तेन-एवं द्विः प्राणरक्षणेन हेतुना तुष्टेन तेन राज्ञा इत्यर्थः । तत्तेनेति । तत्-त्वदुक्तं वचनम् । तेन-राज्ञेत्यर्थः ॥ १७ ॥
[४]तथैषा तव तु स्नेहान्मनसा धार्यते मया ।
रामाभिषेकसंभारान्निगृह्य विनिवर्तय ॥ १९ ॥
यथा कथिता, तथैषा कथेति योजना । अभिषेकसंभारात् वरबलेन निगृह्य-निरुध्य, अभिषेकं विनिवर्तय ॥ १९ ॥
तौ च याचस्व भर्तारं भरतस्याभिषेचनम् ।
[५]प्रव्राजनं च रामस्य वर्षाणि तु चतुर्दश ॥ २० ॥
निवर्तनप्रकारमाह-तौ वरावित्यादि । भर्तारं तौ वरौ याचस्व । याचिर्द्विकर्मकः । तेन दानेऽनुमते, तयोरेकेन भरतस्याभिषेचनं, अपरेण रामस्य प्रव्राजनं च वृणु इति शेषः ॥ २० ॥
चतुर्दश हि वर्षाणि रामे प्रव्राजिते वनम् ।
[६]प्रजाभावगतस्नेहः स्थिरः पुत्रो भविष्यति ॥ २१ ॥
चतुर्दशसङ्ख्या किमर्थेत्यत्राह-चतुर्दशेत्यादि । प्रजानां भाव-गतः-आन्तरगतो यः स्नेहः-त्वत्पुत्रेऽनुरागः तेन हेतुना स्थिरस्तथा ॥
