कुतः प्रेत्य च सङ्गमसिद्धिरित्यत्राह-श्रुतिरित्यादि । ब्राह्मणानां मुखात् पुण्या खिल[३]किल श्रुतिः यत् उक्तार्थप्रतिपादिका श्रूयते अत इत्यर्थः । का सेत्यतस्तां श्रुतिं पठति इहेत्यादि । पद्यसिद्धये वाल्मीकिना महामत इति पदं प्रयुक्तम् । श्रुतिस्वरूपं तु तदतिरिक्तं यजुर्मन्त्ररूपम्–इह लोके च पितृभिर्यास्त्री यस्याद्भिर्दत्ता स्वधर्मेण प्रेत्यभावेऽपि तस्य सेति ॥ १८ ॥
एवमस्मात्स्वकां नारीं सुवृत्तां हि पतिव्रताम् ।
नाभिरोचयसे नेतुं त्वं मां केनेह हेतुना ॥ १९ ॥
एवमिति। श्रुतिस्मृतिन्यायतो नित्यसम्बन्धे सिद्धे सतीत्यर्थः । इह-इदानीमिति यावत् ॥ १९ ॥
भक्तां पतिव्रतां दीनां मां समां सुखदुःखयोः ।
नेतुमर्हसि, काकुत्स्थ ! समानसुखदुःखिनीम् ॥ २० ॥
सुखदुःखयोरिति । तत्साधनानुष्ठानयोरित्यर्थः । अत एव समानसुखदुःखिनीम् ॥ २० ॥
यदि मां दुःखितामेवं वनं नेतुं न चेच्छसि ।
विषमग्निं जलं वाऽहमास्थास्ये मृत्युकारणात् ॥ २१ ॥