नारदपुराणम्- पूर्वार्धः/अध्यायः ८५
सनत्कुमार उवाच ।।
वाग्देवता वतारोऽन्यः कालिकेति प्रकीर्तिता ।।
तस्या मन्त्रं प्रवक्ष्यामि भुक्तिमुक्तिप्रदं नृणाम् ।। ८५-१ ।।
सृष्टिक्रियान्विता शांतिर्बिद्वाढ्या च त्रिधा पुनः ।।
अरुणाक्ष्यादीपिका च बिंदुयुक्ता द्विधा ततः ।। ८५-२ ।।
मायाद्वयं ततः पश्चाद्दक्षिणे कालिके पदम् ।।
पुनश्च सप्तबीजानि स्वाहांतोऽयं मनूत्तमः ।। ८५-३ ।।
भैरवोऽस्य ऋषिश्छन्द उष्णिक्काली तु देवता ।।
बीजं मायादीर्घवर्त्म शक्तिरुक्ता मुनीश्वर ।। ८५-४ ।।
षड्दीर्धाढ्ये बीजेन विद्याया अंगमीरितम् ।।
मातृकार्णान्दश दश हृदये भुजयोः पदोः ।। ८५-५ ।।
विन्यस्य व्यापकं कुर्यान्मूलमंत्रेण साधकः ।।
शिरः कृपाणमभयं वरं हस्तैश्च बिभ्रतीम् ।। ८५-६ ।।
मुंडस्रङ्मस्तकां मुक्तकेशां पितृवनस्तिताम् ।।
सर्वालंकृतवर्णां च श्यामांगीं कालिकां स्मरेत् ।। ८५-७ ।।
एवं ध्यात्वा जपेल्लक्षं जुहुयादयुतं ततः ।।
प्रसूनैः करवीरोत्थैः पूजायंत्रमथोच्यते ।। ८५-८ ।।
विलिख्य पूर्वं षट्कोणं त्रिकोणत्रितयं ततः ।।
पद्ममष्टदलं बाह्ये भूपुरं तत्र पूजयेत् ।। ८५-९ ।।
जया च विजया चापि अजिता चापराजिता ।।
नित्या विलासिनी वापि दोग्ध्यघोरा च मंगला ।। ८५-१० ।।
पीठस्य शक्तयो मायात्मने हृत्पीठमंत्रकः ।।
शिवरूपशवश्थां च शिवाभिर्दिक्षु वेष्टिताम् ।। ८५-११ ।।
महाकालरतासक्तां ध्यात्वांगान्यर्चयेत्पुरा ।।
कालीं कपालिनीं कुल्लां कुरुकुल्लां विरोधिनीम् ।। ८५-१२ ।।
विप्रचित्तां च षट्कोणे नवकोणे ततोऽर्चयेत् ।।
उग्रामुष्णप्रभां दीप्तां नीलाधानां बलाकिकाम् ।। ८५-१३ ।।
मात्रां मुद्रां तथा मित्रां पूज्याः पत्रेषु मातरः ।।
पद्मस्यास्य सुयत्नेन ब्राह्मी नारायणीत्यपि ।। ८५-१४ ।।
माहेश्वरी च चामुंडा कौमारी चापराजिता ।।
वाराही नारसिंहा च पुनरेतास्तु भूपुरे ।। ८५-१५ ।।
भैरवीं महदाद्यां तां सिंहाद्यां धूम्रपूर्विकाम् ।।
भीमोन्मत्तादिकां चापि वशीकरणभैरवीम् ।। ८५-१६ ।।
मोहनाद्यां समाराध्य शक्रादीन्यायुधान्यपि ।।
एवमाराधिता काली सिद्धा भवति मंत्रिणाम् ।। ८५-१७ ।।
ततः प्रयोगान्कुर्वीत महाभैरवभाषितान् ।।
आत्मनो वा परस्यार्थं क्षिप्रसिद्धिप्रदायकान् ।। ८५-१८ ।।
स्त्रीणां प्रहारं निंदां च कौटिल्यं वाप्रियं वचः ।।
आत्मनो हितमन्विच्छन् कालीभक्तो विवर्जयेत् ।। ८५-१९ ।।
सुदृशो मदनावासं पश्यन्यः प्रजपेन्मनुम् ।।
अयुतं सोऽचिरादेव वाक्पपतेः समतामियात् । ८५-२० ।।
दिगम्बरो मुक्तकेशः श्मशानस्थोऽधियामिनि ।।
जपेद्योऽयुतमेतस्य भवेयुः सर्वसिद्धयः ।। ८५-२१ ।।
शवस्य हृदये स्थित्वा निर्वासाः प्रेतभूमिगः ।।
अर्कपुष्पसहस्रेणाभ्यक्तेन स्वीयरेतसा ।। ८५-२२ ।।
देवीं यः पूजयेद्भक्त्या जपन्नेकैकशो मनुम् ।।
सोऽचरेणैव कालेन धरणीप्रभुतां व्रजेत् ।। ८५-२३ ।।
रजः कीर्णं भगं नार्या ध्यायन्यो ह्ययुतं जपेत् ।।
सकवित्वेन रम्येण जनान्मोहयति ध्रुवम् ।। ८५-२४ ।।
त्रिपञ्चारे महापीठे शिवस्य हृदि संस्थिताम् ।।
महाकालेन देवेन मारयुद्धं प्रकुर्वतीम् ।। ८५-२५ ।।
तां ध्यायन्स्मेरवदनां विदधत्सुरतं स्वयम् ।।
जपेत्सहस्रमपि यः स शंकरसमो भवेत् ।। ८५-२६ ।।
अस्थिलोमत्वचायुक्तं मांसं मार्जारमेषयोः ।।
उष्ट्रस्य महिषस्यापि बलिं यस्तु समर्पयेत् ।। ८५-२७ ।।
भूताष्टम्योर्मध्यरात्रे वश्याः स्युस्तस्य जन्तवः ।
विद्यालक्ष्मीयशःपुत्रैः स चिरं सुखमेधते ।। ८५-२८ ।।
यो हविष्याशनरतो दिवा देवीं स्मरन् जपेत् ।।
नक्तं निधुवनासक्तो लक्षं स स्याद्धरापतिः ।। ८५-२९ ।।
रक्तांभोजैर्हुनेन्मंत्री धनैर्जयति वित्तपम् ।।
बिल्वपत्रैर्भवेद्राज्यं रक्तपुष्पैर्वशीकृतिः ।। ८५-३० ।।
असृजी महिषादीनां कालिकां यस्तु तर्पयेत् ।।
तस्य स्युरचिरादेव करस्थाः सर्वसिद्धयः ।। ८५-३१ ।।
यो लक्षं प्रजपेन्मन्त्रं शवमारुह्य मन्त्रवित् ।।
तस्य सिद्धो मनुः सद्यः सर्वेप्सितफलप्रदः ।। ८५-३२ ।।
तेनाश्वमेधप्रमुखैर्यागौरिष्टं सुजन्मना ।।
दत्तं दानं तपस्तप्तं उपास्ते यस्तु कालिकाम् ।। ८५-३३ ।।
ब्रह्मा विष्णुः शिवो गौरी लक्ष्मीर्गणपती रविः ।।
पूजिताः सकला देवा यः कालीं पूजयेत्सदा ।। ८५-३४ ।।
अथापरः सरस्वत्या ह्यवतारो निगद्यते ।।
यां निषेव्य नरा लोके कृतार्थाः स्युर्न संशयः ।। ८५-३५ ।।
आप्यायिनी चन्द्रयुक्ता माया च वदनांतरे ।।
सकामिका क्रुधा शांतिश्चन्द्रालंकृतमस्तका ।। ८५-३६ ।।
दीपिका सासना चन्द्रयुगस्त्रं मनुरीरितः ।।
मुनिरक्षोभ्य उद्दिष्टश्छन्दस्तु बृहती मतम् ।। ८५-३७ ।।
ताराख्या देवता बीजं द्वितीयञ्च चतुर्थकम् ।।
शक्तिः षड्दीर्घयुक्तेन द्वितीयेनांगकल्पनम् ।। ८५-३८ ।।
षोढा न्यासं ततः कुर्यात्तारायाः सर्वसिद्धिम् ।।
श्रीकण्ठादीन्न्यसेद्रुद्रान्मातृकावर्णपूर्वकान् ।। ८५-३९ ।।
मातृकोक्तस्थले माया तृतीयक्रोधपूर्वकान् ।।
चतुर्थीनमसायुक्तान्प्रथमो न्यास ईरितः ।। ८५-४० ।।
शवपीठसमासीनां नीलकांतिं त्रिलोचनाम् ।।
अर्द्धेन्दुशेखरां नानाभूषणाढ्यां स्मरन्न्यसेत् ।। ८५-४१ ।।
द्वितीये तु ग्रहन्यासं कुर्यात्तां समनुस्मरन् ।।
त्रिबीजस्वरपूर्वं तु रक्तसूर्यं हृदि न्यसेत् ।। ८५-४२ ।।
तथा पवर्गपूर्वं तु शुक्लं सोमं भ्रुवोर्द्वये ।।
कवर्गपूर्वं रक्ताभं मंगलं लोचनत्रयम् ।। ८५-४३ ।।
चवर्गाद्यं बुधं श्यामं न्यसेद्वक्षस्थले बुधः ।।
ढवर्गाद्यं पीतवर्णं कण्ठकूपे बृहस्पतिम् ।। ८५-४४ ।।
तवर्गाद्यं श्वेतवर्णं घटिकायां तु भार्गवम् ।।
नीलवर्णं पवर्गाद्यं नाभिदेशे शनैश्चरम् ।। ८५-४५ ।।
शवर्गाद्यं धूम्रवर्णं ध्यात्वा राहुं मुखे न्यसेत् ।।
त्रिबीजपूर्वकश्चैवं ग्रहन्यासः समीरितः ।। ८५-४६ ।।
तृतीयं लोकपालानां न्यासं कुर्यात्प्रयत्नतः ।।
मायादिबीजत्रितयपूर्वकं सर्वसिद्धये ।। ८५-४७ ।।
स्वमस्तके ललाटादि दिक्ष्वष्टस्वधउर्द्ध्वतः ।।
ह्रस्वदीर्घकादिकाष्टवर्गपूर्वान्दिशाधिपान् ।। ८५-४८ ।।
शिवशक्त्यभिधे न्यासं चतुर्थे तु समाचरेत् ।।
त्रिबीजपूर्वकान्न्यस्येत्षट्शिवाञ्छक्तिसंयुतान् ।। ८५-४९ ।।
आधारादिषु चक्रेषु स्वचक्रवर्णपूर्वकान् ।।
ब्रह्माणं डाकिनीयुक्तं वादिसांतार्णपूर्वकम् ।। ८५-५० ।।
मूलाधारे विन्यसेच्च चतुर्द्दलसमन्वितम् ।।
श्रीविष्णुं राकिणीयुक्तबादिलांतार्णपूर्वकम् ।। ८५-५१ ।।
स्वाधिष्ठनाभिधे चक्रे लिंगस्थे षड्दले न्यसेत् ।।
रुद्रं तु डाकिनीयुक्तं डादिफांतार्णपूर्वकम् ।। ८५-५२ ।।
चक्रे दशदले न्यस्येन्नाभिस्थे मणिपूरके ।।
ईश्वरं कादिठान्तार्णपूर्वकं शाकिनीयुतम् ।। ८५-५३ ।।
विन्यसेद्द्वादशदलेहृदयस्थे त्वनाहते ।।
सदाशिवं शाकिनीं च षोडशस्वरपूर्वकम् ।। ८५-५४ ।।
कण्ठस्थे षोडशदले विशुद्धाख्ये प्रविन्यसेत् ।।
आज्ञाचक्रे परशिवं हाकिनीसंयुतं न्यसेत् ।। ८५-५५ ।।
लक्षार्णपूवं भ्रूमध्यसंस्थितेऽतिमनोहरे ।।
तारादिपंचमं न्यासं कुर्यात्सर्वेष्टसिद्धये ।। ८५-५६ ।।
अष्टौ वर्गान्स्वरद्वंद्वपूर्वकान् बीजसंयुतान् ।।
ताराद्या न्यासपूर्वाश्च प्रयोज्या अष्टशक्तयः ।। ८५-५७ ।।
ताराथोग्रा महोग्रापि वज्रा काली सरस्वती ।।
कामेश्वरी च चामुंडा इत्यष्टौ तारिकाः स्मृताः ।। ८५-५८ ।।
ब्रह्मरंध्रे ललाटे च भ्रूमध्ये कण्ठदेशतः ।।
हृदि नाभौ फले मूलाधारे चेताः क्रमान्न्यसेत् ।। ८५-५९ ।।
अङ्गन्यासं ततः कुर्यात्पीठाख्यं सर्वसिद्धिदम् ।।
आधारे कामरूपाख्यं बीजं ह्रस्वार्णपूर्वकम् ।। ८५-६० ।।
हृदि जालंधरं बीजं दीर्घपूर्वं प्रविन्यसेत् ।।
ललाटे पूर्णगिर्याख्यं कवर्गाद्यं न्यसेत्सुधीः ।। ८५-६१ ।।
उड्डीयानं चवर्गाद्यं केशसन्धौ प्रविन्यसेत् ।।
कण्ठे तु मथुरापीठं दशम यादिकं न्यसेत् ।। ८५-६२ ।।
षोढा न्यासस्तु तारायाः प्रोक्तोऽभीष्टप्रदायकः ।।
हृदि श्रीमदेकजटां तारिणीं शिरसि न्यसेत् ।। ८५-६३ ।।
वज्रोदके शिखां पातु उग्रतारां तु वर्मणि ।।
महोग्रा वत्सरे नेत्रे पिंगाग्रैकजटास्त्रके ।। ८५-६४ ।।
षड्रदीर्गयुक्तमायाया एतान्यष्टौ षडंगके ।।
अंगुष्ठादिष्वंगुलीषु पूर्वं विन्यस्य यत्नतः ।। ८५-६५ ।।
तर्जनीमध्यमाभ्यां तु कृत्वा तालत्रयं ततः ।।
छोटिकामुद्राया कुर्याद्दिग्बन्धं देवतां स्मरन् ।। ८५-६६ ।।
विद्यया तारपुटया व्यापकं सप्तधा चरेत् ।।
उग्रतारां ततो ध्यायेत्सद्यो वादेऽतिसिद्धिदाम् ।। ८५-६७ ।।
लयाब्धावंबुजन्मस्थां नीलाभां दिव्यभूषणाम् ।।
कम्बुं खङ्गं कपालं च नीलाब्जं दधतीं करैः ।। ८५-६८ ।।
नागश्रेष्ठालंकृतांगीं रक्तनेत्रत्रयां स्मरेत् ।।
जपेल्लक्षचतुष्कं हि दशांशं रक्तपद्मकैः ।। ८५-६९ ।।
हुनेत्क्षीराज्यसंमिश्रैः शंखं संस्थाप्य संजपेत् ।।
नारीं पश्यन्स्पृशन्गच्छन्महानिशि बलिं चरेत् ।। ८५-७० ।।
श्मशाने शून्यसदने देवागारेऽथ निर्जने ।।
पर्वते वनमध्ये वा शवमारुह्य मंत्रवित् ।। ८५-७१ ।।
समरे शत्रुनिहतं यद्वा षाण्यासिकं शिशुम् ।।
विद्यां साधयतः शीघ्रं साधितैवं प्रसिद्ध्यति ।। ८५-७२ ।।
मेधा प्रज्ञा प्रभा विद्या धीवृत्तिस्मृतिबुद्धयः ।।
विश्वेश्वरीति संप्रोक्ताः पीठस्य नव शक्तयः ।। ८५-७३ ।।
भृगुमन्विंदुसंयुक्तं मेघवर्त्म सरस्वती ।।
योगपीठात्मने हार्द्दं पीठस्य मनुरीरितः ।। ८५-७४ ।।
दत्त्वानेनासनं मूर्तिं मूलमंत्रेण कल्पयेत् ।।
पूजयेद्विधिवद्देवीं तद्विधानमथोच्यते ।। ८५-७५ ।।
तारो माया भगं ब्रह्मा जटे सूर्यः सदीर्घकम् ।।
यक्षाधिपतये तंद्रीसोपनीतं बलिं ततः ।। ८५-७६ ।।
गृहयुग्मं शिवा स्वाहा बलिमंत्रोऽयमीरितः ।।
दद्यान्नित्यं बलिं तेन मध्यरात्रे चतुष्पथे ।। ८५-७७ ।।
जलदानादिकं मंत्रैर्विदध्याद्दशभिस्ततः ।।
ध्रुवो वज्रोदके वर्म फट्सप्तार्णो जलग्रहे ।। ८५-७८ ।।
ताराद्या वह्निजायांता माया हि क्षालने मता ।।
तारो मायाः भृगुः कर्णोविशुद्धं धर्मवर्मतः ।। ८५-७९ ।।
सर्वपापानि शाम्यंते छेतो नेत्रयुतं जलम् ।।
कल्पान्तनयनस्वाहा मंत्र आचमने मतः ।। ८५-८० ।।
ध्रुवो मणिधरीत्यंते वज्रिण्यक्षियुता मृतिः ।।
खरिविद्यायुग्रिजश्व सर्ववांते बकोऽब्जवान् ।। ८५-८१ ।।
कारिण्यंते दीर्घवर्म अस्त्रं वह्निप्रियांतिमः ।।
त्रयोविंशतिवर्णात्मा शिखाया बंधने मनुः ।। ८५-८२ ।।
प्रणवो रक्षयुगलं दीर्घवर्मास्त्रठद्वयम् ।।
नवार्णेनामुना मंत्री कुर्याद्भूमिविशोधनम् ।। ८५-८३ ।।
नारांते सर्वविघ्नानुत्सारयेति पदं ततः ।।
हुं फट् स्वाहा गुणेंद्वर्णो मनुर्विघ्ननिवारणम् ।। ८५-८४ ।।
मायाबीजं जपापुष्पनिभं नाभौ विचिंयेत् ।।
तदुत्थेनाग्निना देहं दहेत्साद्धस्वपाप्मना ।। ८५-८५ ।।
ताराबीजं सुवर्णाभं चिंतयेद्धृदि मंत्रवित् ।।
पवनेन तदुत्थेन पापभस्म क्षिपेद्भुवि ।। ८५-८६ ।।
तुरीयं चंद्रकुंदाभं बीजं ध्यात्वाललाटतः ।।
तदुत्थसुधयादे हं स्वयं वै देवतानिभम् ।। ८५-८७ ।।
अनया भूतशुद्ध्या तु देवीसादृश्यमाप्नुयात् ।।
तारोऽनंतो भगुः कर्णो पद्मनाभयुतो बली ।। ८५-८८ ।।
खे वज्ररेखे क्रोधाख्यं बीजं पावकल्लभा ।।
अमुना द्वादशार्णेन रचयेन्मंडलं शुभम् ।। ८५-८९ ।।
तारो यथागता निद्रा सदृक्षेकभृगुर्विषम् ।।
सदीर्घस्मृतिरौ साक्षौ महाकालो भगान्वितः ।। ८५-९० ।।
क्रोधोऽस्त्रं मनुवर्णोऽयं मनुः पुष्पादिशोधने ।।
तारः पाशः परा स्वाहा पंचार्णस्चित्तशोधने ।। ८५-९१ ।।
मनवो दश संप्रोक्ता अर्ध्यस्थापनमुच्यते ।।
सेंदुभ्यां मासतो माया भुवं संसृज्य भूगृहम् ।। ८५-९२ ।।
वृतं त्रिकोणसंयुक्तं कुर्यान्मंडलमंत्रतः ।।
यजेत्तत्राधारशक्तिं वह्निमंडलमध्यगाम् ।।
वह्निमंडलमभ्यर्च्य महाशंखं निधापयेत् ।। ८५-९३ ।।
वामकर्णेन्दुयुक्तेन फडंतेन विहायसा ।।
प्रक्षालितं भृगुर्दंडी त्रिमूर्तींतुयुतं पठेत् ।। ८५-९४ ।।
ततोऽर्चयेन्महाशंखं जपन्मंत्रचतुष्टयम् ।।
दीर्घत्रयान्विता माया काली सृष्टिः सदीर्घसः ।। ८५-९५ ।।
प्रतिमासंयुतं मासं यवनं हृदयं ततः ।।
एकाधशार्णः प्रथमो महाशंखार्चने मनुः ।। ८५-९६ ।।
हंसो हरिभुजंगेशयुक्तो दीर्घंत्रयेंदुयुक् ।।
तारिण्यंते कपालाय नमोंतो द्वादशाक्षरः ।। ८५-९७ ।।
स्वं दीर्घत्रयमन्वाढ्यमेषो वामदगन्वितः ।।
लोकपालाय हृदयं तृतीयोऽयं शिवाक्षरः ।। ८५-९८ ।।
मायास्त्रीबीजमर्द्धैदुयुतं स्वं स्वर्गखादिमः ।।
पालाय सर्वाधाराय सर्वः सर्वोद्भवस्तथा ।। ८५-९९ ।।
सर्वशुद्धिमयश्चेति ङेंताः सर्वासुरांतिकम् ।।
रुधिरा रतिदीर्घा च वायुः शुभ्रानिलः सुरा ।। ८५-१०० ।।
भाजनाय भगी सत्या विकपालाय हृन्मनुः ।।
तुर्यो रसेषु वर्णोऽयं महाशंखप्रपूजने ।। ८५-१०१ ।।
नवार्कमंडलं चेष्ट्वा सलिलं मूलमंत्रतः ।।
प्रपूरयेत्सुधाबुद्ध्या गंधपुष्पाक्षतादिभिः ।। ८५-१०२ ।।
मुद्रां त्रिखंडां संदर्श्य पूजयेच्चंद्रमंडलम् ।।
वाक्सत्यपद्मागगने रेफानुग्रहबिंदुयुक् ।। ८५-१०३ ।।
मूलमंत्रो विपद्ध्वंसमनुसर्गसमन्वितम् ।।
अष्टकृत्वोऽमुना मंत्री मंत्रयेत्प्रयतो जलम् ।। ८५-१०४ ।।
मायया मदिशं क्षिप्त्वा खं योनिं च प्रदर्शयेत् ।।
तत्र वृत्ताष्टषट्कोणं ध्यात्वा देवीं विचिंतयेत् ।। ८५-१०५ ।।
पूर्वोक्तां पूजयेत्त्वेनां मूलेनाथ प्रतर्पयेत् ।।
तर्जनूमध्यमानामाकनिष्ठाभिर्महेश्वरीम् ।। ८५-१०६ ।।
सांगुष्ठानिश्चुतुर्वारं महाशंखस्थिते जले ।।
खंरेफमनुबिंद्वाढ्यां भृगुमन्विंदुयुक्तया ।। ८५-१०७ ।।
ध्रुवाद्येन नमोंतेन तर्प्यादानंदभैरवम् ।।
ततस्तेनार्धतोयेन प्रोक्षेत्पूजनसाधनम् ।। ८५-१०८ ।।
योमिमुद्रां प्रदर्श्यापि प्रणमेद्भवतारिणीम् ।।
विधानमर्घे संप्रोक्तं सर्वसिद्धिप्रदायकम् ।। ८५-१०९ ।।
पूर्वोक्ते पूजयेत्पीठे पद्मे षट्कोणकर्णिके ।।
धरागृहावृते रम्ये देवीं रम्योपचारकैः ।। ८५-११० ।।
महीगृहे चतुर्दिक्षु गणेशादीन्प्रपूजयेत् ।।
पाशांकुशौ कपालं च त्रिशूलं दधतं करैः ।। ८५-१११ ।।
अलंकारचयोपेतं गणेशं प्राक्तमर्चयेत् ।।
कपालशूले हस्ताभ्यां दधतं सर्पभूषणम् ।। ८५-११२ ।।
स्वयूथवेष्टितं रम्यं बटुकं दक्षिणेऽर्चयेत् ।।
असिशूलकपालानि डमरुं दधतं करैः ।। ८५-११३ ।।
कृष्णं दिगंबरं क्रूरं क्षेत्रपालं च पश्चिमे ।।
कपालं डमरुं पाशं लिंगं शंबिभ्रतीं करैः ।। ८५-११४ ।।
अध्याकन्या रक्तवस्त्रा योगिनीरुत्तरे यजेत् ।।
अक्षोभ्यं प्रयजेन्मूर्ध्नि देव्या मंत्रऋषिं शुभम् ।। ८५-११५ ।।
अक्षोभ्यं वस्त्रपुष्पं च प्रतीच्छानवल्लभा ।।
अक्षोभ्यपूजने मंत्रः षट्कोगकम् ।। ८५-११६ ।।
वैराचनं चामिताभं पद्मनाभिभिधं तथा ।।
शंखं पांडुरसंज्ञं च दिग्दलेषु प्रपूजयेत् ।। ८५-११७ ।।
लाभकां मानकां चैव पांडुरां तारकां तथा ।।
विदिग्गताब्जपत्रेषु पूजयेदिष्टसिद्धये ।। ८५-११८ ।।
बिंदुनामादिवर्णाद्याः संबुद्ध्यंतास्तथाभिधाः ।।
व्रजपुष्पं प्रतीच्छाग्निप्रियांताः प्रणवादिकाः ।। ८५-११९ ।।
वैराचनादि पूजायां मनवः परिकीर्तिताः ।।
भूधरश्च चतुर्द्वार्षु पद्मांतकयमांतकौ ।। ८५-१२० ।।
विद्यांतकाभिधः पश्चान्नरांतक इमान्यजेत् ।।
शक्रादींश्चैव वज्रादीन्प्रजपेत्तदनंतरम् ।। ८५-१२१ ।।
एवं संपूजयन्देवीं पांडित्यं धनमद्भुतम् ।।
पुत्रान्पौत्राञ्छुभां कीर्तिं लभते जनवश्यताम् ।। ८५-१२२ ।।
तारो माया श्रीमदकजटे नीलसरस्वती ।।
महोप्रतारे देवासः सनेत्रो गदियुग्मकम् ।। ८५-१२३ ।।
सर्वदेवपिशाकर्मो दीर्घोग्रिर्मरुसान्मस ।।
अभ्रगुमम जाड्यं च छेदयद्वितयं रमा ।। ८५-१२४ ।।
मायास्त्राग्निप्रियांतोऽयं द्विपंचाशल्लिपिर्मनुः ।।
अनेन नित्यं पूजतिऽन्वहं देव्यै बलिं हरेत् ।। ८५-१२५ ।।
एवं सिद्धे मनौ मंत्री प्रयोगान्विदधाति च ।।
जातमात्रस्य बालस्य दिवसत्रितयादधः ।। ८५-१२६ ।।
जिह्वायां विलिखेन्मंत्रं मध्वाज्याभ्यां शलाकया ।।
सुवर्ण कृतया यद्वा मंत्री धवलदूर्वया ।। ८५-१२७ ।।
गतेऽष्टमेऽब्दे बालोऽपि जायते कविरद्बुतम् ।।
तथापरैरजेयोऽपि भूपसंघैर्द्धनार्चितः ।। ८५-१२८ ।।
उपरागे दतानीव नरदारुसरोजले ।।
निर्माय कीलकं तेन तैलमध्वमृतैर्लिखेत् ।। ८५-१२९ ।।
सरोजिनीदले मंत्रं वेष्टयेन्मातृकाक्षरैः ।।
निखाय तदलं कुंडे चतुरस्रे समेखले ।। ८५-१३० ।।
संस्थाप्य पावकं तत्र जुहुयान्मनुनामुना ।।
सहस्रं रक्तपद्मानां धेनुदुग्धजलाप्लुतम् ।। ८५-१३१ ।।
होमांते विवधै रत्नैः पलैरपि बलिं हरेत् ।।
बलिं मंत्रेण विधिवद्बलिमंत्रः प्रकाश्यते ।। ८५-१३२ ।।
तारः पद्मे युग तंद्री वियद्दीर्घं च लोहितः ।।
अत्रिर्विषभगारूढो वदत्पद्मावतीपदम् ।। ८५-१३३ ।।
झिंटीशाढ्योनिलस्वाहा षोडशार्णो बलेर्मनुः ।।
ततो निशीथे च बलिं पूर्वोक्तमनुना हरेत् ।। ८५-१३४ ।।
एवं कृते पंडितानां स जयी कविराड् भवेत् ।।
निवासो भारतीलक्ष्म्योर्जनतारञ्जनक्षमः ।। ८५-१३५ ।।
शताभिजप्त्या यो मंत्री रोचनां मस्ताके धरेत् ।।
यं यं पश्यति तस्यासौ दासवज्जायते क्षणात् ।। ८५-१३६ ।।
श्मशानांगारमाश्रित्य पूर्वायां कुजवासरे ।।
तेन मत्रेण संवेष्ट्य निबद्धं रक्ततंतुभिः ।। ८५-१३७ ।।
शताभिजप्तं मूलेन निक्षिपेद्वैरिवेश्मनि ।।
उच्चाटयति सप्ताहात्सकुंटुबान्विरोधिनः ।। ८५-१३८ ।।
क्षीराढ्यया निशामंत्रं लिखित्वा पौरुषेऽस्थनि ।।
रविवारे निशीथिन्यां सहस्रमभिमंत्रयेत् ।। ८५-१३९ ।।
तत्क्षिप्तं शत्रुसदने मंडलाद्भ्रंशकं भवेत् ।।
क्षेत्रे क्षिप्तं सस्यहान्योजवहृत्तुरमालयेत् ।। ८५-१४० ।।
षट्कोणांतर्लिखेन्मूलं साध्यार्णं केशरे स्वरैः ।।
बाह्येऽष्टवर्गयुक्पत्रं पद्मभूमिपरावृतम् ।। ८५-१४१ ।।
यंत्रं भूर्जे जहुरसैर्लिखेत्पूताम्बरावृतम् ।।
पट्टसूत्रेण सन्नद्धं शिशुकंठगतं ध्रुवम् ।। ८५-१४२ ।।
भूतभीतिहरं वामवाहौ स्त्रीणां च पुत्रदम् ।।
नृणां दक्षिणबाहुस्थं निर्धनानां धनप्रदम् ।। ८५-१४३ ।।
ज्ञानदं ज्ञानमिच्छूनां राज्ञां तु विजयप्रदम् ।। ८५-१४४ ।।
इति श्रीबृहन्नारदीयपुराणे पूर्वभागे बृहदुपाख्याने तृतीयपादे यक्षिणीमन्त्रभेदनिरूपणं नाम पञ्चाशीतितमोऽध्यायः ।। ८५ ।।