समाहितं पूर्वतश्च यस्य दक्षिणचारिणः ।
मद्याभो दक्षिणो दन्तः स्वे च भागे प्रतिष्ठितः ॥
भ्रमन् दक्षिणपक्षेण शुक्लपक्षेण चेत् पतेत् ।
अभावं ब्राह्मणानां च विद्यान्नाशं तथैव च ॥
श्यामा पादै: शुभश्चैव श्यामास्या शुभमस्तका ।
रक्ताक्षी सूक्ष्मकेशी च सुविभक्तमृदुस्तनी ॥
वामपक्षेण निपतेद्विस्तीर्य दक्षिणाशिरः ।
नृपस्यान्तःपुरस्त्रीणां विनाशमभिनिर्दिशेत् ॥
अत्र शान्तिर्विष्णुधर्मोत्तरे ।
अतः परं प्रवक्ष्यामि कर्म नैमित्तिकं तव ।
गजानां मरके प्राप्ते तथा व्याधौ च दारुणे ॥
दन्तच्छेदाशुभोत्पत्तौ तथा राजद्विपे मृते ।
दन्तभङ्गे तथा जाते वामपक्षमृते गजे ॥
कृष्णपक्षे मृते नागे वह्निपृष्ठमृते तथा ।
दारुणासु च वेलासु दक्षिणापरमूर्धनि ॥
हस्तिन्यां वा मदे जाते प्रकृतेश्च विपर्यये ।
पूर्वोत्तरे तु दिग्भागे नगरान्मुखभेऽशुभे ॥
आसन्नतोयजस्निग्धद्रुमे वीतवनस्पतौ ।
प्रागुदक्प्रवणेनात्र स्थण्डिलं परिकल्पयेत् ॥
कमलं विन्यसेत् तत्र कर्णिकाद्योतकेसरम् ।
शीर्षं च विन्यसेत् तत्र केसरेषु तु विन्यसेत् ॥
ब्रह्माणं भास्करं पृथ्वीं तथा स्कन्दं च भार्गव ।
दलेषु तत्र दिक्पालान् विन्यसेत् सह कुञ्जरैः ॥
