वसालोहितमांसानामस्थिमज्जाशिरोरुहाम् ॥
अकस्माच्चैव संजाते दर्शने नखभस्मनाम् ।
रसान्यत्वे रसानां च दुर्गन्धे वाऽनिमित्तजे ॥
पद्मपुष्पाकृतिर्यत्र दृश्यते मधुसर्पिषि ।
कुशरे पायसे चैव क्षयस्तस्य धनायुषोः ॥
घृते वा मधुदध्नोर्वा यदा पद्माकृतिर्भवेत् ।
स्वस्तिकोवाऽपि दृश्येत क्षीरौदनहविःषु च ॥
श्रोत्रियाय तु तद्दद्याद्गां चैवं शमयेन्नरः ।
यत्रत्यं चाद्भुतं पश्येत् तच्चापि प्रतिपादयेत् ॥
कुर्याच्च वारुणीं शान्तिं परमेण समाधिना ।
अक्षतरुधिरे उत्स्विन्नधान्यप्ररोहादिविहिता नारदीया शान्तिः कर्त्तव्या ।
इति श्रीमहाराजाधिराजनिःशङ्कशङ्करश्रीमद्वल्लालसेनदेवविरचितेऽद्भुतसागरे वृक्षाद्यद्भुतावर्त्तः।
अथ गृहाद्यद्भुतावर्त्तः ।
बार्हस्पत्ये ।
राजवेश्मनि चैत्येषु प्रासादे तोरणे ध्वजे ।
औत्पातिकानि दृश्यन्ते राज्ञां तत्र भयं भवेत् ॥
प्रासादतोरणानां च द्वारप्राकारवेश्मनाम् ।
अकस्माद्बलिनां भङ्गो विज्ञेयो राजमृत्यवे ॥
मत्स्यपुराणविष्णुधर्मोत्तरयोश्च ।
प्रासादतोरणाट्टालद्वारप्राकारवेश्मनाम् ।
अनिमित्तं तु पतनमट्टानां राजमृत्यवे ॥