उदपानयन्त्रगान्धर्वलेख्यमणिरागगन्धयुक्तिविदः ।
आलेख्यशब्दगणितप्रसाधकायुष्यशिल्पज्ञाः ॥
चरपुरुषकुहकजीवकशिशुकविशठसूचकाभिचाररताः ।
दूतनपुंकहास्यज्ञभूततन्त्रेन्द्रजालज्ञाः ॥
आवर्त्तिक[१] नटनर्त्तकघृततैलस्नेहतिक्तबीजानि ।
व्रतचारिरसायनकुशलवेसराश्चन्द्रपुत्रस्य ॥
अथास्य नक्षत्रविशेषचारफलं वराहसंहितायाम् ।
विचरन् श्रवणधनिष्ठाप्राजापत्येन्द्रवैश्वदेवानि ।
मृद्गन् हिमकरतनयः करोत्यदृष्टिं सरोगभयाम् ॥
मृद्गन् निघ्नन् ।
तथा च काश्यपः ।
सौम्यं विष्णुं धनिष्ठां च रोहिणीं विष्णुमेव च ।
शशिजश्च यदा हन्ति प्रजा रोगैश्च पीड्यते ॥
वराहसंहितायाम् ।
रौद्रादीनि मघान्तान्युपाश्रिते चन्द्रजे प्रजापीडा |
शस्त्रनिपातक्षुद्भयरोगानावृष्टिसन्तापैः ॥
काश्यपस्तु ।
रौद्रादीनि यदा पञ्च भेदितानि समन्ततः ।
चन्द्रजेन तदा पीडा शश्वत् क्षुद्भव्याधिभिः ॥
हस्तादिषु यदा षट्सु नक्षत्रेष्विन्दुजः स्थितः ।
गवामशोभनः प्रोक्तः सुभिक्षं शस्यसम्पदः ॥
वराहसंहितायां तु ।
हस्तादीनि चरन् षडृक्षाण्युपपीडयन् गवामशुभः ।
स्नेहरसार्घविवृद्धिं करोति चोर्वी प्रभूतान्नाम् ॥
- ↑ आरक्षक इति अ.।
