नारदपुराणम्- उत्तरार्धः/अध्यायः ७६
अथ सेतुमाहात्यमारभ्यते ।।
मोहिन्युवाच ।।
साधु साधु द्विजश्रेष्ठ यन्मे रामायणं त्वया ।।
श्रावितं सर्वपापघ्नं नृणां पुण्यविवर्द्धनम् ।। ७६-१ ।।
अधुना श्रोतुमिच्छामि सेतुमाहात्म्यमुत्तमम् ।।
वसुरुवाच ।।
श्रृणु देवि प्रवक्ष्यामि सेतुमाहात्म्यमुत्तमम् ।। ७६-२ ।।
यं दृष्ट्वा मनुजो देवि मुच्यते भवसागरात् ।।
सेतोः संदर्शनं पुण्यं यत्र रामेश्वरो विभुः ।। ७६-३ ।।
दर्शनादेव मर्त्यानाममरत्वं प्रयच्छति ।।
रामेश्वरं तु संपूज्य नरो नियतमानसः ।। ७६-४ ।।
सर्वाः समश्नुते भूतीर्नात्र कार्या विचारणा ।।
चक्रतीर्थमिहान्यच्च वर्तते पापनाशनम् ।। ७६-५ ।।
स्नानं दानं जपो होमस्तत्रानंत्यं विगाहते ।।
तालतीर्थं तु संप्राप्य यः स्नायात्तत्र मानवः ।। ७६-६ ।।
स उत्तमां जनिं लब्ध्वा मोदते देववद्भुवि ।।
ततः संप्राप्य सुभगे तीर्थं पापविनाशनम् ।। ७६-७ ।।
स्नात्वा निर्धूतपापोऽसौ नरः स्वर्गे महीयते ।।
सीताकुंडे ततः प्राप्य स्नानं सम्यग्विधाय च ।। ७६-८ ।।
तर्पयित्वा पितॄन्देवान्सर्वान्कामानवाप्नुयात् ।।
मंगलं तीर्थमासाद्य स्नात्वा मुच्यते पातकात् ।। ७६-९ ।।
स्रात्वैवामृतवाप्यां तु मानवोऽमरतां लभेत् ।।
ब्रह्मकुंडे नरः स्नात्वा ब्रह्मलोकमवाप्नुयात् ।। ७६-१० ।।
स्नात्वा लक्ष्मणतीर्थे वै नरो योगगतिं व्रजेत् ।।
जटातीर्थे नरः स्नात्वा नीरोगो जायते भुवि ।। ७६-११ ।।
हनुमत्कुंडके स्नात्वा दुर्जयो जायतेऽरिभिः ।।
अगस्त्यतीर्थ आप्लुत्य पुत्रवान्धनवान्भवेत् ।। ७६-१२ ।।
रामकुंडे प्लुतो मर्त्यो रामसालोक्यमाप्नुयात् ।।
लक्ष्मीतीर्थाभिषेकेण लक्ष्मीवान्रूपवान्भवेत् ।। ७६-१३ ।।
अग्नितीर्थे नरः स्नात्वा मुच्यते सर्वकिल्बिषैः ।।
स्नानेन शिवतीर्थे तु शिवलोकगतिर्भवेत् ।। ७६-१४ ।।
शंखतीर्थे तु संस्नातो न नरो दुर्गतिं व्रजेत् ।।
यमुनादिषु तीर्थेषु नरः स्नात्वा दिवं व्रजेत् ।। ७५-१५ ।।
कोटितीर्थे तु संप्लुत्य सर्वतीर्थफलं लभेत् ।।
साध्यामृते प्लुतो याति नरः साध्यसलोकताम् ।। ७६-१६ ।।
सर्वतीर्थे नरः स्नात्वा लभेत्कामानभीप्सितान् ।।
धनुष्कोट्यां तु विधिवत्स्नातो मुच्यते बंधनात् ।। ७६-१७ ।।
क्षीरकुंडाप्लुतो मर्त्यो भोगानुच्चावचाँल्लभेत् ।।
कपितीर्थे नरः स्नात्वा न वियोनिं समालभेत् ।। ७६-१८ ।।
गायत्र्यां च सरस्वत्यां स्नातो मुच्येत किल्बिषात् ।।
ऋणमोचनतीर्थादौ स्नात्वा मुक्तो भवेदृणात् ।। ७६-१९ ।।
इत्येतत्सेतुतीर्थानां माहात्म्यं गदितं शुभे ।।
पठतां श्रृण्वक्तां चैव सर्वपातकनाशनम् ।। ७६-२० ।।
इति श्रीबृहन्नारदीयपुराणे बृहदुपाख्याने उत्तरभाग वसुमोहिनीसवादे सतुमाहातम्य नाम षट् सप्तीततऽध्यायः ।। ७६ ।।