तथा च पराशरः ।
दशमैकादशद्वादशेषु प्रदुष्टवषैर्द्रव्यरसान् दूषयन् प्राजानां धातून् प्रकोपयति व्याधीन् प्रवर्त्तयति ।
अथ व्यालं विष्णुधर्मोत्तरे ।
त्रयोदशचतुर्दशयोर्व्यालाख्यं व्यालवृद्धिकरम् ।
पराशरस्तु ।
त्रयोदशचतुर्दशयोः शस्यव्यालदंष्ट्रिप्राबल्यं हिरण्यसंचयम् ।
वृद्धगर्गस्तु ।
त्रयोदशगतः कुर्याच्चतुर्दशगतोऽपि वा ।
निवृत्तिमुदयाद्भौमो वक्त्रं व्यालं तदुच्यते ॥
भवेत् तत्र मृगव्यालदंष्ट्रिभ्यः सर्वतो भयम् ।
औदकानि न सत्वानि शस्यमुत्तमतां व्रजेत् ॥
गर्गस्तु ।
त्रयोदशे वा नक्षत्रं यदि चापि चतुर्दशे ।
निवृत्तिं कुरुते भौमस्तद्दक्त्रं व्यालमुच्यते ॥
भवन्ति प्रचुरा व्यालास्तस्मिन् सर्पा ह्यशेषतः ।
नृपाणां च भयं विन्द्याच्छस्यसम्पत्तिमादिशेत् ॥
अथ लोहितमुखं विष्णुधर्मोत्तरे ।
पञ्चदशषोडशयो रुधिरमुखं संग्रामकारकम् ।
गर्गः ।
यदि पञ्चदशे भेऽथ भूसुतः षोडशेऽपि वा।
निवृत्तिं कुरुते भौमस्तद्वक्त्रं लोहिताभिधम् ॥
दीप्तिमन्तः पार्थिवाश्च भवन्ति प्रस्थिता भुवि ।
क्षुद्ररोगश्च सुमहान् मुखरोगा भवन्ति च ॥
पराशरस्तु ।
पञ्चदशषोडशयोर्मुखरोगनृपक्षोभशस्त्रकोपाश्च ।
