13a 12-255-13b 12-255-13c 12-255-13d
यत्करोत्यनभिसन्धिपूर्वकं तच्च निर्णुदति --- न प्रियं तदुभयं न चाप्रिय तस्य तज्जनयतीह कुर्वतः।।	12-255-14a 12-255-14b 12-255-14c 12-255-14d
।। इति श्रीमन्महाभारते शान्तिपर्वणि मोक्षधर्मपर्वणि पञ्चपञ्चाशदधिकद्विशततमोऽध्यायः।। 255।।

12-255-2 ऊर्णनाभिर्यथा सत्वमिति ट. ड. पाठः।। 12-255-7 नात्येयुः प्रच्युता इति ध. पाठः।।

शांतिपर्व-254

पुटाग्रे अल्लिखितम्।

शांतिपर्व-256