इतःपरं निस्त्रप ! दृश्यसे[१] चेद्
बाणा: परप्राणहराः प्रमाणम् |
संसर्गयोग्या यदि वो न मर्त्त्याः
शून्यं पुरं या[२]त वनं वियद्वा ॥ ५४ ॥
इतीरयित्वा स मुमोच पूर्वं
सन्धित्सवे[३] चित्ररथाय बाणम् ।
स तेन मुक्तो हृदयं विवेश
हितोपदेशो बलवानिवास्य ॥ ५५ ॥
अविह्वलश्चित्ररथोऽपि तूर्ण-
माकर्णमाकृष्य शरं मुमोच !
विवेश सोऽपि क्षितिभर्तुरन्तः-
सत्त्वावधिज्ञानकुतूहलीव ॥ ५६ ॥
एवं तयोस्तुल्यबले प्रहारे
चिरं प्रवृत्ते कलहान्तमिच्छन् ।
बलिं त्रिधामेव भुजङ्गमास्त्रै-
र्महारथश्चित्ररथं बबन्ध ॥ ५७ ॥
ततो विहस्ते पतिते च तस्मिन्
विवृद्धमन्युः शतमन्युरेनम् ।
धनुर्गुणाघट्टनधीरनादै-
र्भित्त्वा नभश्चक्रमिवाससाद ॥ ५८ ॥
ततो महेन्द्राचलशृङ्गसङ्गि-
कोदण्डमेघच्युतवाणवृष्टया ।
