सामवेदः/कौथुमीया/संहिता/पूर्वार्चिकः/छन्द आर्चिकः/1.1.4 चतुर्थप्रपाठकः/1.1.4.8 अष्टमी दशतिः

प्रप्र वस्त्रिष्टुभमिषं वन्दद्वीरायेन्दवे | धिया वो मेधसातये पुरन्ध्या विवासति || ३६० ||	१अ १छ्
कश्यपस्य स्वर्विदो यावाहुः सयुजाविति | ययोर्विश्वमपि व्रतं यज्ञं धीरा निचाय्य || ३६१ ||	२अ २छ्
अर्चत प्रार्चता नरः प्रियमेधासो अर्चत | अर्चन्तु पुत्रका उत पुरमिद्धृष्ण्वर्चत || ३६२ ||	३अ ३छ्
उक्थमिन्द्राय शंस्यं वर्धनं पुरुनिःषिधे | शक्रो यथा सुतेषु नो रारणत्सख्येषु च || ३६३ ||	४अ ४छ्
विश्वानरस्य वस्पतिमनानतस्य शवसः | एवैश्च चर्षणीनामूती हुवे रथानां || ३६४ ||	५अ ५छ्
स घा यस्ते दिवो नरो धिया मर्तस्य शमतः | ऊती स बृहतो दिवो द्विषो अंहो न तरति || ३६५ ||	६अ ६छ्
विभोष्ट इन्द्र राधसो विभ्वी रातिः शतक्रतो | अथा नो विश्वचर्षणे द्युम्नं सुदत्र मंहय || ३६६ ||	७अ ७छ्
वयश्चित्ते पतत्रिणो द्विपाच्चतुष्पादर्जुनि | उषः प्रारन्नृतूंरनु दिवो अन्तेभ्यस्परि || ३६७ ||	८अ ८छ्
अमी ये देवा स्थन मध्य आ रोचने दिवः | कद्व ऋतं कदमृतं का प्रत्ना व आहुतिः || ३६८ ||	९अ ९छ्
ऋचं साम यजामहे याभ्यां कर्माणि कृण्वते | वि ते सदसि राजतो यज्ञं देवेषु वक्षतः || ३६९ ||	१०अ १०छ्