विद्रवं नृपतेर्विद्याच्छान्तिः कार्या तु षोडशी ॥
संवत्सरेणास्य फलपाक इति वराहसंहितायामुक्तम् ।
इति श्रीमहाराजाधिराजनिःशङ्कशङ्करश्रीमद्वल्लालसेनदेवविरचितेऽद्भुतसागरे शक्रध्वजाद्भुतावर्त्तः ।
अथ वृक्षलताफलपुष्पशस्यान्नव्यञ्जनाद्यद्भुतावर्त्तः ।
तत्र सुन्दरकाण्डे रामजयनिमित्तम् ।
“प्रवान्त्यभ्यधिकं गन्धा नितान्तं पुष्पिता द्रुमाः"[१] ।
वराहसंहितायाम् ।
शाखाभङ्गेऽकस्माद्वृक्षाणां निर्दिशेद्रणोद्योगम् ।
हसने राष्ट्रभ्रंशं रुदिते च व्याधिबाहुल्यम् ॥
पराशरश्च ।
वृक्षाणां रोदने व्याधिर्हसने देशविद्रवम् ।
शाखाप्रपतनेऽकस्मात् संग्रामे योधघातनम् ॥
स्थानात् स्थानान्तरगमे देशभङ्गभयं भवेत् ।
वृद्धगर्गसंहितामत्स्यपुराणविष्णुधर्मोत्तरेषु ।
रोदने व्याधिमाख्याति हसने देशविभ्रमम् ।
शाखाप्रपतने कुर्यात् संग्रामे योधघातनम् ॥
जल्पत्स्वपि च वृक्षेषु रोदत्सु च धनक्षयम् ।
वदेदिति सम्बन्धः ।
जनक्षयमिति क्वचित् पाठः ।
वराहसंहितायाम् ।
सर्पत्सु तरुषु जल्पत्सु चाऽपि जनसंक्षयो विनिर्दिष्टः ।
बार्हस्पत्ये तु
नर्दने देशनाशः स्याद्योधा नश्यन्त्यशाखया ।
- ↑ उक्तस्थले नोपलभ्यते ।
