किमिदं कथ्यतां पुत्र्यः ! को धर्ममवमन्यते ।
[१]कुब्जाः केन कृताः सर्वा वेष्टन्त्यो नाभिभाषथ ॥ २६ ॥
को धर्ममवमन्यत इति । बलात्कारं करोतीति यावत् ॥ २६ ॥
एवं राजा विनिश्वस्य [२]समाधिमकरोत् ततः ॥ २६ ॥
इत्यार्षे श्रीमद्रामायणे बालकाण्डे द्वात्रिंशः सर्गः
एवमिति । पृष्ट्वेति शेषः । समाधिमकरोदिति । किं वक्ष्यन्तीति तद्वचनश्रवणैकाग्रचित्तोऽभूदित्यर्थः । इतर (२६ १/२)मानः सर्गः ॥ २६ ॥
इति श्रीमद्रामायणामृतकतकटीकायां बालकाण्डे द्वात्रिंशः सर्गः
अथ त्रयस्त्रिंशः सर्गः
[कुशनाभकन्यापरिणयः]
तस्य तद्वचनं श्रुत्वा कुशनाभस्य धीमतः ।
शिरोभिश्चरणौ स्पृष्ट्वा कन्याशतमभाषत ॥ १ ॥
अथ पृष्टप्रत्युत्तरतदुचितोत्तरव्यापारः-तस्येत्यादि ॥ १ ॥
वायुः सर्वात्मको राजन् ! प्रधर्षयितुमिच्छति ।
अशुभं मार्गमास्थाय न धर्मं प्रत्यवेक्षते ॥ २ ॥
प्रधर्षयितुं-अभिभवितुं । अशुभं-बलात्काररूपं नावेक्षते स्म ॥
