वन्दितव्याश्च ते नित्यं याः शेषा मम मातरः ।
स्नेहप्रणय [१]संभोगैः समा हि मम मातरः ॥ ३२ ॥
स्नेहः-मातृत्वप्रयुक्तसन्तोषः । प्रणयः-अनुनयः-सेवा । संभोगः-अन्नपानादिविशेषप्रदानम् ॥ ३२ ॥
भ्रातृपुत्रसमौ चापि द्रष्टव्यौ च विशेषतः ।
[२]प्रिये ! भरतशत्रुघ्नौ प्राणैः प्रियतरौ मम ॥ ३३ ॥
भ्रात्रा पुत्रेण च क्रमात्समानभावास्पदौ-तथा द्रष्टव्यौ । त्वयेति शेषः 'प्रिये' इति सम्बुद्धिः ॥ ३३ ॥
विप्रियं न च कर्तव्यं भरतस्य कदाचन ।
स हि राजा प्रभुश्चैव देशस्य च कुलस्य च ॥ ३४ ॥
आराधिता हि शीलेन प्रयत्नैचोपसेविताः ।
[३]राजानस्संप्रसीदन्ति प्रकुष्यन्ति विपर्यये ॥ ३५ ॥
विपर्यये-शीलादिविपर्यये ॥ ३५ ॥
औरसानपि पुत्रान् हि त्यजन्त्यहितकारिणः
समर्थान् संप्रगृह्णन्ति जनानपि जनाधिपाः ॥ ३६ ॥
जनानिति-प्राकृतान् रक्तस्पर्शरहितानिति यावत् ॥ ३६ ॥
सा त्वं वसेह, कल्याणि ! राज्ञस्समनुवर्तिनी ।
भरतस्य, रता धर्मे सत्यव्रतपरायणा ॥ ३७ ॥