महाभारतम्-01-आदिपर्व-246
| ← आदिपर्व-245 | महाभारतम् प्रथमपर्व महाभारतम्-01-आदिपर्व-246 वेदव्यासः |
आदिपर्व-247 → |
अर्जुनेन सुभद्रायाः गोपीवेषेण द्रौपदीसमीपप्रेषणम्।। 1 ।।
कृतनतिं सुभद्रांप्रति पृथाद्रौपदीभ्यां आशीर्वादः।। 2 ।।
स्वपुरं प्रविष्टेनार्जुनेन भ्रातृश्यः स्वकृततीर्थयात्रावृत्तान्तकथनम्।। 3 ।।
| वैशंपायन उवाच। | 1-246-1x |
|
क्रोशणात्रे पुरस्यासीद्गोष्ठं पार्थस्य शोभनम्। तत्रापि यात्वा बीभत्सुर्निविष्टो यदुकन्यया।। | 1-246-1a 1-246-1b |
|
ततः सुभद्रां सत्कृत्य पार्थो वचनमब्रवीत्। गोपिकानां तु वेषेण गच्छ त्वं वृजिनं पुरम्।। | 1-246-2a 1-246-2b |
|
कामव्याहारिणी कृष्णा रोचतां ते वचो मम। दृष्ट्वा तु परुषं ब्रूयात्सह तत्र मयागताम्।। | 1-246-3a 1-246-3b |
|
अन्यवेषेण तु गतां दृष्ट्वा सा त्वां प्रियं वदेत्। यत्तु सा प्रथमं ब्रूयान्न तस्यास्ति निवर्तनम्।। | 1-246-4a 1-246-4b |
|
तस्मान्मानं च दर्पं च व्यपनीय स्वयं व्रज। तस्य तद्वचनं श्रुत्वा सुभद्रा प्रत्यभाषत।। | 1-246-5a 1-246-5b |
|
एवमेतत्करिष्यामि यथा त्वं पार्थ भाषसे। सुभद्रावचनं श्रुत्वा सुप्रीतः पाकशासनिः।। | 1-246-6a 1-246-6b |
|
गोपालान्स समानीय त्वरितो वाक्यमब्रवीत्। तरुम्यः सन्ति यावन्त्यस्ताः सर्वा व्रजयोषितः।। | 1-246-7a 1-246-7b |
|
आगच्छन्तु गमिष्यन्त्या भद्रया सह सङ्गताः। इन्द्रप्रस्थं पुरवरं कृष्णां द्रष्टुं यशस्विनीम्।। | 1-246-8a 1-246-8b |
|
एतच्छ्रुत्वा तु गोपालैरानीता व्रजयोषितः। ततस्ताभिः परिवृतां व्रजस्त्रीभिः समन्ततः।।' | 1-246-9a 1-246-9b |
|
सुभद्रां त्वरमाणश्च रक्तकौशेयवासिनीम्। पार्थः प्रस्थापयामास कृत्वा गोपालिकावपुः।। | 1-246-10a 1-246-10b |
|
साऽधिकं तेन रूपेण शोभमाना यशस्विनी। `गोपालिकामध्यगता प्रययौ वृजिनं पुरम्।। | 1-246-11a 1-246-11b |
|
त्वरिता खाण्डवप्रस्थमाससाद विवेश च।' भवनं श्रेष्ठमासाद्य वीरपत्नी वराङ्गना।। | 1-246-12a 1-246-12b |
|
ववन्दे पृथुताम्राक्षी पृथां भद्रा पितृष्वसाम्। तां कुन्ती चारुसर्वाङ्गीमुपाजिघ्रत मूर्धनि।। | 1-246-13a 1-246-13b |
|
प्रीत्या परमया युक्ता आशीर्भिर्युञ्जताऽतुलाम्। ततोऽभिगम्य त्वरिता पूर्णेन्दुसदृशानना।। | 1-246-14a 1-246-14b |
|
ववन्दे द्रौपदीं भद्रा प्रेष्याऽहमिति चाब्रवीत्। प्रत्युत्थाय तदा कृष्णा स्वसारं माधवस्य च।। | 1-246-15a 1-246-15b |
|
परिष्वज्यावदत्प्रीत्या निःसपत्नोस्तु ते पतिः। `वीरसूर्भव भद्रे त्वं भव भर्तृप्रिया तथा।। | 1-246-16a 1-246-16b |
|
ओजसा निर्मिता बह्वीरुवाच परमाशिषः।' तथैव मुदिता भद्रा तामुवाच तथास्त्विति।। | 1-246-17a 1-246-17b |
|
`ततः सुभद्रां वार्ष्णेयी परिष्वज्य शुभाननाम्। अङ्के निवेश्य मुदिता वसुदेवं प्रशस्य च।। | 1-246-18a 1-246-18b |
|
ततः किलकिलाशब्दः क्षणेन समपद्यत। हर्षादानर्तयोधानामासाद्य वृजिनं पुरम्।। | 1-246-19a 1-246-19b |
|
देवपुत्रप्रकाशास्ते जाम्बूनदमयध्वजाः। पृष्ठतोऽनुययुः पार्थं पुरुहूतमिवामराः।। | 1-246-20a 1-246-20b |
|
गोभिरुष्ट्रैः सदश्वैश्च युक्तानि बहुला जनाः। ददृशुर्यानमुख्यानि दाशार्हपुरवासिनाम्।। | 1-246-21a 1-246-21b |
|
ततः पुरवरे यूनां पुंसां वाच उदीरिताः। अर्जुने प्रतियाति स्म अश्रूयन्त समन्ततः।। | 1-246-22a 1-246-22b |
|
प्रवासादागतं पार्थं दृष्ट्वा स्वमिव बान्धवम्। सोऽभिगम्य नरश्रेष्ठो दाशार्हशतसंवृतः। | 1-246-23a 1-246-23b |
|
पौरैः पुरवरं प्रीत्या परया चाभिनन्दितः। प्राप्य चान्तःपुरद्वारमवरुह्य नरर्षभः।। | 1-246-24a 1-246-24b |
|
ववन्दे धौम्यमासाद्य मातरं च धनञ्जयः। स्पृष्ट्वा च चरणौ राज्ञो भीमस्य च धनञ्जयः।। | 1-246-25a 1-246-25b |
|
यमाभ्यां वन्दितो हृष्टः सस्वजे तौ ननन्द च। ब्राह्मणप्रमुखान्सर्वान्भ्रातृभिः सह सङ्गतः।। | 1-246-26a 1-246-26b |
|
यथार्हं मानयामास पौरजानपदानपि। तत्रस्थान्यनुयातानि तीर्थान्यायतनानि च।। | 1-246-27a 1-246-27b |
|
निवेदयामास तदा राज्ञे सर्वं स्वनुष्ठितम्। भ्रातृभ्यश्चैव सर्वेभ्यः कथयामास भारत।। | 1-246-28a 1-246-28b |
|
श्रुत्वा सर्वं महाप्राज्ञो धर्मराजो युधिष्ठिरः। पुरस्तादेव तेषां तु पूजयामास चार्जुनम्।। | 1-246-29a 1-246-29b |
|
पाण्डवेन यथार्हं तु पूजार्हेण सुपूजितः। न्यविशच्चाभ्यनुज्ञातो राज्ञा तुष्टो यशस्विना।। | 1-246-30a 1-246-30b |
|
तामदीनां सुपूजार्हां सुभद्रां प्रीतिवर्धिनीम्। साक्षाच्छ्रियममन्यन्त पार्थाः कृष्णसहोदराम्।। | 1-246-31a 1-246-31b |
|
गुरूणां श्वशुराणां च देवराणां तथैव च। सुभद्रा स्वेन वृत्तेन बभूव परमप्रिया।।' | 1-246-32a 1-246-32b |
|
ततस्ते हृष्टमनसः पाण्डवेया महारथाः। कुन्ती च परमप्रीता कृष्णा च सततं तथा।। | 1-246-33a 1-246-33b |
|
।। इति श्रीमन्महाभारते आदिपर्वणि हरणाहरणपर्वणि षट्चत्वारिंशदधिकद्विशततमोऽध्यायः।। 246 ।। |
| आदिपर्व-245 | पुटाग्रे अल्लिखितम्। | आदिपर्व-247 |