विष्णुधर्मोत्तरे ।
अर्धमासेन दुर्गन्धप्रभवस्य शरीरतः ।
मार्कण्डेयपुराणे च ।
यस्य वस्तसमो गन्धो गात्रे शवसमोऽपि वा ।
तस्यार्धमासिकं ज्ञेयं योगिनो नृप जीवितम् ॥
वस्तसमश्छागसम इत्यर्थः ।
लिङ्गपुराणेऽप्येवम् ।
पराशरस्तु ।
अर्धमासाच्छवशोणितकुणपविण्मूत्रामनोज्ञगन्धप्रवर्त्तनहेतुकं गात्रेभ्यः -इति ।
कुणपः पिशाचादिः ।
देवलः ।
शवगन्धो भवेद्यस्य द्वादशाहं स जीवति ।
कालावल्यां तु ।
शवगन्धो भवेद्यस्य तिस्रो रात्रीः स जीवति ।
आदिपुराणे तु ।
उत्खातरोमाञ्चविरक्तदेहो निर्वर्षदन्तो विकृताननश्च ।
एभिर्दिनैः शावगन्धं प्रयाति परां च तां मण्डलां संप्रकर्त्तुम् ॥
सुश्रुतस्तु ।
पक्वमत्स्य[१]वशातैलघृतगन्धाश्च ये नराः ।
मद्यगन्धाश्च ये यान्ति गतास्ते यमसद्मनि ॥
चरकस्तु ।
नानापुष्पोपमा गन्धा यस्य चाभिदिवानिशम् ।
पुष्पितस्य वनस्येव नानाद्रुमलतावतः ॥
तमाहुः पुष्पितं धीरा नरं मरणलक्षणैः ।
स चैवं वत्सराद्देहं जहातीति न संशयः ॥
- ↑ पङ्कमत्स्य-इति क्व चित् पाठः ।
