पराशरः ।
रविरश्मयो रूक्षा विच्छिन्नास्तनवो ह्रस्वा धूम्राभा लोहिता विवर्णा गर्हिताः । स च निष्प्रभो जनमारकरः ।
अस्यार्थः । सप्रभो रविस्तस्य रश्मयो रौक्षादिदोषयुक्ता विगर्हिताः । तथाविधेषु रश्मिषु निष्प्रभो रविर्जनमारकर इति ।
तथा चोत्तरकाण्डे इन्द्रपराजयनिमित्तम् ।
"भास्करो निष्प्रभश्चैव”*[१] ।
वनपर्वणि भीमपराजयनिमित्तम् ।
"निष्प्रभश्चाभवत् सूर्यश्छन्नरश्मिस्तमोवृतः”[२]– इति ।
मध्याह्नव्यतिरेकेणैतत् ।
अथ तामसकीलकादिफलम् । वराहसंहितायाम् ।
तामसकीलकसंज्ञा राहुसुताः केतवस्त्रयस्त्रिंशत् ।
वर्णस्थानाकारैस्तान् दृष्ट्वाऽर्के फलं ब्रूयात् ॥
गर्गः ।
कृष्णाभाः कृष्णपर्यन्ताः संकुलाः कृष्णरश्मयः ।
राहुपुत्रास्त्रयस्त्रिंशत् कीलकाश्चातिदारुणाः ॥
वराहसंहितायाम् ।
ते चार्कमण्डलगताः पापफलाश्चन्द्रमण्डले सौम्याः ॥
[३]तेषामुदये रूपाण्यम्भःकलुषं [४]रजःकृतं व्योम ॥
तरुनगशिखरामर्दी सशर्करो मारुतश्चण्डः ।
ऋतुविपरीतास्तरवो दीप्ता मृगपक्षिणो दिशां दाहाः ॥
निर्घातमहीकम्पादयो भवन्त्यत्र चोत्पाताः ।
म पृथक् फलानि तेषां शिखकीलकराहुदर्शनं यदि च ॥
तदुदयकारणमेषां केत्वादीनां फलं ब्रूयात् ।
