मयूरचित्रे ।
कृत्तिकाभरणीपुष्या अजेन्द्राग्निमघास्तथा ।
प्राक्फाल्गुनीति चाग्नेयं चलत्यस्मिन् मही यदि ॥
उल्का वा यदि वा वज्रं निर्घातो यदि चापतेत् ।
देहिनां देहनाशः स्याद्गावोऽल्पपयसस्तथा ॥
व्याधिभिर्द्विजपीडा च पित्तज्वरसमुत्थितैः ।
गूढगर्भाः स्त्रियश्च स्युर्वह्निदाहश्च सर्वशः ॥
ईतिर्भवति शस्यानां प्रीतिश्चापि न विद्यते ।
दह्यते च तथा भूमिर्न च वर्षति वासवः ॥
वराहसंहितायाम् ।
पुष्याग्नेयविशाखाभरणीपित्र्याजभाग्यसंज्ञानि
वर्गो हौतभुजोऽयं करोति रूपाण्यथैतानि ॥
तारोल्कापातावृतमादीप्तमिवाम्बरं सदिग्दाहम् ।
विचरति मरुत्सहायः सप्तार्चिः सप्तदिवसान्तः ॥
आग्नेयेऽम्बुदनाशः सलिलाशयसंक्षयो नृपतिवैरम् ।
दद्रूविचर्चिकाज्वरविसर्पिकाः पाण्डुरोगाश्च ॥
दीप्तौजसः प्रचण्डाः पीड्यन्ते चाश्मकाङ्गवाह्लीकाः ।
तङ्गणकलिङ्गवङ्गद्रविडाः शवराश्च नैकविधाः॥
यदि नक्षत्रसन्धौ वेलासन्धौ वा मुनिमतभेदाद्वा मण्डलसंशयो भवति तदैतदुक्तलक्षणद्वारेणाग्निमण्डलनिर्णयं कृत्वा प्रतिविधानमाचरणीयम् ।
भार्गवीये ।
तारापातैर्दिशां दाहैरुल्कापातैश्च सखनैः ।
हाहाकृतमिवाभाति प्रदीपितपथं नभः ॥
सप्ताहाभ्यन्तरे चापि क्षितौ वह्निः प्रकुप्यति ।
