अथ फलपाकसमयमाह पराशरः ।
निर्घातस्तु त्रिभिर्मासैः-इति ।
इति श्रीमहाराजाधिराजनिश्शङ्कशङ्करश्रीमद्वल्लालसेनदेवविरचितेऽद्भुतसागरे निर्घाताद्भुतावर्त्तः ।
अथ सन्ध्याद्भुतावर्त्तः ।
तत्र सन्ध्यासमयो वराहस्संहितायाम् ।
अर्धास्तमयात् सूर्यात् संदृष्टास्तारका यावत् ।
तेजःपरिहानिमुखाद्भानो रुद्धोदयो यावत्[१] ॥
अथ शुभसूचकलक्षणं वराहसंहितायाम् ।
शस्ता शान्तद्विजमृगघुष्टा सन्ध्या स्निग्धा मृदुपवना च ।
पराशरस्तु ।
निर्वातनिर्मलस्निग्धायां शान्तमृगद्विजायां प्रसन्नायामनुपहतायां योगक्षेमं विन्द्यात् ।
वराहसंहितायां तु ।
मन्दपवनावघट्टितचलितपलाशद्रुमा विपवना वा ।
मधुरस्वरशान्तविहङ्गमृगरुता पूजिता सन्ध्या ॥
वटकणिकायाम् ।
स्निग्धा प्रशान्तशकुना मृदुमारुता च
सन्ध्या सहस्रकिरणानुसमानवर्णा ।
शस्ता पयोदसमये कुरुतेऽतिवर्षं
वृष्टिं रुणद्ध्यशुभदा च विपर्ययेण ॥
अथाशुभसूचकसन्ध्यालक्षणं बार्हस्पत्ये ।
तमोधूमरजस्काभ्रदीप्तद्विजमृगावृताः ।
- ↑ अ. पुस्तकेऽन्यथा पाठदर्शनाद्वटकणिकाया इदं पद्यमित्यनुमीयते ।