[१]आर्द्रायां कलिङ्गजातान् कोशलाँश्च निपीडयेत् ॥
वराहसंहितायां तु ।
सौम्योपगतो रसशस्यसंक्षयायोशनाः समादिष्टः ।
आर्द्रागितस्तु कोशलकलिङ्गहा सलिलनिकरकरः ॥
काश्यपः ।
पुनर्वसौ विदर्भाँश्च पीडयत्युशनाः शुभः ।
पुष्ये तु वृष्टिमाख्याति पुष्टां शस्यविवृद्धये ॥
वराहसंहितायां तु ।
अश्मकवैदर्भाणां पुनर्वसुस्थे सिते महाननयः ।
पुष्ये पुष्टा वृष्टिर्विद्याधररणविमर्दश्च ॥
काश्यपः ।
आश्लेषासु च सर्पाणां पीडां कुर्याद्भृगोः सुतः ।
मघायां तु गते घोरं भयं विन्द्यात् तु भार्गवे ॥
सलिलं च भवद्भूरि येन धात्री न दृश्यते ।
वराहसंहितायां तु ।
आश्लेषासु भुजङ्गमदारुणपीडावहश्चरन् शुक्रः ।
भिन्दन्मघां महामात्रदोषकृद्भूरिवृष्टिकरः ॥
काश्यपस्तु ।
भाग्ये पुलिन्दशवरान् नाशयेत् सलिलं पतेत् ।
आर्यम्णे तु भवेत् पीडा पाञ्चालकुरुजाङ्गले ॥
सुवृष्टिश्च सुभिक्षश्च चरत्यस्मिन् भृगोः सुते ।
वराहसंहितायां तु ।
भाग्ये शवरपुलिन्दप्रध्वंसकरोऽम्बुनिवहमोक्षाय |
आर्यम्णे कुरुजाङ्गलपाञ्चालघ्नः सलिलदायी ॥
- ↑ इत: प्रभृतीनि सर्वाणि शुक्रनक्षत्रचारफलबोधकानि काश्यपवचनानि अ. पुस्तकेऽन्यथा दृश्यन्ते । द्रष्टव्यम् अ. पृ. २२३।
