महाभारतम्-07-द्रोणपर्व-181
| ← द्रोणपर्व-180 | महाभारतम् सप्तमपर्व महाभारतम्-07-द्रोणपर्व-181 वेदव्यासः |
द्रोणपर्व-182 → |
|
घटोत्कचनिधनात्सर्वेषु शोचत्सु हर्षादात्मानं परिष्वजमानं कृष्णं प्रत्यर्जुनेन हर्षङेतुप्रश्नः।। 1 ।। कृष्णेन तदभिधानपूर्वकं कर्णप्रभावप्रशंसनम्।। 2 ।।
धृतराष्ट्र उवाच।
तस्मिन्हते महामाये महातेजसि राक्षसे।
अमर्षिताः पाण्डवेयाः किमकुर्वन्महारणे।। 5-181-1a
मर्दिताश्च भृशं युद्धे किमकुर्वन्त सञ्जय।। 5-181-2a
ये च तेऽभ्यद्रवन्द्रोणं व्यूढानीकं प्रहारिणः।
सृञ्जयाः सह पाञ्चालैस्तेऽरुर्वन्किं महारणे।। 5-181-3a
सौमदत्तिवधाद्द्रोणमायत्तं सैन्धवस्य च।
अमर्षाज्जीवितं त्यक्त्वा गाहमानं वरूथिनीम्।। 5-181-4a
जृम्भमाणमिव व्याघ्रं व्यात्ताननमिवान्तकम्।
कथं प्रत्युद्ययुर्द्रोणमजय्यं कुरुसृञ्जयाः।। 5-181-5a
आचार्यं ये च रक्षन्ति दुर्योधनपुरोगमाः।
द्रौणिकर्णकृपास्तात ते ह्यकुर्वन्किमाहवे।। 5-181-6a
भारद्वाजं जिघांसन्तौ सव्यसाचिवृकोदरौ।
आर्च्छतां मामकान्युद्धे कथं सञ्जय शंस मे।। 5-181-7a
सिन्धुराजवधेनेमे घटोत्कचवधेन ते।
अमर्षिताश्च सङ्क्रुद्धा रणं चक्रुः कथं युधि'।। 5-181-8a
सञ्जय उवाच।
हैडिम्बिं निहतं दृष्ट्वा विशीर्णमिव पर्वतम्।
बभूवुः पाण्डवाः सर्वे शोकबाष्पाकुलेक्षणाः।। 5-181-9a
वासुदेवस्तु हर्षेण महताऽभिपरिप्लुतः।
ननाद सिंहवन्नादं व्यथयन्निव भारत।। 5-181-10a
हतं घटोत्कचं ज्ञात्वा वासुदेवः प्रतापवान्।
विनद्य च महानादं पर्यष्वजत फल्गुनम्।। 5-181-11a
स विनद्य महानादमभीशून्सन्नियम्य च।
ननर्त हर्षसंवीतो वातोद्धूत इव द्रुमः।। 5-181-12a
ततः परिष्वज्य पुनः पार्थमास्फोट्य चासकृत्।
रथोपस्थगतो धीमान्प्राणदत्पुनरच्युतः।। 5-181-13a
प्रहृष्टमनसं ज्ञात्वा वासुदेवं महाबलः।
अर्जुनोऽथाब्रवीद्राजन्नातिहृष्टमना इव।। 5-181-14a
अतिहर्षोऽयमस्थाने तवाद्य मधुसूदन।
शोकस्थाने तु सम्प्राप्ते हैडिम्बस्य वधेन तु।। 5-181-15a
विमुखानीह सैन्यानि हतं दृष्ट्वा घटोत्कचम्।
वयं च भृशमुद्विग्ना हेडिम्बेस्तु निपातनात्।। 5-181-16a
नैतत्कारणमल्पं हि भविष्यति जनार्दन।
तदद्य शंस मे पृष्टः सत्यं सत्यवतां वर।। 5-181-17a
यद्येतन्न रहस्यं ते वक्तुमर्हस्यरिन्दम।
धैर्यस्य विकृतिं ब्रूहि त्वमद्य मधुसूदन।। 5-181-18a
समुद्रस्येव संशोषं मेरोरिव विसर्पणम्।
तथैतदद्य मन्येऽहं तव कर्म जनार्दन।। 5-181-19a
वासुदेव उवाच।
अतिहर्षमिमं प्राप्तं शृणु मे त्वं धनञ्जय।
अतीव मनसः सद्यः प्रसादकरमुत्तमम्।। 5-181-20a
शक्तिं घटोत्कचेनेमां व्यंसयित्वा महाद्युते।
कर्णं निहतमेवाजौ विद्धि सद्यो धनञ्जय।। 5-181-21a
शक्तिहस्तं पुनः कर्णं को लोकेऽस्ति पुमानिह।
य एनमभितस्तिष्ठेत्कार्तिकेयमिवाहवे।। 5-181-22a
दिष्ट्याऽपनीतकवचो दिष्ट्याऽपहृतकुण्डलः।
दिष्ट्या सा व्यंसिता शक्तिरमोघाऽस्य घटोत्कचे।। 5-181-23a
यदि हि स्यात्सकवचस्तथैव स्यात्सकुण्डलः।
सामरानपि लोकांस्त्रीनेकः कर्णो जयेद्रणे।। 5-181-24a
वासवो वा कुबेरो वा वरुणो वा जलेश्वरः।
यमो वा नोत्सहेत्कर्णं रणे प्रतिसमासितुम्।। 5-181-25a
गाण्डीवमुद्यम्य भवांश्चक्रं चाहं सुदर्शनम्।
न शक्तौ स्वो रणे जेतुं तथायुक्तं नरर्षभम्।। 5-181-26a
त्वद्धितार्थं तु शक्रेण मायापहृतकुण्डलः।
विहीनकवचश्चायं कृतः परपुरञ्जयः।। 5-181-27a
उत्कृत्य कवचं यस्मात्कुण्डले विमले च ते।
प्रादाच्छक्राय वै कर्णस्तस्माद्वैकर्तनः स्मृतः।। 5-181-28a
आशिविष इव क्रुद्वः स्तम्भितो मन्त्रतेजसा।
तथाऽद्य भाति कर्णो मे शान्तज्वाल इवानलः।। 5-181-29a
यदाप्रभृति कर्णाय शक्तिर्दत्ता महात्मना।
वासवेन महाबाहो क्षिप्ता याऽसौ घटत्कचे।। 5-181-30a
कुण्डलाभ्यां निमायाथ दिव्येन कवचेन च।
तां प्राप्यामन्यत वृषा सततं त्वां हतं रणे।। 5-181-31a
एवं गतोऽपि शक्योऽयं हतुं नान्येन केनचित्।
ऋते त्वां पुरुषव्याघ्र शपे सत्येन चानघ।। 5-181-32a
ब्रह्मण्यः सत्यवादी च सपस्वी नियतव्रतः।
रिपुष्वपि दयावांश्च तस्मात्कर्णो वृषा स्मृतः।। 5-181-33a
युद्धशौण्डो महाबाहुर्नित्योद्यतशरासनः।
केसरीव वने नर्दन्मत्तमातङ्गयूथपान्।
विमर्दन्रथशार्दूलान्राजते रणमूर्धनिxxx।। 5-181-34a
मध्यंगत इवादित्यो यो न शक्यो निरीक्षितुम्।
त्वदीयैः पुरुषव्याघ्र योधमुख्यैर्महात्सभिः।। 5-181-35a
शरजालसहस्रांशुः शरदीव दिxxxx।। 5-181-36a
तपान्ते जलदो यद्वच्छरधाराः क्षरन्मुहुः।
दिव्यास्त्रजलदः कर्णः पर्जन्य इव वृष्टिमान्।। 5-181-37a
त्रिदशैरपि चास्यद्भिः शरवर्षं समन्ततः।
अशक्यस्तदयं जेतुं स्रवद्भिर्मांसशोणितम्।। 5-181-38a
कवचेन विहीनश्च कुण्डलाभ्यां च पाण्डव।
सोऽद्य मानुषतां प्राप्तो विमुक्तः शक्रदत्तया।। 5-181-39a
एको हि योगोऽस्य भवेद्वधाय
च्छिद्रे ह्येनं स्वप्रमत्तः प्रमत्तम्।
कृच्छ्रं प्राप्तं रथचक्रे विमग्ने
हन्याः पूर्वं त्वं तु संज्ञां विचार्य।। 5-181-40a
न ह्युद्यतास्त्रं युधि हन्यादजय्य--
मप्येकवीरो बलभित्सवज्रः।। 5-181-41a
जरासन्धश्चेदिराजो महात्मा
महाबाहुश्चैकलव्यो निषादः।
एकैकशो निहताः सर्व एते
योगैस्तैस्तैस्त्वद्धितार्थं मयैव।। 5-181-42a
अथापरे निहता राक्षसेन्द्रा
हिडिम्बकिर्मीरबकप्रधानाः।
अलायुधः परचक्रावमर्दी
घटोत्कचश्चोग्रकर्मा तरस्वी।। 5-181-43a
।। इति श्रीमन्महाभारते द्रोणपर्वणि घटोत्कचवधपर्वणि
चतुर्दशरात्रियुद्धे एकाशीत्यधिकशततमोऽध्यायः।। 181 ।।
5-181-18 धैर्यस्य वैकृतं इति झ. पाठे अस्मत्पक्षक्षयेण तव हर्षोऽस्मद्धैर्यविनाशक इत्यर्थखः।। 5-181-31 कुण्डलाभ्यां निमाय विनिमयं कृत्वा।। 5-181-33 वृषा धर्मप्रधानः।। 5-181-37 पर्जन्यइव वृष्टिमान्। नेता नेतृभिरस्यद्भिः शरवर्षाणि वर्षताम्। सोऽद्य मानुषतामित्यादि क.ट.ड.पाठः।। 5-181-181 एकाशीत्यधिकशततमोऽध्यायः।।
| द्रोणपर्व-180 | पुटाग्रे अल्लिखितम्। | द्रोणपर्व-182 |