बृहत्संहिता/अध्यायः २५
| ← अध्यायः २४ | बृहत्संहिता अध्यायः २५ वराहमिहिरः |
अध्यायः २६ → |
२५ स्वातियोगाध्यायः ।।
यद्रोहिणीयोगफलं तदेव स्वातावषाढासहिते च चन्द्रे ।
आषाढशुक्ले निखिलं विचिन्त्यं यो +अस्मिन्विशेषस्तं अहं प्रवक्ष्ये ।। २५.०१ ।।
स्वातौ निशांशे प्रथमे +अभिवृष्टे
सस्यानि सर्वाण्युपयान्ति वृद्धिम् ।
भागे द्वितीये तिलमुद्गमाषा
ग्रैष्मं तृतीये +अस्ति न शारदानि ।। २५.०२ ।।
वृष्टे +अह्निभागे प्रथमे सुवृष्टिस्तद्वद्द्वितीये तु सकीटसर्पा ।
वृष्टिस्तु मध्यापरभागवृष्टे निश्छिद्रवृष्टिर्द्युनिशं प्रवृष्टे ।। २५.०३ ।।
समं उत्तरेण तारा चित्रायाः कीर्त्यते ह्यपांवत्सः ।
तस्यासन्ने चन्द्रे स्वातेर्योगः शिवो भवति ।। २५.०४ ।।
सप्तम्यां स्वातियोगे यदि पतति हिमं माघमासान्धकारे
वायुर्वा चण्डवेगः सजलजलधरो वाअपि गर्जत्यजस्रम् ।
विद्युन्मालाकुलं वा यदि भवति नभो नष्टचन्द्रार्कतारं
विज्ञेया प्रावृडेषा मुदितजनपदा सर्वसस्यैरुपेता ।। २५.०५ ।।
तथएव फाल्गुने चैत्रे वैशाखस्यासिते +अपि वा ।
स्वातियोगं विजानीयादाषाढे च विशेषतः ।। २५.०६ ।।