तदा मासद्वयादूर्ध्वं राज्ञो मरणमादिशेत् ॥
प्राक्पश्चिमार्धयोरेकदैव प्रज्वलनं भवेत् ।
यदा ज्वलति पूर्वार्धं तुरङ्गो भीमदर्शनः ॥
तत्र सेनापतेर्नाशस्तथा राष्ट्रविनाशनम् ।
यदा कृत्स्नं पूर्वार्धं ज्वलितं तदा सेनापतिराष्ट्रविनाशो भवतीत्यर्थः ।
यदा ज्वलति सर्वत्र सपादतलमस्तकः ।
तदा राष्ट्रविनाशस्तु राज्ञश्च मरणं भवेत् ॥
उत्तमाङ्गस्य ज्वलने पुरोहितवधं विदुः ।
ज्वलने चैकपक्षस्य अश्वनाशं विनिर्दिशेत् ॥
वामपार्श्वे प्रज्वलिते मन्त्रिनाशमथादिशेत्
पार्श्वे प्रज्वलिते चैव दक्षिणे मन्त्रिनाशनम् ॥
गर्गस्तु ।
वामे तु पार्श्वे ज्वलिते हयस्यामात्यनाशनम् ।
दक्षिणे ज्वलिते पार्श्वे मित्रनाशं विनिर्दिशेत् ॥
शालिहोत्रः ।
ज्वलने चैकपक्षस्य अश्वनाशं विनिर्दिशेत् ।
कोशागारविनाशः स्यादुदरे ज्वलितं भवेत् ॥
मुष्कयोर्वाऽथ मेढ्रे च ज्वलने च विचक्षणः ।
अन्तःपुरभयं विद्याज्जघने सुतनाशनम् ॥
बृहद्यात्रायां वराह ।
अन्तःपुरं नाशमुपैति मेढ्रे कोशक्षयं स्यादुदरे प्रदीप्ते ।
पायौ च पुच्छे च पराजयः स्याद्वक्त्रोत्तमाङ्गज्वलने जयश्च ॥
स्कन्धासनासज्वलनं जयाय बन्धाय पादज्वलनं प्रदिष्टम् ।
ललाटवक्षोऽक्षिभुजेषु धूमः पराभवाय ज्वलनं जयाय ॥
