गार्गीये तु ।
रथकूवरसंस्थाना हन्याद्भूपं सवाहनम् ।
शूलपट्टिशसंस्थाना देशं हन्ति सराजकम् ॥
उल्का लाङ्गलसंस्थाना कर्षकाँश्चैव घातयेत् ।
मयूरचित्रे ।
लाङ्गलाकृतयस्ताश्च शिखिकण्ठसमत्विषः ।
अमात्यान् नैगमाँश्चैव घ्नन्ति वै कर्षकाँस्तथा ॥
पराशरः ।
श्वमयूरशूकररक्षःप्रविकीर्णकेशानिकाशाभिः प्रवरनरपतिविनाशः स्यात् ।
बार्हस्पत्ये ।
वराहप्रेतशार्दूलसिंहमार्जारवानरैः ।
तुल्या भयावहा उल्काऽतिकृष्णाऽशनिभा च या ॥
शूलपट्टिशशक्त्यृष्टिपरश्वधसमुद्गरैः ।
अस्त्रावरणतुल्याश्च वृषभाश्च न पूजिताः ॥
वराहसंहितायाम् ।
प्रेतप्रहरणखरकरभनक्रकपिदंष्ट्रिलाङ्गुलमृगाभाः ।
गोधाहिधूमरूपा पापा या चोभयशिरस्का च ॥
एवंविधा यदा विस्तीर्णा भवन्ति तदा मध्यफला बोद्धव्याः ।
यथाऽऽह काश्यपः ।
आयुधप्रेतसदृशी जम्बुकोष्ट्खराकृतिः ।
धूमरूपा च यो सोल्का विस्तीर्णा सा तु मध्यमा ॥
वराहसंहितायायाम् ।
व्यालशूकरोपमा विस्फुलिङ्गमालिनी ।
खण्डशोऽथ वा गता सखना च पापदा ॥
