सुवर्णगोप्रदानेन भूमिदानेन वा पुनः ।
देवेभ्यः प्रणमेन्नित्यं प्रातरुत्थाय मानवः ॥
भोजयेद्ब्राह्मणाँश्चैव दध्ना सर्पिःफलोदनैः ।
सायं प्रातस्तर्पित्वा ब्राह्मणान् मधुपायसैः ॥
पुण्याहं वाचयेच्चैव स्वस्त्यायनकसयुतम् ।
व्रतोपवासैः संतिष्ठेद्यमेन नियमेन च ॥
वायव्यैर्वारुणैश्चैव तथा चेन्द्रपुरोगमैः ।
आश्विनैर्वैष्णवै रौद्रैः सावित्रैश्च पुरोहितः ॥
सदा दुर्गामराणां च सावित्राणां तथा तथा ।
एवं कुर्वीत शालायां सप्तरात्रमतन्द्रितः ॥
अथ पुष्पितम् । शालिहोत्रः ।
विवर्णा विन्दवो वर्णाः प्रभवन्ति शरीरजाः ।
अग्रदन्तादिभागेषु तत् स्थानं पुष्पसंज्ञितम् ॥
वर्णेऽसवर्णं पुष्पं तु सूक्ष्मत्वादुपलभ्यते ।
शुभाशुभव्यञ्जकानि संस्थानस्थानवर्णतः ॥
अग्रदन्तेषु यस्य स्युरुत्तरंष्वधरेषु च ।
स्निग्धश्वेतानि पुष्पाणि खुरेष्वपि तथैव च ॥
अर्थागमं तेषु विद्यादह्नां सप्ततिभिर्बुधैः ।
अपि वा सप्तभिः पर्मासैः सप्तभिरेव च ॥
स्थानैरेषु विवृद्धिः स्यात् केशेष्वर्थागमं विदुः ।
निगाले भोजनार्थाय अर्थलाभं च निर्दिशत् ॥
दन्तात् पुत्राँश्च लभते कण्ठे पुष्पाणि यस्य तु ।
ग्रीवोपस्कन्धक्रोडेषु पुष्पितेषु धनागमः ॥
