द्रविड विदेहान्ध्राश्मकभासापरकौङ्गणाः समव्रिषिकाः ।
कुन्तलकेरलदण्डककान्तिपुरम्लेच्छसङ्करिणः ॥
नागरकृषिकरपारतहुताशनाजीविशस्त्रवार्त्तानाम् ।
आडविकदुर्गकर्वटवधिकनृशंसावलिप्तानाम् ॥
नरपतिकुम्भारकुञ्जरदम्भिकडिम्भाभिघातपशुपानाम् ।
रक्तफलकुसुमविद्रुमचमूपगुडमद्यतीक्ष्णानाम् ॥
कोषभवनाग्निहोत्रिकधात्वाकरशाक्यभिक्षुचौराणाम् ।
शठदीर्घवैरबह्वाशिनां च वसुधासुतोऽधिपतिः ॥
अथ वर्णफलम् । तत्र वृद्धगर्गः ।
पीतकः कृष्णवर्णो वा विरश्मिर्वा विगर्हितः ।
अथ चारफलम् । तत्र वृद्धगर्गः ।
त्रिंशद्भिर्लोहितो मासैर्विचरेद्राशिविंशकम् ।
यदा स पूजितश्चारो न च न्यूनो न चाधिकः ॥
अथास्य नक्षत्रविशेषेषु चारादिफलं वराहसंहितायाम् ।
चारोदयाः प्रशस्ताः श्रवणमघादित्यमूलहस्तेषु ।
एकपदादिविशाखाप्राजापत्येषु च कुजस्य ॥
प्राजापत्ये श्रवणे मूले त्रिषु चोत्तरेषु शके च ।
विचरन् घननिवहानामुपघातकरः क्षमातनयः ॥
विष्णुधर्मोत्तरे तु ।
ध्रुवेषु वैष्णवे मूले शाक्रे च विचरन् कुजः ।
घोरां करोत्यनावृष्टिं कृत्तिकासु मधासु च ॥
ध्रुवेषु उत्तरात्रयरोहिणीषु ।
वराहसंहितायाम् ।
दक्षिणतो रोहिण्याश्चरन्महीजोऽर्घवृष्टिनिग्रहकृत् ।
धूमायन् सशिखो वा विनिहन्यात् पारियात्रस्थान् ॥
