मत्स्यपुराणम्/अध्यायः २८२
हेमहस्तिमहादानविधिवर्णनम्।
मत्स्य उवाच।
अथातः संप्रवक्ष्यामि हेमहस्तिरथं शुभम्।
यस्य प्रदानाद् भुवनं वैष्णवं याति मानवः ।। २८२.१
पुण्यां तिथिमथासाद्य तुला पुरष दानवत्।
विप्रवाचनकं कुर्याल् लोकेशावाहनं बुधः ।। २८२.२
ऋत्विक्मण्डपसम्भार भूषणाच्छादनादिकम्।
अत्राप्युपोषितस्तद्वद् ब्राह्मणैः सहभोजनम्।
कुर्यात् पुष्परथाकारं काञ्चनं मणिमण्डितम् ।। २८२.३
वलभीभिर्विचित्राभिश्चतुश्चक्र समन्वितम्।
कृष्णाजिने तिलद्रोणं कृत्वा संस्थापयेत् रथम् ।। २८२.४
लोकपालाष्टकोपेतं ब्रह्मार्कशिवसंयुतम्।
मध्ये नारायणोपतं लक्ष्मीपुष्टिसमन्वितम् ।। २८२.५
तथाष्टादश धान्यानि भाजनासनचन्दनैः।
दीपिकोपानहच्छत्र दर्पणं पादुकान्वितम् ।। २८२.६
ध्वजे तु गरुड़ं कुर्यात् कूबराग्रे विनायकम्।
नानाफलसामायुक्तमुपरिष्टाद्वितानकम् ।। २८२.7
कौशेयं पञ्चवर्णन्तु अम्लानकुसुमान्वितम्।
चतुर्भिः कलशैः सार्द्धं गौभिरष्टाभिरन्वितम् ।। २८२.8
चतुर्भिर्हेममातङ्गैः मुक्तादाम विभूषितैः।
स्वरूपतः करिभ्याञ्च युक्तं कृत्वा निवेदयेत् ।। २८२.9
कुर्यात् पञ्चपलादूर्ध्वमाभारादपि शक्तितः।
तथा मङ्गलशब्देन स्नापितो वेदपुङ्गवैः ।। २८२.१०
त्रिः प्रदक्षिणमावृत्य गृहीत कुसुमाञ्जलिः।
इममुच्चारयेन्मन्त्रं ब्राह्मणेभ्यो निवेदयेत् ।। २८२.११
नमो नमः शङ्करपद्मजार्क लोकेशविद्याधर वासुदेवैः।
त्वं सेव्यसे वेदपुराणयज्ञैः तेजोमयस्यन्दन पाहि तस्मात् ।। २८२.१२
यत्तत्पदं परमगुह्यतमं मुरारेर्ह्यानन्द हेतु गुण रूप विमुक्तमन्तः।
योगैकमानसदृशो मुनयः समाधौ पश्यन्ति तत्त्वमसि नाथ रथाधिरूढ़!।। २८२.१३
यस्मात्त्वमेव भवसागर संप्लुतानामानन्दभागमृतमध्वगपारपत्रम्।
तस्मादघौघशमनेन कुरु प्रसादञ्चामीकरे भरथ!माधव सम्प्रदानात् ।। २८२.१४
इत्थं प्रणम्य कनके भरथ प्रदानं यः कारयेत् सकलपापविमुक्तदेहः।
विद्याधरामरमुनीन्द्रगणाभिजुष्टं प्राप्नोत्यसौ पदमतीन्द्रियमिन्दुमौलेः ।। २८२.१५
कृतदुरितवितानप्रज्वलद्वह्निजाल व्यतिकरकृतदेहोद्वेगभाजोऽपि बन्धून्।
नयति स पितृपुत्रान् बान्धवानप्यशेषान् कृतगजरथदानाच्छाश्वतं सद्म विष्णोः ।। २८२.१६