पृष्ठम्:कपीनामुपवासः.pdf/8

६

कपीनामुपवासः

इत्येवमुक्तं स्वगुणानुरूपं कीशेन तेन प्रतिमोदमानाः । स्थिरासनक्लेशविनाशतोषात् कीशाः परे तुल्यमिति प्रणेदुः ॥ २० ॥

तथाऽस्तु को दोष इह स्थिताश्चेद्- व्रतोपवासश्रमपीडिताङ्गाः । वृक्षान् प्रति प्रातरितः प्रयातुं प्रायेण शक्ता न वयं भवेम ॥ २१ ।।

इत्थं विनिश्चित्य तटात्तटिन्याः स्वच्छन्दमुत्प्लुत्य विचेष्टमानाः । आसाद्य जम्बूद्रुममूलदेश- माबध्य पङ्क्तिं हरयो निषेदुः ॥ २२ ॥

तथा स्थितास्ते क्षणिकानुबद्धै- रुद्वीक्षणैर्विष्वगवक्षणैश्च । कण्डूयनैश्शीघ्रतमैश्च कांश्चित् क्षणान् कथञ्चित् क्षपयांबभूवुः ।। २३ ।।