भविष्यपुराणम् /पर्व ४ (उत्तरपर्व)/अध्यायः १७३

अग्नीष्टिकादानविधिवर्णनम्

युधिष्ठिर उवाच ।। ।।
अग्नीष्टिका कथं देया शिशिरे शीतभीरुभिः ।।
सर्वसत्त्वोपकाराय करुणीकृतमानसैः।।१।।
।। श्रीकृष्ण उवाच ।। ।।
अग्नीष्टिकामहं पार्थ कथयामि निबोध ताम्।
यथा येन विधानेन सर्वसत्वसुखप्रदाम् ।। २ ।।
आदौ मार्गशिरे मासि शोभने दिवसे शुभाम् ।।
अग्नीष्टिकां कारयित्वा सुखासनवतीं शुभाम् ।। ३ ।।
देवांगणे पथे गेहे विस्तीर्णे चत्वरेथ वा ।।
उभयोः संध्ययोः कृत्वा संशुष्कं काष्ठसंचयम् ।। ४ ।।
ततः प्रज्वालयेदग्निं हुत्वा व्याहृतिभिः क्रमात्।।
अनेन विधिना हुत्वा प्रत्यहं ज्वालयेत्ततः ।। ५ ।।
यदि कश्चित्क्षुधार्थी स्याद्भोज्यं तस्मै प्रकल्पयेत् ।।
सुखासीनो जनस्तत्र विशीतो विज्वरस्तथा ।। ६ ।।
यः करोति कथाः पार्थ न ताः शक्या मयोदितुम् ।।
राजवार्ता जनवार्ता यदि कश्चिन्निजेच्छया ।। ७ ।।
वदेल्लोकः सुखासीनो न केनापि निवार्यते ।।
अनेन विधिना यस्तु दद्यादग्नीष्टिकां नरः ।। ८ ।।
तस्य पुण्यफलं राज न्कथ्यमानं निबोध मे ।।
विमाने चार्कसंकाशे समारूढो महाधने ।। ९ ।।
षष्टिवर्षसहस्राणि षष्टिवर्षशतानि च ।।
हर्षितोऽत्यंतसुखितो ब्रह्मलोके महीयते ।। 4.173.१० ।।
इह लोकेवतीर्णश्च चतुर्वेदो द्विजो भवेत् ।।
नीरुजः सत्रयाजी च अग्निवत्तेजसान्वितः ।। ११ ।।
चैत्ये सुरांगणसभावसथे सुभव्यां येऽग्नीष्टिकां प्रचुरकाष्ठवतीं प्रदद्युः ।।
हेमंतशैशिरऋतौ सुखदा जनानां कायाग्निदीपनमलं पुनराप्नुवंति ।। १२ ।। ।।
इति श्रीभविष्ये महापुराण उत्तरपर्वणि श्रीकृष्णयुधिष्ठिरसंवादे अग्नीष्टिकादानविधिवर्णनं नाम त्रिसप्तत्युत्तरशततमोऽध्यायः ।।१७३।।