तस्मै हस्त्युत्तमान् चित्रान् कम्बलानजिनानि च ।
[१]अभिसत्कृत्य कैकेयो भरताय धनं ददौ ॥ १९ ॥
तस्मै भरतायेति योजना । चित्राजिनचित्रकम्बलानि तद्देशोत्तमवस्त्राणि ॥ १९ ॥
रुक्मनिष्कसहस्रे द्वे षोडशाश्वशतानि च ।
सत्कृत्य कैकयीपुत्रं केकयो धनमादिशत् ॥ २० ॥
रुक्मनिष्कसहस्रे द्वे इति । द्विपपूर्वा इति यावत् । निष्कं-फलं, ‘उरोभूषणे पले, दीनारेऽपि ' इति, निष्कः-घनमिति, चित्राजिनाद्युक्तरूपमित्यर्थः ॥ २० ॥
तथाऽमात्यानभिप्रेतान् विश्वास्यांश्च गुणान्वितान् ।
ददावश्वपतिः क्षिप्रं भरतायानु[२]यायिनः ॥ २१ ॥
[३]तथाऽमात्यानिति । स्वीयानिति शेषः । विश्वास्यान्- विश्वासनीयान्, ॠहलोर्ण्यत् । अश्वपतिः- केकयः तेषां कुलनामघेयम्, गजपत्यादिवत् ॥ २१ ॥
ऐरावतानैन्द्रशिरान् नागान् वै प्रियदर्शनान् ।
खरान् शीघ्रान् सुसंयुक्तान् मातुलोऽस्मै धनं ददौ ॥ २२ ॥
इरावत्पर्वतभवाः [४] ऐरावताः, तथा इन्द्रशिरःपर्वतभवाः ऐन्द्रशिराः नागाः । न नामनि विप्रतिपत्तिरिति इन्द्रशिरेत्यकारान्तं प्रातिपदिकम् ॥ २२ ॥
