"ववुर्वाताः सनिर्घाता रूक्षाः शर्करकर्षिणः” [१] ।
भागवते वासुदेवोत्क्रान्तिनिमित्तम् ।
“वायुर्वाति खरस्पर्शो रजसा विसृजन् नभः"[२] ।
बहुदिनानुबन्धिवात परमेतत् फलगौरवात् । तथा च मौशले वृष्णिक्षयनिमित्तम् ।
"उत्पेदिरे महावाता दारुणाश्च दिने दिने” [३] ।
बार्हस्पत्ये तु ।
वाति चाकालजो वायुर्घोरः शर्करकर्षणः ।
पातयन् वृक्षवेश्मादि गर्जयन्निव भीषणम् ॥
सप्ताहमथ वा पक्षमनुबन्ध्नाति दारुणम् ।
ततो यदि न वर्षेत घोरं शस्त्रभयं भवेत् ॥
आदिकाण्डे परशुरामपराजयनिमित्तम् ।
“तयोः समुद्यतोरेव वायुः प्रादुरभून्महान् ।
प्रचण्डः शर्कराकर्षी कम्पयन्निव मेदिनीम् ॥
उत्तरकाण्डे कार्त्तवीर्याद्रावणपराजयनिमित्तम् ।
चण्ड: प्रवाति पवनः सनादः सरजास्तथा ।
सकूर्चो वैकृतारावः संवर्त्तः क्षुभितो घनैः” [४] ॥
घनपर्वणि सौगन्धिकाहरणे भीमपराजयनिमित्तम् ।
“ततो वायुर्महान् शीघ्रो नीचैः शर्करकर्षणः ।
प्रादुरासीत् खरस्पर्शः संग्राममभिचोदयन्” [५] ॥
उत्तरकाण्डे जगदुद्वेजकरावणोत्पत्तौ ।
“....... ववुर्वाताः सुदारुणाः”। [६]
