होमयेत् तत्र धेनुं च दक्षिणात्वेन कल्पयेत् ॥
वस्त्रयुग्मं प्रदातव्यं काञ्चनेन समन्वितम् ।
ब्राह्मणान् भोजयेत् तत्र धान्यं दद्यात् तु दक्षिणाम् ॥
मयूरचित्रे ।
यदा कटकटायन्ते भवनान्यायुधानि च ।
मासाभ्यन्तरमात्रेण तदा संग्राममादिशेत् ॥
दिव्याऽत्रैकादशी शान्तिः करणीया विपश्चिता ।
तत्रैव ।
निर्भग्ने तोरणे द्वारे शान्तिरत्रैव दिव्यजा ।
नारदः ।
अकस्माद्गृहभूमिस्तु स्फुटते कुड्यकम्पनम् ।
गृहं च कम्पते यत्र कोकारावं विमुञ्चति ॥
गृहं वा पतते विप्र मूर्धवंशश्च भिद्यते ।
यस्य गेहे शृगालादिः प्रविष्टोऽथ प्रसूयते ॥
गृहं तस्य विनश्येत प्रभुर्वा म्रियते पुनः ।
पत्नी वा म्रियते तस्य पुत्रस्य मरणं भवेत् ॥
गृहोन्मादो भवेत् तस्य धनं चैव प्रलीयते ।
दधिमधुघृताक्तानां पत्राणां श्रीफलस्य च ॥
जुहुयादष्टसहस्राणि वैश्वानरेति मन्त्रवित् ।
सुवर्णं वस्त्रयुग्मं च धेनुं चापि पयस्विनीम् ॥
विप्राय दक्षिणां दद्यात् ततः संपद्यते शुभम् ।
मयूरचित्रे तु ।
अकस्माद्गृहमध्ये तु कोकारावं विमुञ्चति ।
मासाभ्यन्तरमात्रेण गर्भस्योत्सादनं तु तत् ॥
अत्रापि प्रथमा शान्तिर्यमलोत्पत्तिसम्भवा ।
