सुवर्णरजतं दद्याद्भुतान्ते भूरिदक्षिणाम् ॥
इति षोडशी शान्तिः ।
सप्तहात् परिवेषफलपाक इति वराहेणोक्तम् ।
गार्गीये ।
ग्रहाणां परिवेषेषु त्रिरात्रात् फलमादिशेत् ।
इति श्रीमहाराजाधिराजनिश्शङ्कशङ्करश्रीमद्वल्लालसेनदेवविरचितेअद्भुतसागरे परिवेषाद्भुतावर्त्तः ।
अथेन्द्रधनुरद्भुतावर्त्तः ।
तत्रेन्द्रधनु: स्वरूपं वराहसंहितायाम् ।
सूर्यस्य विविधवर्णाः पवनेन विघट्टिताः कराः साभ्रे ।
वियति धनुःसंस्थाना ये दृश्यन्ते तदिन्द्रधनुः ॥
विन्ध्यवासिन[१] इयमार्या वराहेण लिखिता ।
वराहसंहितायां तु ।
के चिदनन्तकुलोद्भवनिश्वासोद्भुतमाहुराचार्याः ।
तथा च काश्यपः ।
अनन्तकुलाजाता ये पन्नगाः कामरूपिणः ।
तेषां निश्वाससम्भूतं शऋचापं प्रचक्षते ॥
अथ शुभ सूचकेन्द्रधनुर्लक्षणम् । तत्र काश्यपः ।
स्निग्धवर्णं घनश्यामं सर्वत्र दिशि दृश्यते ।
बहूदकं सुभिक्षं च शिवं शस्यप्रदं भवेत् ॥
वराहसंहितायाम् ।
चापमैन्द्रमनुलोममखण्डं प्रोज्ज्वलं वहलमातपमिष्टम्[२] ।
तथा च ।
