बृहद्यात्रायां वराहः ।
धान्यरसमद्यभोजनफलपुष्पस्नेहमांसवस्त्राणाम् ।
सिकतारजोवसामृतशर्करकाङ्गारवर्षेषु ॥
सुतपत्नीक्षुद्रोगा नृपवेशचमूमरणसंक्लेशैः ।
भेदोपजापमव्रिव्याधिभयविनाशभयशोकाः ॥
बार्हस्पत्ये तु ।
वृष्टिर्यदा वर्षति रेणुवर्षं तस्योपरिष्टाद्धरितालवर्षम् ।
अदृष्टपूर्वं च यदा प्रवर्षेत् तदा बलं नश्यति पार्थिवस्य ॥
अत्र शान्तिर्मत्स्यपुराणविष्णुधर्मोत्तरयोः ।
सूर्येन्दुपर्जन्यसमीरणानां यागः स्मृतो वृष्टिविकारकाले ।
धान्यं च गोकाञ्चनदक्षिणाश्च देयास्ततो नाशमुपैति पापम् ॥
बार्हस्पत्ये तु ।
सूर्येन्दुवायुपर्जन्या यष्टव्या वर्षवैकृते ।
अन्नानि सहिरण्यानि धान्यं गावश्च दक्षिणाः ॥
वैश्वदेवाश्च होतव्याः सर्वाद्भुतविनाशनाः ।
चतुर्णामपि वर्णानामभयं विद्यते ततः ॥
गुरवे च हयः श्वेतः सर्वलक्षणलक्षितः ।
शतनिष्काश्च दातव्या अलाभे तु गवां शतम् ॥
मयूरचित्रे ।
हेमरक्तास्त्रपाषाणबालमुत्पांशुकर्दमैः ।
पुष्पायस्ताम्रकेशैश्च पृष्टौ सौर्या चरुक्रिया ॥
दिव्ये सूर्याय स्वाहेति प्रभृत्युक्तांऽतिदिश्यते ।
तत्रैव ।
प्रावृट्काले यदा मेघः पांशुवृष्टिं विमुञ्चति ।
चक्रवर्तिवधः प्रोक्तस्तदा गर्गेण भागुरे ॥
