भविष्यकृष्णावतारस्य कथां श्रुत्वाऽतिकौतुकात् ।
तदानीमेव तद्रूपदर्शनाह्लादकामतः ॥ १४
नित्यत्वात्स्वीयरूपाणां तथा प्रत्यक्षतां गतः ।
वैखानसो द्विजस्तत्र तपसा तमतोषयत् ॥ १५
मुक्त्यर्थं प्रीतिमान् विष्णौ तस्य स्वप्ने हरिः स्वयम् ।
"त्वया ध्येयः श्रीनिवासो नाहं ध्येयो द्विजोतम ! ॥ १६
यो योग्यो यस्य जीवस्य तेन ध्येय स एव हि ।
योग्योपासनया जीवा मुक्तिं यान्ति न संशयः ॥ १७
अभिधा श्रीनिवासस्य तव योग्या द्विजोत्तम ।
वेङ्कटाद्रिं ततो गच्छ श्रीनिवासः स्वयं हरिः ॥ १८
स्वामिपुष्करिणीतीरे रमया सह मोदते" ।
इत्याह भगवान् कृष्णः पुनः स्वप्नान्तरेऽवदत् । १९
"पुरा कृतयुगे पश्चात् भागे शङ्खेन वै कृतम् ।
विमानं कल्पप्रलये नष्टप्रायमभूद्विज ! ॥ २०
वल्मीकस्यान्तरे विष्णोः प्रतिमा वर्तते शुभा ।
शङ्खेन निर्मिता पुण्या सर्वपापहराऽमला ॥ २१
जानुमात्रे निमग्ना हि तिन्त्रिणीवृक्षमूलतः ।
धनुर्द्वयान्तरे पुण्यं भूतीर्थं वर्तते शुभम् ॥ २२
पाकार्थं देवदेवस्य भूम्या वै निर्मितं पुरा ।
तत्राऽस्ते गौतमी धेनुः सिञ्चन्ती पयसा विभुम् ॥ २३
चिञ्चावृक्षस्य वायव्ये भूतीर्थे वासमीयुषि ।
युगान्तप्रलये धेन्वा पूजितो वर्तते विभुः ॥ २४
दासनाम्ना च शूद्रेणसह ते पूजय प्रभुम् ।
त्वदागमनकाले तु पाण्ड्यदेशात्सुधीः शुभः ॥ २५
पृष्ठम्:श्रीवेङ्कटाचलमहात्म्यम्-२.pdf/४३
एतत् पृष्ठम् परिष्कृतम् अस्ति
२५
श्रीब्रह्मपुराणे सप्तमोऽध्यायः