सुव्यञ्जितार्थः सुभगावगाहो
गवां[१] निधिः केन निवेशनीयः ॥ ९ ॥
यतो न गृह्णन्ति सतोऽपि दोषा-
नतो दुराराध्यतमा हि सन्तः ।
कामं खलाश्चेदनुरञ्जनीया-
स्ते दोषलोला: सुलभाव दोषाः ॥ १० ॥
सचेतसः सन्ति विमत्सराचेद्
गुणाश्च काव्ये यदि नाम सन्ति ।
मिथो मिलन्त्येव न याचनीया
न[२] चेद् इये कः कथमर्थनीयः ॥ ११ ॥
आसीदनल्पोपलहेम शिल्पा
पुरी प्रतिष्ठानमिति प्रसिद्धा ।
स्वर्वाहिनीनीरगृहीतपार्श्वा
या रत्नभूषेव भुवो बभासे ॥ १२ ॥
चिरानुभूतं सुरलोकसख्यं
सम्भावयन्ती सुरनिम्नगायाः |
रराज या पार्श्वनिविष्टपार्श्वा
भुवं गतेवामरराजधानी ॥ १३ ॥
स्तम्भोपमानां मणिगोपुराणां
तुङ्गेषु शृङ्गेषु निवेशितस्य ।
आकाशधाम्नो मणिभित्तिकेव
प्राकारमाला विरराज यत्र ॥ १४ ॥
