वृक्षा वा पर्वता वाऽपि परचक्रभयं भवेत् ॥
पराशरश्च ।
चतुष्पदपक्षिमनुष्याणामङ्गेषु धूमादिदर्शनं परचक्रागमनाय ।
औशनसे तु ।
पुमानश्वो गजो वाऽपि यदाऽकस्मात् प्रदीप्यते ।
दशमासात् परं तत्र जानीयाद्राष्ट्रसंभ्रमम् ॥
मत्स्यपुराणविष्णुधर्मोत्तरयोः ।
पुरवाहनयानेषु मनुष्यमृगपक्षिषु ।
विनाऽग्निं विस्फुलिङ्गदृश्यते यत्र कुत्र चित् ॥
तत्र संग्राममादिशेदिति सम्बन्धः ।
पराशरः ।
प्रासादचैत्यधूमप्रादुर्भावो महते भयाय ।
वृद्धगर्गस्तु ।
प्रासादादिषु चैत्येषु यदि धूमो विनाऽग्निना ।
भवन्ति वा विना धूमैरग्नयो वा भयाय ते ॥
तत्रैव ।
छत्रे गृहे वाऽथ रथे ध्वजे वा धूमः समुत्तिष्ठति यस्य तूर्णम् ।
स पार्थिवः साश्वमनुष्यकोषः पराभवं याति जनक्षयश्च ॥
वराहसंहितायाम् ।
सैन्यग्रामपुरेषु तु नाशो वह्नेर्भयं कुरुते ।
वृद्धगर्गः ।
शयनासनयानेषु केशप्रावरणेषु च ।
दृश्यतेऽग्निस्फुलिङ्गो वा धूमो वा मरणाय तत् ॥
यस्य शयनासनादौ तस्य मरणाय ।
वराहसंहितायाम् ।
धूमाग्निविस्फुलिङ्गैः शस्याम्बरमूर्धजैर्मृत्युः ।
