महाभारतम्-01-आदिपर्व-184
| ← आदिपर्व-183 | महाभारतम् प्रथमपर्व महाभारतम्-01-आदिपर्व-184 वेदव्यासः |
आदिपर्व-185 → |
प्रस्थानसमयागते व्यासेन पाण्डवान्प्रति द्रौपदीवृत्तान्तकथनपूर्वकं भविष्यद्द्रौपदीलाभकथनम्।। 1 ।।
व्यासस्य प्रतिनिवर्तनम्।। 2 ।।
| वैशंपायन उवाच। | 1-184-1x |
|
वसत्सु तेषु प्रच्छन्नं पाण्डवेषु महात्मसु। आजगामाथ तान्द्रष्टुं व्यासः सत्यवतीसुतः।। | 1-184-1a 1-184-1b |
|
तमागतमभिप्रेक्ष्य प्रत्युद्गम्य परन्तपाः। प्रणिपत्याभिवाद्यैनं तस्थुः प्राञ्जलयस्तदा।। | 1-184-2a 1-184-2b |
|
समनुज्ञाप्य तान्सर्वानासीनान्मुनिरब्रवीत्। प्रच्छन्नं पूजितः पार्थैः प्रीतिपूर्वमिदं वचः।। | 1-184-3a 1-184-3b |
|
अपि धर्मेण वर्तध्वं शास्त्रेण च परन्तपाः। अपि विप्रेषु पूजा वः पूजार्हेषु न हीयते।। | 1-184-4a 1-184-4b |
|
अथ धर्मार्थवद्वाक्यमुक्त्वा स भगवानृषिः। विचित्राश्च कथास्तास्ताः पुनरेवेदमब्रवीत्।। | 1-184-5a 1-184-5b |
|
आसीत्तपोवने काचिदृषेः कन्या महात्मनः। विलग्नमध्या सुश्रोणी सुभ्रूः सर्वगुणान्विता।। | 1-184-6a 1-184-6b |
|
कर्मभिः स्वकृतैः सा तु दुर्भगा समपद्यत। नाध्यगच्छत्पतिं सा तु कन्या रूपवती सती।। | 1-184-7a 1-184-7b |
|
तपस्तप्तुमथारेभे पत्यर्थमसुखा ततः। तोषयामास तपसा सा किलोग्रेण शङ्करम्।। | 1-184-8a 1-184-8b |
|
तस्याः स भगवांस्तुष्टस्तामुवाच यशस्विनीम्। वरं वरय भद्रं ते वरदोऽस्मीति शङ्करः।। | 1-184-9a 1-184-9b |
|
अथेश्वरमुवाचेदमात्मनः सा वचो हितम्। पतिं सर्वगुणोपेतमिच्छामीति पुनःपुनः।। | 1-184-10a 1-184-10b |
|
तामथ प्रत्युवाचेदमीशानो वदतां वरः। पञ्च ते पतयो भद्रे भविष्यन्तीति भारताः।। | 1-184-11a 1-184-11b |
|
एवमुक्ता ततः कन्या देवं वरदमब्रवीत्। एकमिच्छाम्यहं देव त्वत्प्रसादात्पतिं प्रभो।। | 1-184-12a 1-184-12b |
|
पुनरेवाब्रवीद्देव इदं वचनमुत्तमम्। पञ्चकृत्वस्त्वया ह्युक्तः पतिं देहीत्यहं पुनः।। | 1-184-13a 1-184-13b |
| देहमन्यं गतायास्ते यथोक्तं तद्भविष्यति। | 1-184-14a |
| व्यास उवाच। | 1-184-14x |
| द्रुपदस्य कुले जज्ञे सा कन्या देवरूपिणी।। | 1-184-14b |
|
निर्दिष्टा भवतां पत्नी कृष्णा पार्षत्यनिन्दिता। पाञ्चालनगरे तस्मान्निवसध्वं महाबलाः। सुखिनस्तामनुप्राप्य भविष्यथ न संशयः।। | 1-184-15a 1-184-15b 1-184-15c |
|
एवमुक्त्वा महाभागः पाण्डवान्स पितामहः। पार्थानामन्त्र्य कुन्तीं च प्रातिष्ठत महातपाः।। | 1-184-16a 1-184-16b |
|
।। इति श्रीमन्महाभारते आदिपर्वणि चैत्ररथपर्वणि चतुरशीत्यधिकशततमोऽध्यायः।। 184 ।। |
1-184-6 विलग्नमध्या विलग्नं समदेशे शयने भूतलास्पृष्टं मध्यं शरीरमध्यभागो यस्याः सा कृशमध्येति यावत्।। चतुरशीत्यधिकशततमोऽध्यायः।। 184 ।।
| आदिपर्व-183 | पुटाग्रे अल्लिखितम्। | आदिपर्व-185 |