नारदपुराणम्- पूर्वार्धः/अध्यायः ९४
श्रीब्रह्मोवाच ।।
श्रृणु वत्स प्रवक्ष्यामि पुराणं वैष्णवं महत् ।।
त्रयोविंशतिसहस्रं सर्वपातकनाशनम् ।। ९४-१ ।।
यत्रादिभागे निर्विष्टाः षडंशाः शक्तिजेन ह ।।
मैत्रेयायादिमे तत्र पुराणस्यावतारिकाम् ।। ९४-२ ।।
आदिकारणसर्गश्च देवादीनां च संभवः ।।
समुद्रमथनाख्यानं दक्षादीनां ततोऽन्वयः ।। ९४-३ ।।
ध्रुवस्य चरितं चैव पृथोश्चरितमेव च ।।
प्रचेतसं तथाख्यानं प्रह्लादस्य कथानकम् ।। ९४-४ ।।
पृथग्राज्याधिकाराख्या प्रथमोंऽशइतीरितः ।।
प्रियव्रताऽन्वयाख्याख्यानं द्वीपवर्षनिरूपणम् ।। ९४-५ ।।
पातालनरकाख्यानं सप्तस्वर्गनिरूपणम् ।।
सूर्यादिवारकथनं पृथग्लक्षणसंयुतम् ।। ९४-६ ।।
चरितं भरतस्याथ मुक्तिमार्गनिदर्शनम् ।।
निदाघऋभुसंवादो द्वितीयोंश उदाहृतः ।। ९४-७ ।।
मन्वन्तरसमाख्यानं वेदव्यासावतारकम् ।।
नरकोद्धारकं कर्म गदितं च ततः परम् ।। ९४-८ ।।
सगरस्यौर्वसंवादे सर्वधर्मनिरूपणम् ।।
श्राद्धकल्पं तथोद्दिष्टं वर्णाश्रमनिबन्धनम् ।। ९४-९ ।।
सदाचारश्च कथितो मायामोहकथा ततः ।।
तृतीयोंऽशोऽयमुदितः सर्वपापप्रणाशनः ।। ९४-१० ।।
सूर्यवंशकथ पुण्या सोमवंशाऽनुकीर्तनम् ।।
चतुर्थेंऽशेमुनिश्रेष्ठ नानाराजकथान्वितम् ।। ९४-११ ।।
कृष्णावतारसंप्रश्नो गोकुलीया कथा ततः ।।
पूतनादिवधो बाल्ये कौमारेऽघादिहिंसनम् ।। ९४-१२ ।।
कैशोरे कंसहननं माथुरं चरितं तथा ।।
ततस्तु यौवने प्रोक्ता लीला द्वारवतीभवा ।। ९४-१३ ।।
सर्वदैत्यवधो यत्र विवाहाश्च पृथग्विधाः ।।
यत्र स्थित्वाजगन्नाथः कृष्णो योगेश्वरेश्वरः ।। ९४-१४ ।।
भूभारहरणं चक्रे परेषां हननादिभिः ।।
अष्टावक्रीयमाख्यानं पंचमोंऽश इतीरितः ।। ९४-१५ ।।
कलिजं चरितं प्रोक्तं चातुर्विध्यं लयस्य च ।।
ब्रह्मज्ञानसमुद्देशः खांडिक्यस्य निरूपितः ।। ९४-१६ ।।
केशिध्वजेन चेत्येष षष्ठोंऽशः परिकीर्तितः ।।
अतः परं तु सूतेन शौनकादिभिरादरात् ।। ९४-१७ ।।
पृष्टेन चोदिताः शश्वद्विष्णुधर्मोत्तराह्वयाः ।।
नानाधर्मकथाः पुण्या व्रतानि नियमा यमाः ।। ९४-१८ ।।
धर्मशास्त्रं चार्थशास्त्रं वेदांतं ज्योतिषं तथा ।।
वंशाख्यानं प्रकरणात् स्तोत्राणि मनवस्तथा ।। ९४-१९ ।।
नानाविद्यास्तथा प्रोक्ताः सर्वलोकोपकारिकाः ।।
एतद्विष्णुपुराणं वै सर्वशास्त्रार्थसंग्रहम् ।। ९४-२० ।।
वाराहकल्पवृत्तांतं व्यासेन कथितं त्विह ।।
यो नरः पठते भक्त्या यः श्रृणोति च सादरम् ।। ९४-२१ ।।
तावुभौ विष्णुलोकं हि व्रजेतां भुक्तभोगकौ ।।
तल्लिखित्वा च यो दद्यादाषाढ्यां घृतधेनुना ।। ९४-२२ ।।
सहितं विणुभक्ताय पुराणार्थविदेद्विज ।।
स याति वैष्णवं धाम विमानेनार्कवर्चसा ।। ९४-२३ ।।
यश्च विष्णुपुराणस्य समनुक्रमणीं द्विज ।।
कथयेच्छृणुयाद्वापि स पुराणफलं लभेत् ।। ९४-२४ ।।
इति श्रीबृहन्नारदीयपुराणे पूर्वभागे बृहदुपाख्याने चतुर्थपादे विष्णुपुराणानुक्रमणीनिरूपणं नाम चतुर्नवतितमोऽध्यायः ।। ९४ ।।