तस्य मरणायेति सम्बन्धः ।
वायुलिङ्गमार्कण्डेयपुराणेषु ।
नग्नं श्रवणकं स्वप्ने हसमानं महाबलम् ।
एकं वा वीक्ष्य च बहून् विद्यान्मुत्युमुपस्थितम् ॥
वायुमार्कण्डेयपुराणेषु ।
आमस्तकतलो यस्तु निमज्जेत् पङ्कसागरे ।
दृष्ट्वा तु तादृशं स्वप्नं सद्य एव न जीवति ॥
चरकः ।
लाक्षारक्ताम्बराभं यः पश्यत्यम्बरमन्तिकात् ।
सरक्तपित्तमासाद्य तेनैवान्ताय नीयते ॥
वायुपुराणलिङ्गपुराणयोः ।
यस्तु प्रावरणं शुक्लं स्वकं पश्यति मानवः ।
कृष्णं रक्तमपि स्वेन तस्य मुत्युरुपस्थितः ॥
देवलस्तु विशेषमाह ।
छिद्रवासश्च कृष्णं च स्वप्ने यो बिभृयान्नरः ।
नग्नं वा श्रवणं दृष्ट्वा विन्द्यान्मृत्युमुपस्थितम् ॥
वायुपुराणेऽप्येवम् ।
लिङ्गपुराणे ।
श्वभ्रे यो निपतेत् स्वप्ने द्वारं चास्य पिधीते ।
न वोत्तिष्ठति यस्तस्मात् तदन्तं तस्य जीवितम् ॥
मार्कण्डेयपुराणेऽप्येवम् ।
लिङ्गपुराणे ।
अग्निप्रवेशं कुरुते स्वप्नान्ते यस्तु मानवः ।
न च स्मृतं न चाभिज्ञा तदन्तं तस्य जीवितम् ॥
मार्कण्डेयपुराणे तु विशेषः ।
स्वप्नेऽग्निं प्रविशेद्यस्तु न च निष्क्रमते पुनः ।
जलप्रवेशादपि वा तदन्तं तस्य जीवनम् ॥