चोरादिकेभ्यः परचक्रघाताद्
रक्षन्त्विदं सद्म सुरासुरेभ्यः ॥ २८३ ॥
अगदा मनुजाः सधनाः सुखिनः
प्रथिता यशसा च भवन्तु चिरम् ।
विजयी निखिलां पशुसस्यवतीं
सुकृती नृपतिः पृथिवीमवतात् ॥ २९३ ॥
ब्रह्मा विष्णुः शङ्करश्चन्द्रसूर्यौ
नन्दी लक्ष्मीर्वाग्वधूः स्कन्द इन्द्रः ।
भूमिर्देवाश्चर्षयश्च प्रजानां
श्रीसौभाग्यारोग्यभोगान् कृषीरन् ॥ ३०३ ॥
भूयाद् ध्रुवा द्यौः पृथिवी च भूयाद्
भवन्त्विमे भूमिधरा ध्रुवाच ।
ध्रुवं जगद् विश्वमिदं ध्रुवं स्याद्
राजा त[१]था धाम च तद् ध्रुवं स्यात् ॥ ३१३ ॥
ब्रह्मैव स्थपतिः साक्षाद् यजमानः स्वयं हरिः ।
आचार्यो भगवान् रुद्रः त्रिभिर्निष्पादितं तु यत् ॥ ३२३ ॥
तद् वास्तु स्थिरमेव स्याद् दृष्टादृष्टफलप्रदम् ॥ ३३ ॥
इति[२] वास्तुविद्यायां भवनपरिग्रहो नाम
पञ्चदशोऽध्यायः ।
