नारदपुराणम्- पूर्वार्धः/अध्यायः १००
श्रीब्रह्मोवाच ।।
अथ ते संप्रवक्ष्यामि पुराणं सर्वसिद्धिदम् ।।
भविष्यं भवतः सर्वलोकाभीष्टप्रदायकम् ।। १००-१ ।।
यत्राहं सर्वदेवानामादिकर्ता समुद्गतः ।।
सृष्ट्यर्थं तत्र संजातो मनुः स्वार्थभुवः पुरा ।। १००-२ ।।
स मां प्रणम्य पप्रच्छ धर्मं सर्वाथसाधकम् ।।
अहं तस्मै तदा प्रीतः प्रावोचं धर्मसंहिताम् ।। १००-३ ।।
पुराणानां यदा व्यासो व्यासं चक्रे महामतिः ।।
तदा तां संहितां सर्वां पंचधा व्यभजन्मुनिः ।। १००-४ ।।
अधोरकल्पवृत्तांतं नानाश्चर्यकथान्वितम् ।।
तत्रादिमं स्मृतं पर्वं ब्राह्मं यत्रास्त्युपक्रमः ।। १००-५ ।।
सूतशौनकसंवादे पुराणप्रश्नसंक्रमः ।।
आदित्यचरितप्रायः सर्वाख्यानसमन्वितः ।। १००-६ ।।
सृष्ट्यादिलक्षणोपेतः शास्त्रसर्वस्वरूपकः ।।
पुस्तलेखकलेखानां लक्षणं च ततः परम् ।। १००-७ ।।
संस्काराणां च सर्वेषां लक्षणं चात्र कीर्तितम् ।।
पक्षस्यादितिथीनां च कल्पाः सप्त च कीर्तिताः ।। १००-८ ।।
अष्टम्याद्याः शेषकल्पा वैष्णवे पर्वणि स्मृताः ।।
शैवे च कायतो भिन्नाः सौरे चांत्यकथान्वयः ।। १००-९ ।।
प्रतिसर्गाह्वयं पश्चान्नानाख्यानसमन्वितम् ।।
पुराणस्योपसंहारसहितं पर्व पंचमम् ।। १००-१० ।।
एषु पंचसु पूर्वस्मिन् ब्रह्मणो महिमाधिकाः ।।
धर्मे कामे च मोक्षे तु विष्णोश्चापि शिवस्य च ।। १००-११ ।।
द्वितीयं च तृतीये च सौरे वर्गचतुष्टये ।।
प्रतिसर्गाह्वयं त्वंत्यं प्रोक्तं सर्वकथान्वितम् ।। १००-१२ ।।
सभविष्यं विनिर्द्दिष्टं पर्व व्यासेन धीमता ।।
चतुर्द्दशसहस्रं तु पुराणं परिकीर्तितम् ।। १००-१३ ।।
भविष्यं सर्वदेवानां साम्यं यत्र प्रकीर्तितम् ।।
गुणानां तारतम्येन समं ब्रह्मेति हि श्रुतिः ।। १००-१४ ।।
तं लिखित्वा तु यो दद्यात्पौष्यां विद्वान्विमत्सरः ।।
गुडधेनुयुतं हेमवस्त्रमाल्यविभूषणैः ।। १००-१५ ।।
वाचकं पुस्तकं चापि पूजयित्वा विधानतः ।।
गंधाद्यैर्भोज्यभक्ष्यैश्च कृत्वा नीराजनादिकम् ।। १००-१६ ।।
यो वै जितेंद्रियो भूत्वा सोपवासः समाहितः ।।
अथ वैकहविष्याशी कीर्तयेच्छृणुयादपि ।। १००-१७ ।।
स मुक्तः पातकैर्घोरैः प्रयाति ब्रह्मणः पदम् ।।
योऽप्यनुक्रमणीमेतां भविष्यस्य निरूपिताम् ।। १००-१८ ।।
पठेद्वा श्रृणुयाच्चैतां भुक्तिं मुक्तिं च विंदति ।। १००-१९ ।।
इति श्रीबृहन्नारदीयपुराणे पूर्वभागे बृहदुपाख्याने चतुर्थपादे भविष्यपुराणानुक्रमणी निरूपणं नाम शततमोऽध्यायः ।। १०० ।।