अथ अष्टमोऽध्यायः
***
श्रीवराहस्य स्वामितीर्थवायव्यभागस्थितिवर्णनम्
दिलीपः---
'स्थितानि स्वामिसरसि तीर्थानि मुनिपुङ्गव ! ।
कति तानि च पुण्यानि नामधेयानि कानि च ॥ १
का देवता ? किं फलञ्च ? वद विस्तरतो मुने !' ।
दुर्वासः---
तीर्थानामुत्तमं तीर्थं स्वामिपुष्करिणी शुभम् ॥ २
स्मर्तव्या सर्वतीर्थेषु गङ्गे बाधापहारिणी ।
तस्य वायव्यभागे तु वाराहं तीर्थमुत्तम् ॥ ३
यदाहृतं काश्यपेन भूतलं ब्रह्मणा तदा ।
संस्तुतो भगवान्विष्णुः भूम्युद्धरणमिच्छता ॥ ४
तन्नासापुटसम्भूतः किटिः पोत्री महाबलः ।
गत्वा रसातलं हत्वा हिरण्याक्षं महाबलम् ॥ ५
उज्जहार क्षितिं दंष्ट्राकोट्या च पुरुषोत्तमः ।
तद्रूपं लोकरक्षार्थं स्थापितं वेङ्कटाचले ॥ ६
स्वामिपुष्करिणीतीरे ब्रह्मणा परमेष्ठिना ।
जलाधिवासनं तस्य वायव्येऽस्यां चकार सः ॥ ७
ब्रह्मप्रार्थनया श्रीनिवासाभ्युपगतप्राथमिकवराहसेवाक्रमः
ममज्जाथ प्रतिष्ठान्ते देवर्षिपितृभिः सह ।
उवाच वचनञ्चेदं सर्वलोकस्य पश्यतः ॥ ८
वराहतीर्थनाम्ना च भागोऽयं प्रथितो भवेत् ।
योऽन्नायाति हरिं सोऽत्र नाऽस्त्रात्वैवाशुचिर्नमेत् ॥ ९
