नारदपुराणम्- पूर्वार्धः/अध्यायः ९६
ब्रह्मोवाच ।।
मरीचे श्रृणु वक्ष्यामि वेदव्यासेन यत्कृतम् ।।
श्रीमद्भागवतं नाम पुराणं ब्रह्मसम्मितम् ।। ९६-१ ।।
तदष्टादशसाहस्रं कीर्तितं पापनाशनम् ।।
सुरपादपरूपोऽयं स्कंधैर्द्वादशभिर्युतः ।। ९६-२ ।।
भगवानेव विप्रेंद्र विश्वरूपीसमीरितः ।।
तत्र तु प्रथमस्कंधे सूतर्षीणां समागमे ।। ९६-३ ।।
व्यासस्य चरितं पुण्यं पांडवानां तथैव च ।।
परीक्षितमुपाख्यानमितीदं समुदाहृतम् ।। ९६-४ ।।
परीक्षिच्छुकसंवादे सृष्टिद्वयनिरूपणम् ।।
ब्रह्मनारदसंवादे देवताचरितामृतम् ।। ९६-५ ।।
पुराणलक्षणं चैव सृष्टिकारणसंभवः ।।
द्वितीयोऽयं समुदितः स्कंधो व्यासेन धीमता ।। ९६-६ ।।
चरितं विदुरस्याथ मैत्रेयेणास्य संगमः ।।
सृष्टिप्रकरणं पश्चाद्बह्मणः परमात्मनः ।। ९६-७ ।।
कापिलं सांख्यमप्यत्र तृतीयोऽयमुदाहृतः ।।
सत्याश्चरितमादौ तु ध्रुवस्य चरितं ततः ।। ९६-८ ।।
पृथोः पुण्यसमाख्यानं ततः प्राचीनबर्हिषम् ।।
इत्येष तुर्यो गदितो विसर्गे स्कंध उत्तमः ।। ९६-९ ।।
प्रियव्रतस्य चरितं तद्वंश्यानां च पुण्यदम् ।।
ब्रह्मांडांतर्गतानां च लोकानां वर्णनं ततः ।। ९६-१० ।।
नरकस्थितिरित्येष संस्थाने पंचमो मतः ।।
अजामिलस्य चरितं दक्षसृष्टिनिरूपणम् ।। ९६-११ ।।
वृत्राख्यानं ततः पश्चान्मरुतां जन्म पुण्यदम् ।।
षष्ठोऽयमुदितः स्कंधोव्यासेन परिपोषणे ।। ९६-१२ ।।
प्रह्लादचरितं पुण्यं वर्णाश्रमनिरूपणम् ।।
सप्तमो गदितो वत्स वासनाकर्मकीर्तने ।। ९६-१३ ।।
गजेंद्रमोक्षणाख्यानं मन्वंतरनिरूपणे ।।
समुद्रमथनं चैव बलिवैभवबंधनम् ।। ९६-१४ ।।
मत्स्याक्तारचरितमष्टमोऽयं प्रकीर्तितः ।।
सूर्यवंशसमाख्यानं सोमवंशनिरूपणम् ।। ९६-१५ ।।
वंश्यानुचरिते प्रोक्तो नवमोऽयं महामते ।।
कृष्णस्य बालचरितं कौमारं च व्रजस्थितिः ।। ९६-१६ ।।
कैशोरं मथुरास्थानं यौवनं द्वारकास्थितिः ।।
भूभारहरणं चात्र निरोधे दशमः स्मृतः ।। ९६-१७ ।।
नारदेन तु संवादो वसुदेवस्य कीर्तितः ।।
यदोश्च दत्तात्रेयेण श्रीकृष्णोनोद्धवस्य च ।। ९६-१८ ।।
यादवानां मिथोंतश्च मुक्तावेकादशः स्मृतः ।।
भविष्यकलिनिर्द्देशो मोक्षो राज्ञः परीक्षितः ।। ९६-१९ ।।
वेदशाखाप्रणयनं मार्कंडेयतपःक्रिया ।।
सौरी विभूतिरुदिता सात्वती च ततः परम् ।। ९६-२० ।।
पुराणसंख्याकथनमाश्रये द्वादशो ह्ययम् ।।
इत्येवं कथितं वत्स श्रीमद्भागवतं तव ।। ९६-२१ ।।
वक्तुः श्रोतुश्चोपदेष्टुरनुमोदितुरेव च ।।
साहाय्यकर्तुर्गदितं भक्तिभुक्तिविमुक्तिदम् ।। ९६-२२ ।।
प्रौष्ठपद्यां पूर्णिमायां हेमसिंहसमन्वितम् ।।
देयं भागवतायेदं द्विजायप्रीतिपूर्वकम् ।। ९६-२३ ।।
संपूज्य वस्त्रहेमाद्यैर्भगवद्भक्तिमिच्छता ।।
योऽप्यनुक्रमणीमेतां श्रावयेच्छृणुयात्तथा ।।
स पुराणश्रवणजं प्राप्नोति फलमुत्तमम् ।। ९६-२४ ।।
इति श्रीबृहन्नारदीयपुराणे पूर्वभागे बृहदुपाख्याने चतुर्थपादे श्रीमद्भागवतानुक्रमणीनिरूपणं नाम षण्णवतितमोऽध्यायः ।। ९६ ।।