स्कन्दश्च भगवान् देवः [१]सोमश्च सबृहस्पतिः ।
सप्तर्षयो नारदश्च ते त्वां रक्षन्तु सर्वतः ॥ ११ ॥
याश्चापि सर्वतः सिद्धाः दिशश्च सदिमीश्वराः ।
स्तुता मया वने तस्मिन् पान्तु त्वां, पुत्र ! नित्यशः ॥ १२ ॥
शैलास्सर्वे समुद्राश्च राजा वरुण एव च ।
द्यौरन्तरिक्षं पृथिवी [२]नद्यस्सर्वास्तथैव च ॥ १३ ॥
नक्षत्राणि च सर्वाणि ग्रहाश्च [३]सहदेवताः ।
अहोरात्रे तथा सन्ध्ये पान्तु त्वां वनमाश्रितम् ॥ १४ ॥
ग्रहाः-कुजादयः । [४]सहदेवताः-तत्तदधिदेवतासहिताः ॥ १४ ॥
[५]ऋतवश्चैव षट् पुण्या मासास्संवत्सरास्तथा ।
कलाश्च काष्ठाश्च तथा तव शर्म दिशन्तु ते ॥ १५ ॥
ऋतवश्चैवेत्यादौ पुनः ऋत्वाद्यधिदेवताग्रहणमिति न दोषः ॥
महावने विचरतो मुनिवेषस्य धीमतः ।
तवादित्याश्च दैत्याच भवन्तु सुखदास्सदा ॥ १६ ॥
राक्षसानां पिशाचानां [६]रौद्राणां क्रूरकर्मणाम् ।
[७]क्रव्यादानां च सर्वेषां मा भूत्, पुत्रक ! ते भयम् ॥ १७॥
सर्वेषामिति । सर्वेभ्य इति यावत् ॥ १७ ॥
