नारदपुराणम्- पूर्वार्धः/अध्यायः ७३
सनत्कुमार उवाच ।।
अथ रामस्य मनवो वक्ष्यंते सिद्धिदायकाः ।।
येषामाराधनान्मर्त्यास्तरंति भवसागरम् ।। ७३-१ ।।
सर्वेषु मंत्रवर्येषु श्रेष्ठं वैष्णवमुच्यते ।।
गाणपत्येषु सौरेषु शाक्तशैवेष्वभीष्टदम् ।। ७३-२ ।।
वैष्णवेष्वपि मंत्रेषु राममंत्राः फलाधिकाः ।।
गाणपत्यादिमंत्रेभ्यः कोटिकोटिगुणाधिकाः ।। ७३-३ ।।
विष्णुशय्यास्थितो वह्निरिंदुभूषितमस्तकः ।।
रामाय हृदयांतोऽयं महाघौधविनाशनः ।। ७३-४ ।।
सर्वेषु राममंत्रषु ह्यतिश्रेष्टः षडक्षरः ।।
ब्रह्महत्यासहस्राणि ज्ञाताज्ञातकृतानि च ।। ७३-५ ।।
स्वर्णस्तेय सुरापानगुरुतल्पायुतानि च ।।
कोटिकोटिसहस्राणि ह्युपपापानि यानि वै ।। ७३-६ ।।
मंत्रस्योञ्चारणात्सद्यो लयं यांति न संशयः ।।
ब्रह्मा मुनिः स्याद्गायत्री छंदो रामश्च देवता ।। ७३-७ ।।
आद्यं बीजं च हृच्छक्तिर्विनियोगोऽखिलाप्तये ।।
षड्दीर्घभाजा बीजेन षडंगानि समाचरेत् ।। ७३-८ ।।
ब्रह्मरंध्रे भ्रुवोर्मध्ये हृन्नाभ्योर्गुह्यपादयोः ।।
मंत्रवर्णान्क्रमान्न्यस्य केशवादीन्प्रविन्यसेत् ।। ७३-९ ।।
पीठन्यासादिकं कृत्वा ध्यायेद्धृदि रघूत्तमम् ।।
कालांभोधरकांतं च वीरासनसमास्थितम् ।। ७३-१0 ।।
ज्ञानमुद्रां दक्षहस्ते दधतं जानुनीतरम् ।।
सरोरुहकरां सीतां विद्युदाभां च पार्श्वगाम् ।। ७३-११ ।।
पश्यंतीं रामवक्राब्जं विविधाकल्पभूषिताम् ।।
ध्यात्वैवं प्रजपेद्वर्णलक्षं मंत्री दशांशतः ।। ७३-१२ ।।
कमलैर्जुहुयाद्वह्नौ ब्राह्मणान्भोजयेत्ततः ।।
पूजयेद्वैष्णवे पीठे विमलादिसमन्विते ।। ७३-१३ ।।
मूर्तिं मूलेन संकल्प्य तस्यामावाह्य साधकः ।।
सीतां वामे समासीनां तन्मन्त्रेण प्रपूजयेत् ।। ७३-१४ ।।
रमासीतापदं ङेंतं द्विठांतो जानकीमनुः ।।
अग्रेः शार्ङ्गं च सम्पूज्य शरान्पार्श्वद्वयेऽर्चयेत् ।। ७३-१५ ।।
केशरेषु षडंगानि पत्रेष्वेतान्समर्चयेत् ।।
हनुमंतं च सुग्रीवं भरतं सबिभीषणम् ।। ७३-१६ ।।
लक्ष्मणांगदशत्रुघ्नान् जांबवंतं क्रमात्पुनः ।।
वाचयंतं हनूमंतग्रतो धृतपुस्तकम् ।। ७३-१७ ।।
यजेद्भरतशत्रुघ्नौ पार्श्वयोर्धृतचामरौ ।।
धृतातपत्रं हस्ताभ्यां लक्ष्मणं पृष्टतोऽर्चयेत् ।। ७३-१८ ।।
ततोऽष्टपत्रे सृष्टिं च जपंतं विजयं तथा ।।
सुराष्ट्रं राष्ट्रपालं च अकोपं धर्मपालकम् ।। ७३-१९ ।।
सुमंतं चेति सम्पूज्य लोके शानायुधैर्युतान् ।।
एवं रामं समाराध्य जीवन्मुक्तः प्रजायते ।। ७३-२0 ।।
चंदनाक्तैः प्रजुहुयाज्जातीपुष्पैः समाहितः ।।
राजवश्याय कमलैर्धनधान्यादिसिद्धये ।। ७३-२१ ।।
लक्ष्मीकामः प्रजुहुयात्प्रसूनैर्विल्वसंभवैः ।।
आज्याक्तैर्नीलकमलैर्वशयेदखिलं जगत् ।। ७३-२२ ।।
घृताक्तशतवर्वीभिर्दीर्घायुश्च निरामयः ।।
रक्तोत्पलानां होमेन धनं प्राप्नोति वांछितम् ।। ७३-२३ ।।
पालाशकुसुमैर्हुत्वा मेधावी जायते नरः ।।
तज्जप्तांभः पिबेत्प्रातर्वत्सरात्कविराड् भवेत् ।। ७३-२४ ।।
तन्मंत्रितान्नं भुंजीतमहारोगप्रशांतये ।।
रोगोक्तौषधहोमेन तद्रोगान्मुच्यते क्षणाम् ।। ७३-२५ ।।
नदीतीरे च गोष्ठे वा जपेल्लक्षं पयोब्रतः ।।
पायसेनाज्ययुक्तेन हुत्वा विद्यानिधिर्भवेत् ।। ७३-२६ ।।
परिक्षीणाधिपत्यो यः शाकाहारो जलांतरे ।।
जपेल्लक्षं च जुहुयाद्विल्वपुष्पैर्दशांशतः ।। ७३-२७ ।।
तदैव पुनराप्नोति स्वाधिपत्यं न संशयः ।।
उपोष्य गङ्गातीरांते स्थित्वा लक्षं जपेन्नरः ।। ७३-२८ ।।
दशांशं कमलैर्हुत्वा विल्वोत्थैर्वा प्रसूनकैः ।।
मधुरत्रयसंयुक्तैरादज्यश्रियमवाप्नुयात् ।। ७३-२९ ।।
मार्गमासे जले स्थित्वा कन्दमूलफलाशनः ।।
लक्षं जप्त्वा दशांशेन पायसैर्जुहुयाद्वसौ ।। ७३-३0 ।।
श्रीरामचन्द्रसदृशः पुत्रः पौत्रोऽपि जायते ।।
अन्येऽपि बहवः संति प्रयोगामन्त्रराजके ।। ७३-३१ ।।
किंतु प्रयोगकर्तॄणां परलोको न विद्यते ।।
षट्कोणं वसुपत्रं च तद्बाह्यार्कदलं लिखेत् ।। ७३-३२ ।।
षट्कोणेषु षडर्णानि मन्त्रस्य विलिखेद् बुधः ।।
अष्टपत्रे तथाष्टार्णांल्लिखेत्प्रणवगर्भितान् ।। ७३-३३ ।।
कामबीजं रविदले मध्ये मन्त्रावृताभिधाम् ।।
सुदर्शनावृतं बाह्ये दिक्षु युग्मावृतं तथा ।। ७३-३४ ।।
वज्रोल्लसद्भूमिगेहं कन्दर्पांकुशपाशकैः ।।
भूम्या च विलसत्कोणं यन्त्रराजमिदं स्मृतम् ।। ७३-३५ ।।
भूर्जेऽष्टगन्धैः संलिख्य पूजयेदुक्तवर्त्मना ।।
षट्कोणेषु दलार्काब्जान्यावेष्टवृत्तयुग्मतः ।। ७३-३६ ।।
केशरेष्वष्टपत्रस्य स्वरद्वंद्वं लिखेद् बुधः ।।
बहिस्तु मातृकां चैव मन्त्रं प्राणनिधयनम् ।। ७३-३७ ।।
यन्त्रमेतच्छुभे घस्रे कण्ठे वा दक्षिणे भुजे ।।
मूर्ध्नि वा धारयेन्मंत्री सर्वपापैः प्रमुच्यते ।। ७३-३८ ।।
सुदिने शुभनक्षत्रे सुदेशे शल्यवर्जिते ।।
वश्याकर्षणविद्वेषद्रावणोच्चाटनादिकम् ।। ७३-३९ ।।
पुष्यद्वयं तथादित्यार्द्रामघासु यथाक्रमम् ।।
दूर्वोत्था लेखनी वश्ये तथाकृष्टौ करंजजा ।। ७३-४0 ।।
नरास्थिजा मारणे तु स्तंभने राजवृक्षजा ।।
शांतिपुष्टष्ट्यायुषां सिद्धयै सर्वापच्छमनाय च ।। ७३-४१ ।।
विभ्रमोत्पादने चैव शिलायां विलिखेद् बुधः ।।
खरचर्मणि विद्वेषे ध्वजे तूञ्चाटनाय च ।। ७३-४२ ।।
शत्रूणां ज्वरसन्तापशोकमारणकर्मणि ।।
पीतवस्रं लिखित्वा तु साधयेत्साधकोत्तमः ।। ७३-४३ ।।
वश्याकृष्टौ चाष्टगन्धैः सम्पूज्य च यथाविधि ।।
चितांगारादिना चैव ताडनोच्चाटनादिकम् ।। ७३-४४ ।।
विषार्कक्षीरयोगेन मारणं भवति ध्रुवम् ।।
लिखित्वैवं यंत्रराजं गन्धपुष्पादिभिर्यजेत् ।। ७३-४५ ।।
त्रिलोहवेष्टितं कृत्वा धारयेत्साधकोत्तमः ।।
बीजं रामाय ठद्वंद्वं मन्त्रोऽयं रसवर्णकः ।। ७३-४६ ।।
महासुदर्शनमनुः कथ्यते सिद्धिदायकः ।।
सुदर्शनमहाशब्दाच्चक्रराजेश्वरेति च ।। ७३-४७ ।।
दुष्टांतकदुष्टभयानकदुष्टभयंकरम् ।।
छिंधिद्वयं भिंधियुग्मं विदारययुगं ततः ।। ७३-४८ ।।
परमन्त्रान् ग्रसद्वंद्वं भक्षयद्वितयं ततः ।।
त्रासयद्वितयं वर्मास्त्राग्निजायांतिमो मनुः ।। ७३-४९ ।।
अष्टषष्ट्यक्षरः प्रोक्तो यंत्रसंवेष्टने त्वयम् ।।
तारो हृद्भगवान् ङेंतो ङेंतो हि रघुनन्दनः ।। ७३-५0 ।।
रक्षोघ्नविशदायांते मधुरादिप्रसन्न च ।।
वरदानायामितांते नुतेजसेपदमीरयेत् ।। ७३-५१ ।।
बालायांते तु रामाय विष्णवे हृदयांतिमः ।।
सप्तचत्वारिंशदर्णो मालामन्त्रोऽयमीरितः ।। ७३-५२ ।।
विश्वामित्रो मुनिश्चास्य गायत्री छंद ईरितम् ।।
श्रीरामो देवता बीजं ध्रुवः शक्तिश्च ठद्वयम् ।। ७३-५३ ।।
षड्दीर्घस्वरयुग्मायाबीजेनांगानि कल्पयेत् ।।
ध्यानपूजादिकं सर्वमस्य पूर्ववदाचरेत् ।। ७३-५४ ।।
अयमाराधितो मन्त्रः सर्वान्कामान्प्रयच्छति ।।
स्वकामसत्यवाग्लक्ष्मीताराढ्यः पञ्चवर्णकः ।। ७३-५५ ।।
षडक्षरः षड्विधः स्याञ्चतुर्वर्गफलप्रदः ।।
ब्रह्मा संमोहनः शक्तिर्दक्षिणामूर्तिसंज्ञकः ।। ७३-५६ ।।
अगस्त्यः श्रीशिवः प्रोक्तास्ते तेषां मुनयः क्रमात् ।।
अथवा कामबीजादेर्विश्वामित्रो मुनिः स्मृतः ।। ७३-५७ ।।
छन्दः प्रोक्तं च गायत्री श्रीरामो देवता पुनः ।।
बीजशक्तिराधमांत्यं मन्त्रार्णैः स्यात्षडंगकम् ।। ७३-५८ ।।
बीजैः षड्दीर्घयुक्तैर्वा मंत्रार्णान्पूर्ववन्न्यसेत् ।।
ध्यायेत्कल्पतरोर्मूले सुवर्णमयमण्डपे ।। ७३-५९ ।।
पुष्पकाख्यविमानांतः सिंहासनपरिच्छदे ।।
पद्मे वसुदलेदेवमिंद्रनीलसमप्रभम् ।। ७३-६0 ।।
वीरासनसमासीनं ज्ञानमुद्रोपशोभितम् ।।
वामोरुन्यस्ततद्धस्तसीतालक्ष्मणसेवितम् ।। ७३-६१ ।।
रत्नाकल्पं विभुंध्यात्वा वर्णलक्षं जपेन्मनुम् ।।
यद्वा स्मारादिमन्त्राणां जयाभं च हरिं स्मरेत् ।। ७३-६२ ।।
येजनं काम्यकर्माणि सर्वं कुर्यात्षडर्णवत् ।।
रामश्च चन्द्रभ द्रांतो ङेनमोंतो ध्रुवादिकः ।। ७३-६३ ।।
मन्त्रावष्टाक्षरौ ह्येतौ तारांत्यौ चेन्नवाक्षरौ ।।
एतेषां यजनं सर्वं कुर्यान्मंत्री षडर्णवत् ।। ७३-६४ ।।
जानकीवल्लभो ङेंतो द्विठांतः कवचादिकः ।।
दशार्णोऽयं महामन्त्रो विशिष्टोऽस्य मुनिः स्वराट् ।। ७३-६५ ।।
छन्दश्च देवता सीता पतिर्बीजं तथादिमम् ।।
स्वाहा शक्तिश्च कामेन कुर्यादंगानि षट् क्रमात् ।। ७३-६६ ।।
शिरोललाटभ्रूमध्यतालुकण्ठेषु हृद्यपि ।।
नाभ्यंघ्रिजानुपादेषु दशार्णान्विन्यसेन्मनोः ।। ७३-६७ ।।
अयोध्यानगरे रत्नचित्रसौवर्णमण्डपे ।।
मंदारपुष्पैराबद्धविताने तोरणान्विते ।। ७३-६८ ।।
सिंहासनसमासीन पुष्पकोपरि राघवम् ।।
रक्षोभिर्हरिभिर्देवैः सुविमानगतैः शुभैः ।। ७३-६९ ।।
संस्तूयमानं मुनिभिः प्रह्वैश्च परिसेवितम् ।।
सीतालंकृतवामांगं लक्ष्मणेनोपशोभितम् ।। ७३-७0 ।।
श्यामं प्रसन्नवदनं सर्वाभरणभूषितम् ।।
एवं ध्यात्वा जपेन्मंत्री वर्णलक्षं समाहितः ।। ७३-७१ ।।
दशांशः कमलैर्होमो यजनं च षडर्णवत् ।।
रामो ङेंन्तो धनुष्पाणिर्ङैतोंऽते वह्निसुंदरी ।। ७३-७२ ।।
दशाक्षरोऽयं मंत्रोऽस्य मुनिर्ब्रह्मा विराट् पुनः ।।
छन्दस्तु देवता प्रोक्तो रामो राक्षसमर्दनः ।। ७३-७३ ।।
आद्यं बीजं द्विठः शक्तिबींजेनांगानि कल्पयेत् ।।
वर्णन्यासं तथा ध्यानं पुरश्चर्यार्चनादिकमन् ।। ७३-७४ ।।
दशाक्षरोक्तवत्कुर्याच्चापबाणधरं स्मरेत् ।।
तारो नमो भगवते रामान्ते चंद्रभद्रकौ ।। ७३-७५ ।।
ङेंतावर्काक्षरौ मंत्रौ ऋषिध्यानादि पूर्ववत् ।।
श्रीपूर्वं जयपूर्वं च तद्द्विधा रामनाम च ।। ७३-७६ ।।
त्रयोदशाक्षरो मंत्रो मुनिर्ब्रह्मा विराट् स्मृतम् ।।
छन्दस्तु देवता प्रोक्तो रामः पापौघनाशनः ।। ७३-७७ ।।
षडंगानि प्रकुर्वीत द्विरावृत्त्या पदत्रयैः ।।
ध्यानार्चनादिकं सव ह्यस्य कुर्याद्दशार्णवत् ।। ७३-७८ ।।
तारो नमो भगवते रामायांते महापदम् ।।
पुरुषाय हृदंतोऽयं मनुरष्टादशाक्षरः ।। ७३-७९ ।।
विश्वामित्रो मुनिश्छदो धृती रामोऽस्य देवता ।।
तारो बीजं नमः शक्तिश्चंद्राक्ष्यब्ध्यग्निषड्भुजैः ।। ७३-८0 ।।
वर्णैमंत्रोत्थितैः कुर्यात्षडंगानि समाहितः ।।
निश्शाणभेरीपटहशंखतुर्यादिनिःस्वनैः ।। ७३-८१ ।।
प्रवृत्तनृत्ये परितो जयमंगलभाषिते ।।
चंदनागरुकस्तूरीकर्पूरादिसुवासिते ।। ७३-८२ ।।
नानाकुसुमसौरभ्यवाहिगंधवहान्विते ।।
देवगंधर्वनारीभिर्गायन्तीभिरलकृते ।। ७३-८३ ।।
सिंहासने समासीनं पुष्पकोपरि राघवम् ।।
सौमित्रिसीतासहितं जटामुकुटशोभितम् ।। ७३-८४ ।।
चापबाणधरं श्यामं ससुग्रीवविभीषणम् ।।
हत्वा रावणमायांतं कृतत्रैलोक्यरक्षणम् ।। ७३-८५ ।।
एवं ध्यात्वा जपेद्वर्णं लक्षं मत्री दशांशतः ।।
घृताक्तैः पायसैर्हुत्वा यजनं पूर्ववञ्चरेत् ।। ७३-८६ ।।
प्रणवो हृदयं सीतापतये तदनंतरम् ।।
रामाय हनयुग्मांते वर्मास्त्राग्निप्रियांतिमः ।। ७३-८७ ।।
एकोनविंशद्वर्णोऽयं मंत्रः सर्वार्थसाधकः ।।
विश्वामित्रो मुनिश्चास्यानुष्टुप्छन्द उदाहृतम् ।। ७३-८८ ।।
देवता रामभद्रो जं बीजं शक्तिर्नम इति ।।
मंत्रोत्थितैः क्रमाद्वर्णैस्ततो ध्यायेञ्च पूर्ववत् ।। ७३-८९ ।।
पूजनं काम्यकर्मादि सर्वमस्य षडर्णवत् ।।
तारः स्वबीजं कमला रामभद्रेति संपठेत् ।। ७३-९0 ।।
महेष्वासपदांते तु रघुवीर नृपोत्तम ।।
दशास्यांतकशब्दांते मां रक्ष देहि संपठेत् ।। ७३-९१ ।।
परमांते मे श्रियं स्यान्मंत्रो बाणगुणाक्षरः ।।
बीजैर्वियुक्तो द्वात्रिंशदर्णोऽयं फलदायकः ।। ७३-९२ ।।
विश्वामित्रो मुनिश्चास्यानुष्टुप्छंद उदाहृतम् ।।
देवता रामभद्रोऽत्र बीजं स्वं शक्तिरिंदिरा ।। ७३-९३ ।।
बीजत्रयाद्यैः कुर्वीत पदैः सर्वेण मंत्रवित् ।।
पंचांगानि च विन्यस्य मंत्रवर्णान्क्रमान्न्यसेत् ।। ७३-९४ ।।
मूर्ध्नि भाले दृशोः श्रोत्रे गंडयुग्मे सनासिके ।।
आस्ये दोःसंधियुगले स्तनहृन्नाभिषु क्रमात् ।। ७३-९५ ।।
कटौ मेढ्रे पायुपादसंधिष्वर्णान्न्यसेन्मनोः ।।
ध्यानार्चनादिकं चास्य पूर्ववत्समुपाचरेत् ।। ७३-९६ ।।
लक्षत्रयं पुरश्चर्यां पायसैर्हवनं मतम् ।।
ध्यात्वा रामं पीतवर्णं जपेल्लक्षं समाहितः ।। ७३-९७ ।।
दशांशं कमलैर्हुत्वा धनैर्धनपतिर्भवेत् ।।
तारो माया रमाद्वंद्वं दाशरथाय हृञ्च वै ।। ७३-९८ ।।
एकादशाक्षरो मंत्रो मुन्याद्यर्चास्य पूर्ववत् ।।
त्रैलोक्यांते तु नाथाय हृदंतो वसुवर्णवान् ।। ७३-९९ ।।
अस्यापि पूर्ववत्सर्वं न्यासध्यानार्चनादिकम् ।।
आंजनेयपदांते तु गुरवे हृदयांतिमः ।। ७३-१00 ।।
मंत्रो नवाक्षरोऽस्यापि यजनं पूर्ववन्मतम् ।।
ङेतं रामपद पश्चाद्धृदयं पंचवणवत् ।। ७३-१0१ ।।
मुनिध्यानार्चनं चास्य प्रोक्तं सर्वं षडर्णवत् ।।
रामांते चंद्रभद्रौ च ङेंतौ पावकवल्लभा ।। ७३-१0२ ।।
मंत्रो द्वौ च समाख्यातौ मुन्याद्यर्चादि पूर्ववत् ।।
वह्निः शेषान्वितश्चैव चंद्रभूषितमस्तकः ।। ७३-१0३ ।।
एकाक्षरो रघुपतेर्मंत्रः कल्पद्रुमोऽपरः ।।
ब्रह्मा मुनिः स्याद्गायत्री छंदो रामोऽस्य देवता ।। ७३-१0४ ।।
षड्दीर्घाढ्येन मंत्रेण षडंगानि समाचरेत् ।।
सरयूतीरमंदारवेदिकापंकजासने ।। ७३-१0५ ।।
श्यामं वीरासनासीनं ज्ञानमुद्रोपशोभितम् ।।
वामोरुन्यस्तं तद्धस्तं सीतालक्ष्मणसंयुतम् ।। ७३-१0६ ।।
अवेक्षणाणमात्मानं मन्मथामिततेजसम् ।।
शुद्धस्फटिकसंकाशं केवलं मोक्षकांक्षया ।। ७३-१0७ ।।
चिंतयेत्परमात्मानमृतुलक्षं जपेन्मनुम् ।।
सर्व्वं षडर्णवञ्चास्य होमनित्यार्चनादिकम् ।। ७३-१0८ ।।
वह्निः शेषासनो भांतः केवलो द्व्यक्षरो मनुः ।।
एकाक्षरोक्त वत्सर्वं मुनिध्यानार्चनादिकम् ।। ७३-१0९ ।।
तारमानारमानंगचास्त्रबीजैर्द्विवर्णकः ।।
त्र्यक्षरो मंत्रराजः स्यात्षड्विधः सकलेष्टदः ।। ७३-११0 ।।
व्द्यक्षरश्चंद्रभद्रांतो द्विविधश्चतुरक्षरः ।।
एकार्णोक्तवदेतेषां मुनिध्यानार्चनादिकम् ।। ७३-१११ ।।
तारो रामश्चतुर्थ्यंतो वर्मास्त्रं वह्निवल्लभा ।।
अष्टार्णोऽयं महामंत्रो मुन्याद्यर्चा षडर्णवत् ।। ७३-११२ ।।
तारो मया हृदंते स्याद्रामाय प्रणवांतिमः ।।
शिवोमाराममंत्रोऽयमष्टार्णः सर्वसिद्धिदः ।। ७३-११३ ।।
ऋषिः सदाशिवः प्रोक्तो गायत्री छंद ईरितम् ।।
शिवोमारामचंद्रोऽत्र देवता परिकीर्तितः ।। ७३-११४ ।।
षड्वीर्ययामाय यातु ध्रुवपंचार्णयुक्तया ।।
षडंगानि विधायाथ ध्यायेद्धृदि सुरार्चितम् ।। ७३-११५ ।।
रामं त्रिनेत्रं सोमार्द्धधारिणं शूलिनं वरम् ।।
भस्मोद्धूलितसर्वांगं कपर्द्दिनमुपास्महे ।। ७३-११६ ।।
रामाभिरामं सौंदर्यसीमां सोमावतंसिनीम् ।।
पाशांकुशधनुर्बाणधरां ध्यायेत्रिलोचनाम् ।। ७३-११७ ।।
एवं ध्यात्वा जपेद्वर्णलक्षं त्रिमधुरान्वितैः ।।
बिल्पपत्रैः फलैः पुष्पैस्तिलैर्वा पंकजैर्हुनेत् ।। ७३-११८ ।।
स्वयमायांति निधयः सिद्धयश्च सुरेप्सिताः ।।
तारो माया च भरताग्रजराममनोभवः ।। ७३-११९ ।।
वह्निजायाद्वादशार्णो मंत्रः कल्पद्रुमोऽपरः ।।
अंगिराश्च मुनिश्छंदो गायत्री देवता पुनः ।। ७३-१२0 ।।
श्रीरामो भुवनाबीजं स्वाहाशक्तिः समीरितः ।।
चंद्रैकमुनिभूनेत्रैर्मंत्रार्णैरंगकल्पनम् ।। ७३-१२१ ।।
ध्यानपूजादिकं चास्च सर्वं कुर्यात्षडर्णवत् ।।
प्रणवो हृदयं सीतापते रामश्च ङेंतिमः ।। ७३-१२२ ।।
हनद्वयांते वर्मास्त्रं मंत्रः षोडशवर्णवान् ।।
अगस्त्योऽस्य मुनिश्छंदो बृहती देवता पुनः ।। ७३-१२३ ।।
श्रीरामोऽहं तथा बीजं रां शक्तिः समुदीरिता ।।
रामाब्धिवह्निवेदाक्षिवर्णैः पंचांगकल्पना ।। ७३-१२४ ।।
ध्यानपूजादिकं सर्वमस्य कुर्यात्षडर्णवत् ।।
तारो हृञ्चैव ब्रह्मण्यसेव्याय पदमीरयेत् ।। ७३-१२५ ।।
रामायाकुंठशब्दांतं तेजसे च समीरयेत् ।।
उत्तमश्लोकधुर्याय स्वं भृगुः कामिकान्वितः ।। ७३-१२६ ।।
दंडार्पितां प्रिये मंत्रो रामरामाक्षरो मतः ।।
ऋषिः शुक्रस्तथानुष्टुप्छंदो रामोऽस्य देवता ।। ७३-१२७ ।।
पादैः सर्वेण पंचांगं कुर्याच्छेषं षडर्णवत् ।।
लक्षं जपो दशांशेन जुहुयात्पायसैः सुधीः ।। ७३-१२८ ।।
सिद्धमंत्रस्य भुक्तिः स्यान्मुक्तिः पातकनाशनम् ।।
आदौ दाशरथायांते विद्महे पदमुच्चरेत् ।। ७३-१२९ ।।
ततः सीतावल्लभाय धीमहीति समुच्चरेत् ।।
तन्नो रामः प्रोचो वर्णो दयादिति च संवदेत् ।। ७३-१३0 ।।
एषोक्तारा मगायत्री सर्वाभीष्टफलप्रदा ।।
पद्मासीतापदं ङेतं ठद्वयांतः षडक्षरः ।। ७३-१३१ ।।
वाल्मीकिश्च मुनिश्छंदो गायत्री देवता पुनः ।।
सीता भगवती प्रोक्ता श्रीं बीजं वह्निसुन्दरी ।। ७३-१३२ ।।
शक्तिः षड्दीर्घयुक्तेन बीजेनांगानि कल्पयेत् ।।
ततो ध्यायन्महादेवीं सीतां त्रैलोक्यपूजिताम् ।। ७३-१३३ ।।
तप्तहाटकवर्णाभां पद्मयुग्मं करद्वये ।।
सद्रत्नभूषणस्फूर्जद्दिव्यदेहां शुभात्मिकाम् ।। ७३-१३४ ।।
नानावस्त्रां शशिमुखीं पद्माक्षीं मुदितांतराम् ।।
पश्यंतीं राघवं पुण्यं शय्यार्ध्यां षड्गुणेश्वरीम् ।। ७३-१३५ ।।
एवं ध्यात्वा जपेद्वर्णलक्षं मंत्री दशांशतः ।।
जुहुयात्कमलैः फुल्लैः पीठे पूर्वोदिते यजेत् ।। ७३-१३६ ।।
मूर्तिं संकल्प्य मूलेन तस्यामावाह्य जानकीम् ।।
संपूज्य दक्षिणे राममभ्यर्च्याग्रेऽनिलात्मजम् ।। ७३-१३७ ।।
पृष्टे लक्ष्मणमभ्यर्च्य षट्कोणेष्वंगपूजनम् ।।
पत्रेषु मंत्रिमुख्यंश्च बाह्ये लोकेश्वरान्पुनः ।। ७३-१३८ ।।
वज्राद्यानपि संपूज्य सर्वसिद्धीश्वरो भवेत् ।।
जातीपुष्पैश्चन्दनाक्तै राजवश्याय होमयेत् ।। ७३-१३९ ।।
कमलैर्धनधान्याप्तिर्नीलाब्जैर्वशयन् जगत् ।।
बिल्वपत्रैः श्रियः प्राप्त्यै दूर्वाभीरोराशांतये ।। ७३-१४0 ।।
किं बहूक्तुन सौभाग्यं पुत्रान्पौत्रान्परं सुखम् ।।
धनं धान्यं च मोक्षं च सीताराधनतो लभेत् ।। ७३-१४१ ।।
शक्रः सेंदुर्लक्ष्मणाय हृदयं सप्तवर्णवान् ।।
अगस्त्योऽस्य मुनिश्छंदो गायत्री देवता पुनः ।। ७३-१४२ ।।
लक्ष्मणाख्यो महावीरश्चाढ्यं हृद्वीजशक्तिके ।।
षड्दीर्घाढ्येन बीजेन षडंगानि समाचरेत् ।। ७३-१४३ ।।
द्विभुजं स्वर्णरुचुरतनुं पद्मनिभेक्षणम् ।।
धनुर्बाणकरं रामसेवासंसक्तमानसम् ।। ७३-१४४ ।।
ध्यात्वैवं प्रजपेद्वर्णलक्षं मंत्री दशांशतः ।।
मध्वाक्तैः पायसैर्हुत्वा रामपीठे प्रपूजयेत ।। ७३-१४५ ।।
रामवद्यजनं चास्य सर्वसिद्धिप्रदो ह्ययम् ।।
साकल्यं रामपूजाया यदीच्छेन्नियतं नरः ।। ७३-१४६ ।।
तेन यत्नेन कर्त्तव्यं लक्ष्मणार्चनमादरात् ।।
श्रीरामचंद्रभेदास्तु बहवः संति सिद्धिदाः ।। ७३-१४७ ।।
तत्साधकैः सदा कार्यं लक्ष्मणाराधनं शुभम् ।।
अष्टोत्तरसहस्रं वा शतं वा सुसमाहितैः ।। ७३-१४८ ।।
लक्ष्मणस्य मनुर्जप्यो मुमुक्षुभिरतंद्रितैः ।।
अजप्त्वा लक्ष्मणमनुं राममंत्रान् जपंति ये ।। ७३-१४९ ।।
न तेषां जायते सिद्धिर्हानिरेव पदे पदे ।।
यो जपेल्लक्ष्मणमनुं नित्यमेकांतमास्थितः ।। ७३-१५0 ।।
मुच्यते सर्वपापेभ्यः सर्वान्कामानवाप्नुयात् ।।
जयप्रधानो मंत्रोऽयं राज्यप्राप्त्यैकसाधनम् ।। ७३-१५१ ।।
नष्टराज्याप्तये मंत्रं जपेल्लक्षं समाहितः ।।
सोऽचिरान्नष्टराज्यं स्वं प्राप्नोत्येव न संशयः ।। ७३-१५२ ।।
ध्यायन्राममयोध्यायामभिषिक्त मनन्यधीः ।।
पञ्चायुतं मनुं जप्त्वा नष्टराज्यमवाप्नुयात् ।। ७३-१५३ ।।
नागपाशविनिर्मुक्तं ध्यात्वा लक्ष्मणमादरात् ।।
अयुतं प्रजपेन्मंत्रं निगडान्मुच्यते ध्रुवम् ।। ७३-१५४ ।।
वातात्मजेनानीताभिरोषधीभिर्गतव्यथम् ।।
ध्यात्वा लक्षं जपन्मंत्रमल्पमृत्युं जयेद्धुवम् ।। ७३-१५५ ।।
घातयंतं मेघनादं ध्यात्वा लक्षं जपेन्मनुम् ।।
दुर्जयं वापि वेगेन जयेद्रिपुकुलं महत् ।। ७३-१५६ ।।
ध्यात्वा शूर्पणखानासाछेदनोद्युक्तमानसम् ।।
सहस्रं प्रजपेन्मंत्रं पुरुहूतादिकान् जयेत् ।। ७३-१५७ ।।
रामपादाब्जसेवार्थं कृतोद्योगमथो स्मरन् ।।
प्रजपल्लँक्षमेकांते महारोगात्प्रमुच्यते ।। ७३-१५८ ।।
त्रिमासं विजिताहारो नित्यं सप्तसहस्रकम् ।।
अष्टोत्तरशतैः पुष्पैर्निश्छेद्रैः शातपत्रकैः ।। ७३-१५९ ।।
पूजयित्वा विधानेन पायसं च सशर्करम् ।।
निवेद्य प्रजपेन्मंत्रं कुष्टरोगात्प्रनुच्यते ।। ७३-१६0 ।।
विजने विजिताहारः षण्मासं विधिनामुना ।।
क्षयरोगात्प्रमुच्येत सत्यं सत्यं न संशयः ।। ७३-१६१ ।।
अभिमंत्र्य जलं प्रातर्मंत्रेण त्रिः समाहितः ।।
त्रिसंध्यं वा पिबेन्नित्यं मुच्यते सर्वरोगतः ।। ७३-१६२ ।।
दारिद्र्यं च पराभूतं जायते धनदोपमः ।।
विषादिदोषसंस्पर्शो न भवेत्तु कदाचन ।। ७३-१६३ ।।
मनुना मंत्रितैस्तोयैः प्रत्येहं क्षालयेन्मुखम् ।।
मुखनेत्रादिसंभूताञ्जयेद्द्व्रोगांश्च दारुणान् ।। ७३-१६४ ।।
पीत्वाभिमंत्रितं त्वंभः कुक्षिरोगान् जयेद्ध्रुवम् ।।
लक्ष्मणप्रतिमां कृत्वा दद्याद्भक्त्या विधानतः ।। ७३-१६५ ।।
स सर्वेभ्योऽथ रोगेभ्यो मुच्यते नात्र संशयः ।।
कन्यार्थी विमलापाणिग्रहणासक्तमानसः ।। ७३-१६६ ।।
ध्यायन् लक्षं जपेन्मंत्री अब्जैर्हुत्वा दशांशतः ।।
ईप्सितां लभते कन्यां शीग्रमेव न संशयः ।। ७३-१६७ ।।
दीक्षितं जुंभणास्त्राणां मंत्रेषु नियतव्रतम् ।।
ध्यात्वा च विधिवन्नित्यं जपेन्मासत्रयं मनुम् ।। ७३-१६८ ।।
पूजापुरःसरं सप्तसहस्रं विजितेंद्रियः ।।
सर्वासामपि विद्यानां तत्त्वज्ञो जायते नरः ।। ७३-१६९ ।।
विश्वामित्रक्रतुवरे कृताद्भुतपराक्रमम् ।।
ध्यायँल्लक्षं जपेन्मंत्रं मुच्यते महतो भयात् ।। ७३-१७0 ।।
कृतनित्यक्रियः शुद्धस्त्रिकालं प्रजपेन्मनुम् ।।
सर्वपापविनिर्मुक्तो याति विष्णोः परं पदम् ।। ७३-१७१ ।।
दीक्षितो विधिवन्मंत्री गुणैर्विगतकल्मषः ।।
स्वाचारनियतो दांतो गृहस्थो विजितेंद्रियः ।। ७३-१७२ ।।
ऐहिकाननपेक्ष्यैव निष्कामो योऽर्चयेद्विभुम् ।।
स सर्वान्पुण्यपापौधान्दग्ध्वा निर्मलमानसः ।। ७३-१७३ ।।
पुनरावृत्तिरहितः शाश्वतं पदमश्वतं पदमश्नुते ।।
सकामो वांछितान् लब्ध्वा भुक्त्वा भोगान् मनोगतान् ।। ७३-१७४ ।।
जातिरमरश्चिरं भूत्वा याति विष्णोः परं पदम् ।।
निद्राचन्द्रान्विता पश्चाद्भरताय हृदंतिमः ।। ७३-१७५ ।।
सप्ताक्षरो मनुश्चास्य मुन्याद्यर्चादि पूर्ववत् ।।
बकः सेंदुश्च शत्रुध्नपरं ङेतं हृदंतिमः ।। ७३-१७६ ।।
सप्ताक्षरोऽयं शत्रुध्नमंत्रः सर्वेष्टसिद्धिदः ।। ७३-१७७ ।।
इति श्रीबृहन्नारदीयपुराणे पूर्वभागे बुहदुपाख्याने सनत्कुमारविभागे तृतीयपादे रामाद्युपासनावर्णनं नाम त्रिसप्ततितमोऽध्यायः ।। ७३ ।।