वराहसंहितायाम् ।
काश्मीरान् सपुलिन्दनीनयवनान् हन्यात् कुरुक्षेत्रजान्
गान्धारानपि मध्यदेशसहितान् दृष्टो ग्रहः श्रावणे ।
काम्बोजैकशफाँश्च शारदमपि त्यक्त्वा यथोक्तानिमा-
नन्यत्र प्रचुरान्नवृष्टिमनुजैर्धात्रीं करोत्यावृताम् ॥
वृद्धगर्गः ।
प्रौष्ठपदे गृहीते तु प्रावृड्भवति पुष्कला[१] ।
क्षेमं तु बङ्गमगधकाश्मीरदरदान् प्रति ॥
पराशरस्तु ।
भाद्रपदे मगधदरदकलिङ्गबङ्गानपास्य शस्यक्षेमाय च ।
वराहसंहितायाम् ।
कलिङ्गबङ्गान् मगधान सुराष्ट्रान्
म्लेच्छान् सुवीरान् दरदान् शकाँश्च ।
स्त्रीणां च गर्भातसुरो निहन्ति
सुभिक्षकृद्भाद्रपदेऽभ्युपेतः ॥
वृद्धगर्गः ।
क्षेमं भवति शस्यं च गृहोतेऽश्वयुजि ग्रहे ।
पराशरस्तु ।
अश्वग्रहणे सुभिक्षक्षेमायावन्तिवाह्लीकचीनकाम्बोजसैन्धवानामभावाय च ।
वराहसंहितायां तु ।
काम्बोजचोनयवनान् सह शल्यकृद्भि-
र्बाह्लीकसिन्धुतटवासिजनाँश्च हन्यात् ।
आनर्त्तपौण्ड्रभिषजश्च तथा किरातान्
दृष्टोऽसुरोऽश्वयुजि भूरिसुभिक्षकृच्च ॥
- ↑ निष्फला इति ख ।
